आतंकवादी की दलील

भीष्म कुकरेती 

     
(s =आधी अ  = अ , क , का , की ,  आदि )

रिपोर्टर - आतंकवादी  बात …

आतंकवादी - मिस्टर रिपोर्टर प्लीज बिहेव विद मैनर।  त्यार ब्वे बाबुन संस्कार सिखैन ?

रिपोर्टर - क्या मतबल ?

आतंकवादी -मि तैं दिग्विजय सिंह जीक तरां आतंकवादी जी करिक भट्या ! जी लगाण जरूरी च 

रिपोर्टर - मि क्वी राजनेता नि छौं जु मौत का एजेंटों याने आतंकवादी तैं श्रीमान , श्रीमती , जी कौरिक बुलौं।

आतंकवादी -एक बात बतादी रे रिपोर्टर ।

रिपोर्टर - क्या ?

आतंकवादी -  शराब का मालिक विजय मल्लया या खेतान तैं तू जी लगैक किलै भट्यांदि भै ? 

रिपोर्टर - उ  लोग ये देस का सभ्य नागरिक छन ।

आतंकवादी -त मि बिरण देसौ नागरिक छौं ?

रिपोर्टर - नै नै तुम लोग हत्या .... 

आतंकवादी -तो क्या शराब मा हत्या जन काम नि करदि ।

रिपोर्टर - शराब बि हत्यारी च पण उन नी  च जन कि आतंकवादी द्वारा हत्या !

आतंकवादी - अच्छा ! एक हत्या जायज अर हैंकि हत्या नाजायज ?

रिपोर्टर - नै आतंकवाद  मानव समाज का वास्ता बड़ो गुनाह च। . 

आतंकवादी -चरस-गांजा , गर्द, ड्रग्स जन वस्तु  क्या मानव हत्या का माध्यम नि छन ?

रिपोर्टर -अवश्य ही यी सब वस्तु अंत मा मनुष्य की हत्या ही करदन ।

आतंकवादी -अर जु जु बि ,नेता  अफसर , सुरक्षा कर्मचारी व अन्य व्यापारी गर्द , ड्रग्स, चरस गांजा  भारत मा फैलाणा छन , -चरस गांजा का धंधा तैं परिश्रय दीन्दन।  वूं लोगुं तैं तुम लोग आतंकवादी या हत्यारा किलै नि माणदा ? 

रिपोर्टर - भै नशा व्यापार कुछ हौर हूंद अर आतंकवाद कुछ हौर हूंद।

आतंकवादी -पण अंत मा शराब , ड्रग्स आदि से मनुष्य हत्या ही हूंद तो तुम सभ्य , सुसंस्कृत लोग शराब , ड्रग्स का व्यापारियों तैं किलै ना आतंकवाद्यूँ श्रेणी मा धरदा भै ? 

रिपोर्टर - वो तो .... वो तो 

आतंकवादी - चल एक बात बतादी तम्बाकू ,बीड़ी - सिगरेट त मनुष्य की हत्यारा ही च ?

रिपोर्टर - हाँ

आतंकवादी -तो फिर तुम श्रेष्ठि लोग तम्बाकु  उपजाण वाळु तैं , बीड़ी -सिगरेट निर्माताओं और विक्रेताओं तैं हत्यारा किलै नि माणदा भै ? 

रिपोर्टर - वो तो .... वो तो

आतंकवादी -मि जाणदु छौं सभ्य समाज का पास यांक उत्तर नी  च 

रिपोर्टर - छैं च पण …

आतंकवादी -चल एक बात बताओ कि भारत मा जातीय -धार्मिक दंगा हूँदन कि ना ? सैकड़ों लोग हर साल दंगों मा मरदन कि ना ?

रिपोर्टर - हाँ  कै ना कै रूप मा हर मैना जातीय -धार्मिक दंगा हूणा रौंदन।

आतंकवादी -तो फिर  दंगा कराण वाळु , दंगा भड़काण वाळु तैं तुमार सभ्य समाज , तमीजदार समाज , सुसंकृत समाज आतंकवादी किलै घोसित नि करदो भै ? 

रिपोर्टर - हां पैन दंगा तैं हम आतंकवाद नाम नि दे सकदा। 

आतंकवादी - हा ! हा ! एक हत्या जायज अर दुसर हत्या नाजायज ? सबसे पैल तंबाकु का जघन्य हत्यारा व्यापार अर पैदावार बंद कराओ , जातीय दंगा जन जघन्य कृत्य, कुकर्म  बंद कराओ तो भारत मा आतंकवाद जन्म ले ही नि सकुद। 

रिपोर्टर - अब तीन बुलण बल शराब , ड्रग्स , चरस -गांजा का धंधा बंद कारो तो आतंकवाद अफिक  बंद ह्वे जालु। 

आतंकवादी - अवश्य बंद ही ह्वे जालु।  

Copyright@ Bhishma Kukreti  5 /12/2013