उत्तराखंडी ई-पत्रिका की गतिविधियाँ ई-मेल पर

Enter your email address:

Delivered by FeedBurner

उत्तराखंडी ई-पत्रिका

उत्तराखंडी ई-पत्रिका

Monday, April 8, 2013

चलो ! प्रधान मंत्री पदौ दौड़ मा शामिल हूंला


गढ़वाली हास्य -व्यंग्य 
सौज सौज मा मजाक मसखरी 
हौंस,चबोड़,चखन्यौ 
सौज सौज मा गंभीर छ्वीं 
                               चलो ! प्रधान मंत्री पदौ  दौड़ मा शामिल हूंला             

                                       चबोड़्या - चखन्यौर्याभीष्म कुकरेती
(s = आधी अ )

 घरवळिन हुकुम दींद बोलि," तुम लोक सभा चुनौ लड़ो अर प्रधान पंत्री पदौ दौड़ मा शामिल ह्वे जावो।"
मीन बोलि," क्या ? कन कन घ्वाड़ा खेत रै गेन त ते डूंडी क्या बिसात?"
घरवळिन ब्वाल," नै नै ! तुम तैं दौड़म शामिल हुणि पोड़ल। द्याख नी कथगा छन दौड़ मा। इन लगणु च भाजापा या कौंग्रेस तै बहुमत नि मिलण तो क्वी तिसरि पार्टी को  ही प्रधान मंत्री बौणल।  "
मीन ब्वाल," क्या नवीन पटनायक अफु छोड़िक मे तैं समर्थन द्यालो?"
"हां उन त नवीन पटनायक ठंडो दिमागौ च , होशियार च कि अबि तलक भ्रष्टाचार का तगमा धारी नि ह्वाइ तो वो प्रधान मंत्री लैक च  पण जै तैं उड़िया नि आवो वै तैं हिंदी क्या आलि अर हिंदी बुलण नि आलि तो समजि  ल्यावो उ प्रधान मंत्री नि ह्वे सकुद। वैन तुम तै समर्थन दे दीण  "घरवळिक बोल छा।
मीन ब्वाल," चलो माना कि नवीन पटनायक  मै तै समर्थन दे भि द्याव तो ममता बनर्जी बैणि? क्या वा लैक नि च "
  घरवळिन समजाइ ," उन तो ममता बनर्जी प्रधान मंत्री लैक च, वींक बंगाल मा चलदी बि च। पुराणा खयालात की च कि गरीबों तै कुछ द्यावो पण इन नि बथावो कि पैसा धेला आल कखन?  पण वींको मिजाज कैको समज मा नि आंदो ! तो कौंग्रेस , भाजापा या समाजवादी पार्टी वळुन वीं तै समर्थन तो  नि दीण उल्टां वींको घोर विरोध करण । वीन  तुम तै समर्थन दे ही दीण।"
मीन अपण विचार बथैन," ओहो ममता बैणि अर नवीन भुला समर्थन दे बि द्याला तो अपण लालू प्रसाद यादव! लालू की टक तो प्रधान मंत्री कुर्सी पर कथगा दशवीं से च।"
घरवळिन निर्णय सुणाइ," लालू प्रसाद प्रधान मंत्री पद का लैक त छन अर पद का बान  कुछ बि कौरि सकदन,  कुछ बि तिकड़म भिडै  सकदन  पण चारा घोटाला को धब्बा अर मुलायम सिंह यादवन ऊं तैं प्रधान मंत्री पद का जिना दिखण बि नि दीण।"
मीन संशय से ब्वाल," तो नितीश कुमार क्या दौड़ मा शामिल नि होला?"
 घरवळिन म्यार संशय मिटै," देखो जु नीतेश कुमार तैं प्रधान मंत्री बणनो बान भाजापा क समर्थन की जरूरत ह्वावो तो नरेंद्र मोदी जन भाजापाइ नीतेश कुमार तैं प्रधान मंत्री बणान से त राइ। जख तलक कौंग्रेस को   समर्थन को सवाल च तो मुलायम सिंह यादव , पाशवान  अर लालू प्रसाद अफिक द्याखाल कि नीतेश कुमार प्रधान मंत्री कुर्सी से दूर ही रावन।"
मीन अपण मंतव्य समिण कार," तो जया ललिता  भुलि बि त प्रधान मंत्री पद का वास्ता दावा ठोक सकदी।"
  घरवळिन पत्रकारों तरां गणत कार अर ब्वाल," ठीक च माना कि जया ललिता भुलि  पर भ्रष्टाचार का कुछ केसेज छन पण जया ललिता  प्रधान मंत्री लैक छें च। पण ना तो भाजापा ना ही कौंग्रेस जया ललिता  पर भरवस करदी तो इन मा जया ललिता इ ना डीमके का कै नेता क प्रधान मंत्री बणनों क्वी चांस नी छन।"
मीन कुछ याद करिक ब्वाल," अर वो अपणा चंद्रा बाबू नायडू बि त प्राइम मिनिस्टरौ रेस मा छन।"
  घरवळिन ब्वाल," चन्द्रा बाबू नायडू बि प्रधान मंत्री लैक छन पण चूँकि ना ही भाजापा अर ना ही कौंग्रेस चालि कि नायडू पीऐम की कुर्सी मा बैठु तो मैं नि लगद चन्द्रा बाबू नायडू से डरणै जरूरत च।"
मीन तर्क दे," अर शरद पवार पैथर थ्वडा   राला?"  
  घरवळिन अपण तर्क दे," असल मा शरद पंवार पर क्वी बि राजनीतिग्य भरवस नि करदो तो समजि ल्यावो कि शरद पंवार प्रधान मंत्री कुर्सी दौड़ मा छें इ नि छन।"
  मीन ब्वाल," त्वै तैं पूरो भरवस च कि अबै दें क्वी अनजान चेहरा ही प्रधान मंत्री बौणल?"
   घरवळिन विश्ववास पूर्वक ब्वाल," हाँ  अबै दें कै डार्क हौर्सन ही प्रधान मंत्री बणन।"
मीन पूछ," तो त्यार  हिसाब से कख बिटेन  लोक सभा को चुनाव लड़न चयेंद?"
वींको बुलण छौ," जितण तो तुमन छ नी च तो कखि  बिटेन नी च। लोक सभा  चुनाव लड़णो  मतबल डार्क हौर्स की प्रतियोगिता मा शामिल होण। ह्वे सकुद च क्वी आधुनिक  हुमायूं तुम पर मेहरबान ह्वे जावो अर तुम तै एक दिनौ कुणि प्रधान मंत्री बणै द्यावो।"
     
      
Copyright @ Bhishma Kukreti   7/4/2013