कैन ब्वाल रूप्या डाळ पर नि लगदन ?

गढ़वाली हास्य व्यंग्य साहित्य

चबोड़ इ चबोड़ मा, हौंस इ हौंस मा

                            कैन ब्वाल रूप्या डाळ पर नि लगदन ?

 

                        चबोड्या- भीष्म कुकरेती

                 ब्वाळि इकीस सितम्बरौ खुणि ब्यखुन दै हमर प्रधान मंत्री जी न अपण रैबार मा बोलि बल रूप्या डाळ पर नि लगदन . बिचारा मनमोहन सिंग जी ! विचारों तै पता इ नी च बल रूप्या डाळ पर बि लगदन. अब विचारा मनमोहन जी न त नरसिम्हा राव राज मा हर्षद मेहता क सूटकेसुं से रूप्या बौगद द्याख त वूं क्या पता कि भारत मा सूटकेसुं छोडि डाळु पर बि रूप्या लटकदन अब हमर इख बुल्दन बल सौणौ मैना मा जनम ह्वाओ त सबि चीज हौरी हौर दिखेंद. मनमोहन जीन त महाराष्ट्र मा कोंग्रेसी राज मा तेलगी स्टाम्प केस बिटेन रूप्या झड़दा देखिन त वून कन कैक जाणन कि डाळु पर बि रुप्यौ झुम्पा लगदन.

            मनमोहन सिंग जीन त कोंग्रेसी मुख्यमंत्री अशोक चौहाण का राज मा शहीदों क परिवारु कुणि बण्यु कूड़ आदर्श बिटेन रुप्यौ पौ बारा द्याख त बिचारा क्या सूंगन कि कूड़ो छोड़िक डाळु पर बि रुप्यौ पात हून्दन .

             अब जनो दगुड़ करिल्या त दगड्या क बतायुं तै इ सब कुछ समजे जांद , अब जब मनमोहन जीन लालू प्रसाद जीक दगुड़ कार त मनमोहन सिंग जी सम्ज्दन कि घास/चारा पर इ रूप्या चिपट्या रौंदन. अब मनमोहन जी लालू जीक चस्मा से द्याखाल त कनै द्याखाल कि हरियाणा विधान सभा मा पाँच मार्चौ २०१२ खुणि बड़ो घ्याळ ह्व़े छ्याओ कि बौण अर हर्बल पार्क मा बि मिनिस्टरों तै छ्कैक रूप्या मीलि जान्दन.

                   अब बिचारा मनमोहन जी कॉमन वेल्थ गेम मा रूप्या हगणो प्रतियोगिता दिखण मा इ व्यस्त राला त ऊं तै कनै दिख्याल कि महाराष्ट्र क नागपुर सर्कल अर वर्धा सर्कल मा २०११ अर २०१२ मा जंगळो मा डाळु अर डाळ लगांद दै रुप्यों बरखा ह्व़े छे या क्या ह्व़े छौ धौं !

            अब मनमोहन जी ह्वाई देस का प्रधानमंत्री त वु से हम उमेद बि नि कौरी सकदवां कि वो जाणि ल्यावन कि महाराष्ट्र मा इ भौत सा जगा सरकारी बौण की जगा मा बडी बडी बिल्डिंग खड़ी ह्व़े गेन अर याँ से हम त जाणि गेवां कि जंगळ मा रुप्यौ खान छन पण कुनगस च कि पी.ऍम. ओ मनमोहन सिंग जी तै या बडी बात नि बतांदु बल जंगळु मा रुप्यौ खांडि बि छन.

          अब बिचारा मनमोहन सिंग जी गाँ मा त राई नी छन त ऊन कनै बिंगण बल डाळु पर बि रूप्या खिल्दन , जरा एक डाळ काटणो अर्जी द्यावदी त जाणि जैल्या कि प्रधान जी अर पटवरि जीक ड़्यार चौक मा कन डाळु से फल फ्रूट झड़दन.

              अब मनमोहन जी कोयला खदानों धूळ साफ़ कर न मा यि राला त ऊं तै कंजरवेटर, डी.ऍफ़.ओ, रेंजर , फोरस्ट औफ़िसरो शानदार कोठी अर उंकी जनान्यु क जेवरात दिखणो मौक़ा इ नि मिलुद , जु एक दै मनमोहन जी जंगल विभाग का अधिकार्युं कोठी , जेवरात अर ऊंका रिश्तेदारु बैंक बैलेंस देखि ल्यावन त फिर कबि बि मनमोहन जी न नि बुलण , पैसे पदों पर नही लगते है'.

               जैदिन मनमोहन जी जंगल विभाग का अधिकार्युं कोठी , ठाट बाट, जेवरात अर ऊंका रिश्तेदारु बैंक बैलेंस देखि ल्याला त फिर ऊन हमेसा बुलण बल भारत मा पैसा डाळु पर बि लगदन.

Copyright@ Bhishma Kukreti 22/9/2012