कूलौ बाट मा सिंचाई साधनुं प्रदर्शनी

गढ़वाली व्यंग्य साहित्य

चबोड़ इ चबोड़ मा , हौंस इ हौंस मा

                     कूलौ बाट मा सिंचाई साधनुं प्रदर्शनी

                               चबोड्या: भीष्म कुकरेती

[व्यंग्य साहित्य; गढ़वाली व्यंग्य साहित्य; उत्तराखंडी व्यंग्य साहित्य; मध्य हिमालयी व्यंग्य साहित्य; हिमालयी व्यंग्य साहित्य; उत्तर भारतीय व्यंग्य साहित्य; भारतीय व्यंग्य साहित्य; एशियाई व्यंग्य साहित्य; जसपुर वासी द्वारा गढ़वाली व्यंग्य साहित्य; ढांगू वासी द्वारा गढ़वाली व्यंग्य साहित्य; गढ़वाली द्वारा गढ़वाली व्यंग्य साहित्य; उत्तराखंडी द्वारा गढ़वाली व्यंग्य साहित्य; मध्य हिमालयी द्वारा गढ़वाली व्यंग्य साहित्य; हिमालयी द्वारा गढ़वाली व्यंग्य साहित्य; उत्तर भारतीय द्वारा गढ़वाली व्यंग्य साहित्य; प्रवासी द्वारा गढ़वाली व्यंग्य साहित्य; गढ़वाली प्रवासी द्वारा गढ़वाली व्यंग्य साहित्य; प्रवासी उत्तराखंडी द्वारा गढ़वाली व्यंग्य साहित्य;प्रवासी मध्य हिमालयी द्वारा गढ़वाली व्यंग्य साहित्य;प्रवासी हिमालयी द्वारा गढ़वाली व्यंग्य साहित्य;प्रवासी उत्तर भारतीय द्वारा गढ़वाली व्यंग्य साहित्य;मुंबई वासी द्वारा गढ़वाली व्यंग्य साहित्य;महाराष्ट्र वासी द्वारा गढ़वाली व्यंग्य साहित्य लेखमाला ]

ब्याळि जैबरी महाराष्ट्र मा नेशनल कॉंग्रेस्यूं स्पोंसर्ड राजनैतिक नाटक - स्वांग चलणु छौ , मि तैबरी एक गाँ मा कूलौ बाट (नहर वाला रास्ता) मा सिंचाई साधनुं प्रदर्शनी दिखणु छौ. गाइड बड़ो भलो मनिख छौ अर सौज सौज कौरिक सब बिंगाणु छौ.

गाइड- या च सिचाई साधनुं प्रदर्शनी क मुख्य द्वार चूंकि सिंचाई विभाग मा बजट रयुं नी च त जु इ प्रदर्शनी क द्वार छन वो खन्द्वार बण्या छन.

मि- अर यि सिंचाई प्रदर्शनी तौळ जु पौ च वो बि त खंड मंड दिख्याणा छन.

गाइड- हाँ यू प्रतीकात्मक प्रदर्शनी च त इखमा आप तै प्रतीकों से बिंगण पोडल कि महाराष्ट्र मा सिंचाई विभाग कन च. उन क्वी जादा दिमाग लगाणो जरूरत नी च आपक समज मा अफिक ऐ जालो. जब तथाकथित लाटा काल़ा जन मनिख समजी जान्दन त आप बि समजी जैल्या .

मि- जी यि क्या च ? ग्लोब बि च अर महाराष्ट्र कु नक्सा बि च ?

गाइड- यू च ग्लोब अर या च महारासत्रा. अर द्याखो यू जु नीलो रंग दिखाणु च कि हरेक देस या जगों मा बांधु ब्वालो या डामुं घनत्व क्या च ?

मी- अरे वाह ! भौत बढ़िया ! ब्रेवो महारास्ट्र ! घनत्व क हिसाब से त महाराष्ट्र भारत का हौर प्रदेसुं इ ना बकै देसूं से भौत अग्वाड़ी च ?

गाइड- जी ! महारास्ट्र प्रदेस ना डामुं प्रदेस च. इख जमीन क प्रति एकड़ क हिसाब से सबसे जादा डाम छन.

मि- ब्रेवो! महारास्ट्र ! अर यि रंगदार माटू से बणयूँ चीज च ? जमीन बि दिख्याणि च अर सिंचित जमीन ब दिख्याणि च .

गाइड- जी ! ये प्रदर्शन मा हमन इ दिखाई कि महारास्ट्र मा पणचर ( सिंचित) जमीन कथगा च अर उखड़ (गैर सिंचित ) जमीन कथगा च अर फिर हमन देस मा हौर प्रदेसुं मा पणचर जमीन अर उखड़ जमीन कु अनुपात बि दिखायुं च.

मि- अछा जु यू नीलो रंग च यू पणचर जमीन कि निसाणि च अर यू खरसण्या रंग उखड़ जमीन कि निसाणी च .

गाइड- बिलकुल सही .

मि- हैं पण यि क्या ! महारास्ट्र मा डाम सबसे जादा , पण महाराष्ट्र मा पणचर जमीन अर उखड़ जमीन को भेद हौर प्रदेसुं से जादा च .मतबल डामों अनुपात मा पणचर जमीन हौर प्रदेसुं से त कम च ?

गाइड- भै ! अब पूठ धूणो, बदन धूणो , खाणक बणाणो अर उद्योगुं बान पाणि नि चएंद . यू बि त एक तरां सिंचाई इ च कि ना?

मि- मतबल ..?

गाइड - हाँ हाँ बजट आंदो सिंचाई कु अर खर्च हूंद शाहरू या उद्योगुं बान पाणि इंतजाम मा .

मि- यू गोरख धंधा म्यार बिंगण से भैर च .

गाइड- भारत मा भौत सि बथ त भगवानौ बिंगण मा बि नि आन्द कि वैकी बणईं दुनिया मा हूणु क्या च.

मि- अरे यू क्या च एक जगा मा फाइल पर फैलूं चट्टा लगणु च, फाइल सरकणो नाम नि लीणा छन अर हैंक जगा मा फाइल सरकणो स्पीड ध्वनि गति से बि बिंडी च

गाइड- हाँ ! यू जु फाइल नि सरकणा छन ओ बथान्दन कि आम दै सरकारी फाइल सरकद इ नि छन. पण जब अपणा अजीत पंवार जी सिंचाई मंत्री छया त डैम /बाँध पास करणो फाइल फटाफट पास हुंदी छे.

मि- इथगा अंतर किलै ?

गाइड - या बात आखिरी बिन्गौला कि किलै पंवार जेक राज मा फाइल इथगा तेजी से अटकदि छे.

मि- अर यू क्या च ? हैं सोना चांदी क बडी बडी इमारत ?

गाइड- यि प्रतीकात्मक इमारत छन. अर यि सोना चांदी क ईमारत सिंचाई मंत्री क परिवार वाळु, रिश्तेदारों, राजनैतिक दगड्यों अर सिंचाई विभाग का ठेकेदारों क छन .

मि- अर यि डामुं बिटेन पाणी जगा काळो काळो रूप्या स्विट्जर लैंड क तरफ जाणु च . यू क्या च ?

गाइड- ओहो ! यू सौब तुम पड्या पद्या लिख्यां लोगूँ दिमागी फितूर च, भरम च अर आम जनता तै यू नि दिख्यांद . अग्वाड़ी बढ़ो .

मि- अरे यू क्या च . ये सिंचाई विभाग का अखाड़ा मा भौं भौ किस्मौ नेता लड़णा छन . क्वी कुस्ती लड़णो च , क्वी जुडो , क्वी थमळी से वार करणो च, कखि एक दुसरौ दगड वाक् युद्ध चलणु च , कखि चरित्र पर दाग लगाणो खेल चलणु च .यि सौब क्या च /

गाइड- यू विधान सभा क एक प्रतीक च जख सरकारी अर विरोधी दल का नेता आपस मा प्रजातंत्री खेल खिलदन अर जनता देखिक खुस होंदी.

मि- अर यि पर्दा पैथर बि त कुछ चलणु च ?

गाइड- नि द्याखो ! हाँ ! नि द्याखो तुमन बेहोश ह्व़े जाण

मि- अरे जु नेता भैर लड़ना छया यि सब इख पर्दा भितर एक बडी थाळि म बैठ्या छन अर एक हैंकाक प्लेट मा बोटी सोटी दगड़ी खाणा खाणा छन .

गाइड- याने कि यि नेता एकी थाळि चट्टा बट्टा छन अर खान्द दै इ सौब एक ह्व़े जान्दन.

मी- अर अर ! यि क्या च यि खम्बा क्या छन कुज्याण कथगा खम्बा छन धौं ! अर यूँ मा सन बि लिख्युं च कि कु खम्बा कै सन मा घटे गे छौ

गाइड- यि खम्बा स्वतंत्रता बाद सिंचाई विभाग मा भ्रस्टाचार पता लगाणो बान जथगा बि कमिसन बैठीं वांक प्रतीक छन अर यि खम्बा सबूत छन कि हमारा नेता बड़ा पाक साफ़ छन. आज तक कै बि कमीसन से क्वी नेता कबि बि नि पकड्याई

मी- अर यि मर्तण्या लोग कु छन जौं मा सिरफ़ साँस बाकी च ?

गाइड- या इ त भारत की जनता क दशा च

Copyright@ Bhishma Kukreti 26/9/2012

[व्यंग्य साहित्य; गढ़वाली व्यंग्य साहित्य; उत्तराखंडी व्यंग्य साहित्य; मध्य हिमालयी व्यंग्य साहित्य; हिमालयी व्यंग्य साहित्य; उत्तर भारतीय व्यंग्य साहित्य; भारतीय व्यंग्य साहित्य; एशियाई व्यंग्य साहित्य; जसपुर वासी द्वारा गढ़वाली व्यंग्य साहित्य; ढांगू वासी द्वारा गढ़वाली व्यंग्य साहित्य; गढ़वाली द्वारा गढ़वाली व्यंग्य साहित्य; उत्तराखंडी द्वारा गढ़वाली व्यंग्य साहित्य; मध्य हिमालयी द्वारा गढ़वाली व्यंग्य साहित्य; हिमालयी द्वारा गढ़वाली व्यंग्य साहित्य; उत्तर भारतीय द्वारा गढ़वाली व्यंग्य साहित्य; प्रवासी द्वारा गढ़वाली व्यंग्य साहित्य; गढ़वाली प्रवासी द्वारा गढ़वाली व्यंग्य साहित्य; प्रवासी उत्तराखंडी द्वारा गढ़वाली व्यंग्य साहित्य;प्रवासी मध्य हिमालयी द्वारा गढ़वाली व्यंग्य साहित्य;प्रवासी हिमालयी द्वारा गढ़वाली व्यंग्य साहित्य;प्रवासी उत्तर भारतीय द्वारा गढ़वाली व्यंग्य साहित्य;मुंबई वासी द्वारा गढ़वाली व्यंग्य साहित्य;महाराष्ट्र वासी द्वारा गढ़वाली व्यंग्य साहित्य लेखमाला ]