कौन बनेगा करोडपति ?

गढ़वाली हास्य व्यंग्य साहित्य

चबोड़ इ चबोड़ मा, हौंस इ हौंस मा

              कौन बनेगा करोडपति ?

                     चबोड्या- भीष्म कुकरेती

                अमिताभ बच्चन अर जु बि 'कौन बनेगा करोडपति' प्रोग्रैम का कारोबारी छन सब फोकट की बात करणा छन. अब बथाओ जनता तै सिखाणा छन बल ज्ञान से इ सब कुछ होंद. अर फिर करोडपति बणाणो बान यि लोग कथगा मेनत करवांदन , एस.एम्.एस कारो फिर फोन पर इ चिपक्याँ राओ अर फिर सवालूं जबाब द्याओ तब जैक ' 'कौन बनेगा करोडपति' वळ तुम तै बुलाला फिर वी सवाल जबाब अर फिर लाखों क्या करोड़ों मांगन एक कवी करोडपति बौणल. कैन करणाइ इथगा मेनत. मीन त नि करणाइ इथगा मेनत .

ज्ञान कि बात च त मै तै अब ज्ञान ह्व़े ग्याई कि मी तै करोडपति बणणो बान अमिताब बच्चन कि क्वी जरोरात इ नी च . अमिताब बच्चन से मिलण इ ह्वाओ त मी करोडपति बणणो बाद मीलि जौलु !

       अर म्यार दिमाग खराब हुयुं च जु मी अमिताभ बच्चन क प्रोग्रैम मा जौं अर इथगा खटकरम कुरु अर फिर ..

           अब अमिताभ बच्चन ज्ञान कि बात करणा छन त म्यरो ज्ञान बुल्दो कि करोडपति बणणो बान क्वी हौरी विशिष्ठ व्यक्तियुं या दिवतौं पूजा जादा फैदामन्द च बनिस्पत ये बेकार कु प्रोग्रैम मा भाग लीणो कु.

          अरे मै तै करोडपति बणणो गुर इ सिखण त मि सन १९५१ कु मुदगल केस, san १९५७-५८ कु मुंदडा डील या मालवीय -सिरजा उद्दीन केस कि फाइल नि पढ़लु जु मै बथाला कि कनै बगैर कुछ कर्याँ कन कैक करोड़ पति बणे सक्यांद

    

          अब जब मी तै करोडपति इ बणण ह्वाओ त मि पंजाब का मुख्यमंत्री भग्यान प्रताप सिंह कैरो कि आत्मकथा नि बंचलु . जैन भारत्वास्युं तै सिखाई कि कन कैक सौंग ब्युंत से करोडपति बणे जांद अर कैरों क ब्यूंत इथगा अस्कारी छन कि जवाहर लाल नेहरु सरीखा नेता बि कैरों क कुछ नि करी सकदा छ्या. त मि तै बौळया कुकरन काट्यु च कि अमिताभ बच्चन कि सला मानु अर मेनत का बल पर करोडपति बौणु. जब भग्यान कैरों हम तै सौंग रस्ता ब तै गेन त मि त वै रस्ता पर चललु कि ना जु करोडपति बणणो बान भौति सौंग ह्वाऊ ?

अर उन करोडपति बणणो कुछ कुछ टुटब्याग मि भग्यान बीजू पटनायक क जीवनी से बि सीखि ल्योलु.

      मेखुण त जवाहर लाल नेहरु भगवान् छन जौन यूँ कोंग्रेसी भ्रष्टाचार का पुजार्युं तै माफ़ कार अर अब मीमा यूंक जीवनी च जां से मि बि सरल तरीकों से करोडपति बणणो गुर सीखी सकुद. जै हो पंडित जवाहर लाल जी की! तुम यूँ तै माफ नि करदा छा त में सरीखा मनिख मा करोड़ पति बणणो इच्छा कन कैक पैदा होंदी. नेहरु जी आप धन्य छन.

         मि त इंदिरा गांधी जी क बड़ो भगत छौं . रोज देवी लक्ष्मी अर इंदिरा गांधी की मि पूजा दगड़ी करदु. अब नागरवाला केस को इतिहास पढ़न से मै तै बड़ो जोश आन्द की कन टुटब्यागुं अर दैवीय प्रदत्त कुकर्मो से क्वी बि करोड़पति बौण सकदु. हे भष्ट तरीकों की पोषक देवी इंदिरा जी त्वे तै सत सत प्रणाम .

           अर उ बोफोर्स रण भूत कि पूजा बि आप अर मै तै करोड़ पति बणै सकदी त क्या जरोरत च पसीना बगाण से .

           मि त भग्यान नर सिम्हा राव की बि पूजा रोज दिन मा करूद अर बाबा नर सिम्हा राव क प्रतीक चिन्ह 'सूटकेस' तै मा सरस्वती k हंस जन समजदो. सूटकेस अर नर सिम्हा राव जी मै तै हर घड़ी याद दिलान्दन की दुनिया मा मेनत से पैसा नि कमाण चएंद पन लम्पट गिरी इ पैसा कमाणो सबसे उत्तम पथ च. फिर मि नर सिम्हा राव क नौन्यालुं करतबों तै रोज याद करदु की ईं दुनिया मा जब बि बाबु बड़ो असरदार र ओहदा मा बैठो ना कि अरबों रूप्या कमाणो छंद अपणो आप ऐ जांद.. मौनी बाबा नर सिम्हा राव अर ऊंका प्रतीक चिन्ह सूटकेस तै रोज दिन मा सुमरिण करण से आदिम मा करोड़ पति बणणो सुगम रीति अफिक ऐ जान्दन. मौनी बाबा नर सिम्हा क दगड दाड़ी वळ दिवता शिबू सरीन, स्टौक मार्केट कु दिवता हर्षद मेहता अर हौरी किकबैक दिवतौं क सुमरिण जरूरी होन्दन त मि यूँ कि बि पूजा करदु.

          भारत मा अब तेतीस करोड़ किकबैक देवी दिवता ह्व़े गेन .यूँ दिवतौं मा जौर्ज फर्नाडीज, लैला कबीर, जया जेटली, बंगारू लक्ष्मण , जया ललिता. करुणा निधि क नौनि-नौन्याळ, यदुरप्पा, अशोक चौहाण, ए.राजा, कलमाड़ी, आदि आदि मुख्य दिवता माने जान्दन . अर अब मि जगवाळ मा छौं कि कोयला खदानों अर हैड्रो इलेक्ट्रिक को बांधों से बि हजारों किकबैकी दिवता अवतरित हूण वाळ छन. मि त यूँ किकबैकी दिवतौं क फोटो कि पूजा रोज करदु. .

              चूंकि इथगा करोड़ो दिवतौं पूजा करण मै सरीखा आम मनिखो कुण कठण च त कपिल सिब्बल अर अरुण जेटली क बुल्युं पर चलणु छौं .कपिल सिब्बल अर अरुण जेटली क आज्ञानुसार मि अच्काल करोडपति बणणो बान हर मैना औंसी (आमाव्स्य) क रात बरा बजि 'असत्य नारायण दिवता' क पूजा करदु. कुतर्क शाश्त्र का प्रखर आचार्य कपिल सिब्बल अर कुतर्क शाश्त्र का महा विज्ञानी अरुण जेटली क आख्यानो से पता चौल कि 'मैना मा एक दिन 'असत्य नारायण ' कि पूजा कारो त सभी किकबैकी दिवतों की पूजा अफिक ह्व़े जांदी. 'असत्य नारायण पूजा' का प्रसिद्ध व्याखाकर / टिपणीकार मनीष तिवारी अर रवि शंकर प्रसाद सिंग न बि यो इ बताई कि जो बि भेंट आप 'असत्य नारायण ' क ठौ मा धारो वा त भेंट अफिक तेतीस करोड़ किकबैकी दिवतौं मा पौंछि जांद.

        त मि अमिताभ बच्चन जी से गुजारिस करणु छौं कि मि त अब असत्य नारायण भगवान कु भक्त बणि ग्यों त आप मेरो भरवस नि रैन कि मि आपक प्रोग्रैम मा भाग ल्यूं.

                जै असत्य नारायण की ! जौं कि भक्ति मै तै अफिक करोड़ पति बणालि .

Copyright@ Bhishma Kukreti 7/9/2012