सौण आलो , गदिरा भरेला ( डा शिवा नन्द नौटियाल )

डा शिवा नन्द नौटियाल 

जब मैना सौण को आलो 

बरखा होली गदिरा भरेला , स्वीँसाट होलो गाड को। 

काळा काळा बादळ आला , रंग मल्हार गाला 

अंधेरो होलो चाल चलकेली उज्याळो होलो धार को। 

थम थम मोर नाचला , मिंडखा टर्र टर्र बोलाला 

पैरा पोड़ला रस्ता टुटला चोट होली रात को। 

छाम छम के कोदो गोडेलो , कुयोड़ो होलो रात सि लगली 

जबतक कुटी दाथी हाथ मा , नाम नि होलो बाटा को। 

घाम की खुद सी लागली , छी छी होली पाणी की 

घाम आलो कमाण पोड़ली , रंग अनोखे सौण को। 

हरो तरो सभी जगा होलो , छोया फुटला जगु जगु मा 

पशु पंछी पाणी पाला , कुयेड़ो फटालो जिकुड़ी को। 
जब मैना सौण को आलो 
बरखा होली गदिरा भरेला , स्वीँसाट होलो गाड को।