छुमा स्याळि छ्वीं करद वो कवि ह्वे ग्यायि

कवि -लोकेश नवानी 

जौंकि चलि नी दिल्लि मा छंट्याँ महाचकड़ैत।  

बणगिन पंच पर्वाण इख , करण लग्याँ पंचैत ।1।

बीं से बि कम बोल्दन छोरा विदेसू भेज्यांन।  

वो भाषा साहित्य का यख छन पंच परवाण । 2 ।

घौरम भ्यू करदन बड़ो भाषा से बिखळाण ।

सभा मिटिंगु मा छन बण्या , भाषा का विद्वान ।3 । 

छुमा स्याळि  छ्वीं करद वो बल कवि ह्वे ग्यायि । 

जो कवि छौ वो  देखि की आंसु फुंजद रै ग्यायि। 4 ।

कविता जब जब भी बणद कै चारण कू गीत ।

चरणवन्दना मा लिख्युं वो साहित्य त नि हूंद ।5 ।

सच तैं दबै नि सकुद क्वी करल्यो कतग प्रयास।  

बिना ढुंड्याँ चुप रैंदु नी , सूण बेटा इतिहास। 6 ।

यां से बडु परमाण क्या कलयुग ऐगे घोर ।

कवियों प्रमुख बण्यु हैंकै कविता कु चोर । 7 ।

थुपड़ा लगै की मीलि गिन वै इनाम खिताब ।

पर समाज से मन को रैगे केवल ख्वाब । 8 ।

 

सर्वाधिकार @ लोकेश नवानी , देहरादून