हमखुणै बस छोड़ि गेनि, एक सोळि भैजी (हरीश जुयाल की कविता )

भैजी 

-------रचना -- हरीश जुयाल---

छैंदि बरखम तिसळि रैगे गौळि भैजी ।
अब पराण अपुडु़ ह्वैगे चोळि भैजी ।।

रयांसू का प्याट बण गिन लोग कीडा़ ।
हमल जब भी चूंड एक फोळि भैजी ।।

डाळि रीती कैरि गैनी गूणी बांदर ।
हमखुणै बस छोड़ि गेनि, एक सोळि भैजी ।।

पर्या पतळी का पक्यां माछौँ नि द्याखा ।
खूंडो बाडी़ पट्ट घूळो गोळि भैजी ।।

मन कु मैल सच्चै कु पाणिल ब्वगै द्यावा ।
अब धर्यूंच क्याजि गंगा -धौळि भैजी ।।