साकेत बहुगुणा अर माला राज्य लक्ष्मी शाह मध्य बातचीत

हंसोड्या , चुनगेर ,चबोड़्या -चखन्यौर्या -भीष्म कुकरेती     
  

(s =आधी अ  = अ , क , का , की ,  आदि )

 मि सुचणु थौ कि टिहरी लोकसभा प्रत्यासी माला राज्य लक्ष्मी शाह अर साकेत बहुगुणा जब चुनाव  बगत या बाद मा मील होला तो दुयुंक क्या क्या बात ह्वे होलि।  

साकेत बहुगुणा - गुड मॉर्निंग क्वीन औंटी !

माला राज्य लक्ष्मी शाह - ये बहुगुणा खानदान कु चिराग ! शरम नि आदि बौ कुण आंटी बुलंद ?अबि मेरी उमर इ क्या च ?

साकेत बहुगुणा -अब बुबा  आपौकुण बैणि बुल्दन तो  …

माला राज्य लक्ष्मी शाह -क्या हाल छन ?

साकेत बहुगुणा - बुरा हाल छन आँटी  न बौ ना आंटी।  तुमर क्या हाल छन।
माला राज्य लक्ष्मी शाह- म्यार बि बुरा हाल छन यूँ टिरयाळु अर रमोलटाऊँ  चक चक सुणी।  काश मि बनारस से लड़दु।  

साकेत बहुगुणा -काश कॉंग्रेस इलाहाबाद से जीति सकदी तो मी बि इलाहबाद से चुनाव लड़दु। 
 माला राज्य लक्ष्मी शाह -देख ना ! एक चुनाव सभा मा जनता मि तैं पुछणी कि महारानी जी ! टिहरी मा शिक्षा का कुहाल छन।

साकेत बहुगुणा -हाँ मि तै बि ताना दीणा छा कि बुबाजीन शिक्षा मा सुधार का वास्ता क्या कार ?

माला राज्य लक्ष्मी शाह -अरे ! अच्छी शिक्षा चयाणी च त अपण बच्चों तैं लंदन भ्याजो  -देहरादून भ्याजो। 

साकेत बहुगुणा -हाँ ! अपण बच्चो शिक्षा की जुमेवारी अफिक  नि ले सकदन यी टिर्याळ -उत्तरकाशी का लोग ! 

माला राज्य लक्ष्मी शाह -हाँ ! अर पता च एक जगा त लोग बुलण बैठि गेन कि गूणी -बंदरों बजै से खेती नि हूणी च। 

साकेत बहुगुणा -हाँ खेती करणै जरुरत ही क्या च ? अरे बजाराम इथगा बढ़िया क्वालिटिक बासमती मिलदी , पंजाब -हरयाणा क ग्युं मिल्दन तो बजार बिटेन अनाज खरीदी करद मोणी (गला ) टूटि गे यूं टिहरी वाळुक ? हम बि त बजार बिटेन अनाज खरीदंदा कि ना ?
माला राज्य लक्ष्मी शाह- अर अब त ऑलिव ऑइल बि बजार मा उपलब्ध च , बिस्किट छन, ब्रेड छन , क्या नि मिलदु बजार मा ? बजार जावन अर जु चयाणु च खरीद करिक ले आवन।  

साकेत बहुगुणा -हद त तब ह्वाइ जब एक जगा लोग सिंचाई वास्ता पाणि की मांग करण बैठि गेन। 

माला राज्य लक्ष्मी शाह -यूं वोटरूं शरम ल्याज बि हर्चि गे अरे उख दिल्ली मा लोगुं तै पीणो पाणि नि मिलदो अर यूं तैं टिहरी -उत्तरकाशी मा कुल्याणो पाणि चयाणु च। 

साकेत बहुगुणा -हद ह्वे गे हद।  पता च कुछ धुर्या मांग करणा छा कि गढ़वाली भाषा बचाणो कुछ कारो। 

माला राज्य लक्ष्मी शाह -हाँ ! जब हिंदी या अंग्रेजी से काम चल जांद तो तीसरी भाषा की क्या आवश्यकता ?

साकेत बहुगुणा -बड़ा ऐन गढ़वाली भाषा बचाण वाळ।  अरे सरकार उर्दू पर खर्चा  कारली कि बेकार की गढ़वाली भाषा पर ? 

माला राज्य लक्ष्मी शाह -वी त मी बि बुलद कि आज संस्कृत बचाणो आंदोलन हूण चयेंद तो यी बेकार का लोग गढ़वाली भाषा की बात करदन।  हम दुयुं तैं गढ़वाली नि आदि तो क्या हमर  टट्टी -पिसाब नि खुलद क्या ?

साकेत बहुगुणा -पता च एक जगा लोग बुलणा कि गढ़वाल से पलायन हूणु च।
माला राज्य लक्ष्मी शाह- बेवकूफ लोग ! अरे गढ़वाल से लोग भैर नि जाला तो भारत मा भंडमंजों अर रसोईयों कमी नि पोड़ि जाली ? 

साकेत बहुगुणा -वी त मी बि बुंलद। पता च कुछ लोग बुलणा छा कि सरकारी अस्पतालुं  मा दवै बि नि छन अर डाक्टर बि नि छन।
 माला राज्य लक्ष्मी शाह -मुफतखोर छन जी  सब मुफतखोर !

साकेत बहुगुणा -हाँ बीमारी इलाज का वास्ता देहरादून मा , दिल्ली मा नामी डाक्टर छन , प्राइवेट नर्सिंग होम छन।  ऊख जैक इलाज नि करै सकदन इ लोग ?

माला राज्य लक्ष्मी शाह -अजी सब तैं मुफ्त की दवै चयाणी छन , लोभी , बिलंच कहींके 

साकेत बहुगुणा -अच्छा यु श्रीदेव सुमन क्वा च ?

माला राज्य लक्ष्मी शाह -ह्वाल क्वी ग्राम प्रधान या आम आदमी पार्टीक क्वी नेता !

साकेत बहुगुणा -नै नै ! लोग मि तै पुछणा छा कि श्रीदेव सुमन की मूर्ति टुटणी च। 
माला राज्य लक्ष्मी शाह- कसम से मि तै नि पता।  ह्वे सकुद च कि क्वी रामतीर्थ का तरां महात्मा रै होलु। 

साकेत बहुगुणा -अब क्या प्रोग्राम च ?
माला राज्य लक्ष्मी शाह -मि त चुनाव रिजल्ट आण तक शिमला घुमणो जाणु छौं।  अर तू ?

साकेत बहुगुणा -मि सुचणु छौं मुंबई ह्वेक ऐ जौं।  दियर इज मोर इंज्वॉयमेंट इन मुंबई।

माला राज्य लक्ष्मी शाह -दैट्स हंड्रेड पर्सेंट राइट।  बाई बाई !

साकेत बहुगुणा -बाई बाई !

Copyright@  Bhishma Kukreti  11/5//2014 
.
*कथा , स्थान व नाम काल्पनिक हैं। 
[गढ़वाली हास्य -व्यंग्य, सौज सौज मा मजाक  से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  द्वारा  जाती असहिष्णुता सम्बंधी गढ़वाली हास्य व्यंग्य; ढांगू वालेद्वारा   पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले द्वारा   भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले द्वारा   धर्म सम्बन्धी गढ़वाली हास्य व्यंग्य;पौड़ी गढ़वाल वाले द्वारा  वर्ग संघर्ष सम्बंधी गढ़वाली हास्य व्यंग्य; उत्तराखंडी  द्वारा  पर्यावरण संबंधी गढ़वाली हास्य व्यंग्य;मध्य हिमालयी लेखक द्वारा  विकास संबंधी गढ़वाली हास्य व्यंग्य;उत्तरभारतीय लेखक द्वारा  पलायन सम्बंधी गढ़वाली हास्य व्यंग्य; मुंबई प्रवासी लेखक द्वारा  सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखकद्वारा  सरकारी प्रशासन संबंधी गढ़वाली हास्य व्यंग्य; भारतीय लेखक द्वारा  राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; ढोंगी धर्म निरपरेक्ष राजनेताओं पर आक्षेप , व्यंग्य , अन्धविश्वास  पर चोट करते गढ़वाली हास्य व्यंग्य, राजनेताओं द्वारा अभद्र गाली पर हास्य -व्यंग्य    श्रृंखला जारी  ]