बेलो पॉवर्टी लाइन (बीपीएल ) की घिराळी -चकरघिनी

चबोड़्या -चखन्यौर्या -भीष्म कुकरेती 

     
(s =आधी अ  = अ , क , का , की ,  आदि )

अधिकारी - मेरि जान नि खा ! तू गरीबी रेखा तौळ  ऐइ नि सकदी !

लखपति  -ह्यां पण म्यार नाम म्यार बुबान लखपति  इलै धौर छौ कि सैत च हम तैं  द्वी टैम खाणा नसीब ह्वे जावो !

अधिकारी -मीन सौ दैं बोलि याल लखपत्यूं  हजारपत्यूं  तैं हम गरीबी रेखा तौळ वाळ याने बीपीएल सर्टिफिकेट नि दे सकदां। 

लखपति -पण  .... !

अधिकारी -हवलदार ये आदिम तैं गां से भैर छोड़ि आ यु सरकारी कामु मा अड़चन डळणु च। 

हवलदार -चल साला गांव की सरहद से भैर चल जा हाँ , निथर त्वै पर उपद्रव मचाणै धारा लगै द्योल हां !
लखपति - जांद छौं ! जांद छौं
हवलदार -पता नि यूं लखपत्यूं तैं शरम ल्याज बि नी च जु बीपीएल मा आण चांदन।  

गरीबदास -समनैन साब ! यि ल्यावो म्यार कागजात ! 

अधिकारी -हूं त त्यार क्वी सगा संबंधी बि नी जु तेरि देख भाळ कौर साक !

गरीब दास - सात भाई ह्वे छा पण क्वी ये रोगन मोर त क्वी हैंक रोगन मोर। 

अधिकारी -पण तेरी घरवळि त छैं च ?

गरीब दास -हां चौथु बच्चा जणद दैं वीं पर लकवा मारि  गे।  तीन बच्चों देख भाळ नि ह्वे सकणि च। 

अधिकारी -हां तू बीपीएल लैक नागरिक छे 

गरीबदास - जुग  जुग जिओ साब ! तुमर ड्यार छपन भोगुं बरखा हूणि रैन !

अधिकारी -हैं ! गरीबदास त्यार नाम पर त एक पक्कु मकान च ?

गरीबदास -साब इख पहाड़ि गाउँ मा मकान नि ह्वाल त हर साल सैकड़ों लोग ठंड से मरि जाला।  

अधिकारी -नै नै ! पण जैमा पक्कु मकान होलु वै तैं हम बीपीएल मा नि डाळि सकदां 

गरीबदास -साब वो मकान तो थोकदार जीन म्यार पड़दिदा तैं थोकदार जी कुण पख्यड़  खोदिक पुंगड़ बणाणो मजदूरी मा दे छौ। 

अधिकारी - मि कुछ नि जाणदु नियमक हिसाब से जैम पक्कु मकान ह्वावो वो बीपीएल स्कीम मा नि ऐ सकुद 

गरीबदास - साब अब तुमि कुछ कारो। 

अधिकारी -सॉरी गरीबदास ! तू बीपीएल मा नि ऐ सकदी। हवलदार ! गरीबदास तै भैरौ रस्ता दिखावो 

गरीबदास -रण द्या मि अफिक जांदु।  अरे गढ़वाळम क्वी मौ इन नि ह्वे सकदी जैक एक भितर नि ह्वावो तो  …। 

अधिकारी -हैंक प्रार्थी तैं बुलावो 

निखण्या दास -ल्या साब सौब कागजात लयां छन। 

अधिकारी - हाँ तीम त पक्कु मकान बि नी च। 

निखण्या दास -साब अपण पक्कु मकान नि हूण से पोरु साल ठंडन  एक नौन मोर अर परार दूधि नौनु मोर ! झुपड़ा मा ठंड भौत हूंद 

अधिकारी -हां तू अवश्य ही बीपीएल लायक  नागरिक छे
निखण्या दास - जुगराज रयां साब !

अधिकारी -अरे ! पर तुमर नाम पर  त एक साइकल च
निखण्या दास - वूंक कफ़न लगलि या सैक़ल जौन फोकट मा दे छे ।  परार एक सरकारी स्कीम ऐ छे कि नौन्युं तै सरकार से फ्री सैकल मीललि।  छै मील से हम वीं साइकल तै जनकेक ल्है छा . अब हमर क्षेत्र मा  सड़क बि नि छन त साइकल दिवतौं मूरत जन पडीं च। 

अधिकारी -मि कुछ नि जाणदु।  सरकारी हिसाब से त्यार परिवार साइकल मालिक च। अर साइकल मालिक बीपीएल स्कीम मा नि गणे सक्यांद।  जा भैर जा।
निखण्या दास - साब वीं साइकलौ हमन करण क्या च जब उक  दस मील तलक सड़क ही नि छन। 

अधिकारी - मि कुछ नि जाणदु।  हवलदार !  निखण्या दास  तैं भैरो रस्ता दिखावो ! हाँ ! त ग्राम प्रधान जी अब आप समिण बैठो !

ग्राम प्रधान - जी ब्वालो !

अधिकारी -प्रधान जी ! हम तै टारगेट मिल्युं च कि हरेक ग्राम सभा से द्वी  परिवार बीपीएल मा पंजीकृत हूण चएंदान । .
ग्राम प्रधान -द्वी परिवार बीपीएल लायक छैं छन ना।  ल्या  ऊंक कागजात !

अधिकारी (कागज पतर देखिक )-कागज तो बिलकुल सही छन।  सही माने मा बीपीएल लायक नागरिक।  कु कु छन यी परिवार ?

ग्राम प्रधान -एक म्यार भतिजु च अर दुसर सरपंच जीक साडु भाइक स्याळु च।   कागजात मा यी द्वी बिलकुल सहारा विहीन छन। 

अधिकारी -ठीक च।  हवलदार तैं  दक्षिणा दे द्वावो।  

ग्राम प्रधान हवलदार तैं कूण्याम लिजांद - हवलदार जी बीपीएल पंजीकरण की कथगा दक्षिणा च ?

हवलदार - ये मैना बिटेन दस हजार रुप्या प्रति पंजीकरण 

प्रधान - हैं ! पोर त पांच हजार रुप्या छौ 

हवलदार -प्याजौ भाव द्याख च ? कथगा बढ़ी ग्यायी ?

ग्राम प्रधान -ठीक च।  ल्या दस हजार रुप्या। 

हवलदार - अधिकारी जी !  प्रधान जी तैं द्वी बीपीएल सर्टिफिकेट दे द्यावा ! 

Copyright@ Bhishma Kukreti  17/11/2013 



[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य;सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य  श्रृंखला जारी ...]