मि तैं बि सेफ सीट चयाणि च

चुनगेर ,चबोड़्या -चखन्यौर्या -भीष्म कुकरेती        

(s =आधी अ  = अ , क , का , की ,  आदि )

                   अजकाल 2014 का आम चुनाव मा सेफ सीट की बिंडी छ्वीं लगणा छन।  कॉंग्रेसी नेता राज्य सभा तै ही सेफ मानणा छन तबि त कॉंग्रेस का लोकप्रिय नेता (सोनिया जीक आँख्युं मा ) पी सी चिदम्बरम राज्य सभा की सुरक्षित सीट मांगणा छन।  कपिल सिब्बल बि जाणदा छन विरोधी वकील तैं तर्क मा छकाण अलग बात च या संसद मा भैर बटे समर्थन दीण वाळ पार्टी तैं पनाण -बौगाण  अर विरोधी दल तैं तर्क -कुतर्क से थंचकाण अलग बात हूंद अर चादनी चौक दिल्ली की सीट से दुबर जितण याने जनता तैं दुबर ठगण बड़ो कठण काम च।  इलै कपिल सिब्बल क्वी सेफ सीट खुज्याणा छन।  इनि क्रिकेट से जादा क्रिकेट कमेंटरी का धुरंधर अर टीवी शो मा अट्टाहस करण वाळ नवजोत सिंग सिद्धू बि सेफ सीट की मांग करणा छन पर सीट बि कख मिलणी च दिल्ली मा। जैं दिल्लीन  पृथ्वीराज चौहाण तैं माफ़ नि कार , जैं दिल्लीन मुग़ल बादशाह बहादुर शाह तैं रंगून जोग कार , जैं दिल्लीन शीला दीक्षित तैं केरल कु पाणी पीणो मजबूर कार वा दिल्ली राजनीती मा लोगुं आकांक्षा की साफ़ अवहेलना करण वाळ सिद्धू तैं क्या अंगीकार कारली यो तो नरेंद्र मोदी की हवा ही बताली।  हवा तो भुवन चन्द्र खंडूरी की उत्तराखंड मा बि चलणी छे अर हवा चलाण वाळ ही हार गे।  इलै नरेंद्र मोदी की हवा ना सुनामी , हरिकेन हूणो बाद बि बड़ा बड़ा नेता लखनऊ , वाराणसी सीट नि छुड़ण चाणा छन। लोग इन बुलणा छन बल ममता सेफ च , जय ललिता सेफ च , मायावती सेफ च , पटनायक सेफ च, पंवार पुत्री सुलेखा सेफ च ।  पर चुनाव मा क्या से क्या ह्वे जांद यु पुछणाइ तो हैदराबाद जैक चन्द्र बाबू नायडू तैं पूछो , लालू प्रसाद यादव तैं पटना जैक पूछो जु इथगा बड़ा किंग मेकर छ्या अर आज सेफ नि छन। 
                     सेफ त बिचारो रॉबर्ट बाड्रा बि नी च।

           दिखे जाव तो  सेफ सीट की खोज मा   हम सब ही दौड़ना  छंवां।  अमेरिका जु अफु तैं तकनीक मा सब्युं बाप समजदु वू बि सेफ नि चितान्द।  चपड़ासी बि सेफ विभाग चांदु जख सिर्फ ऊपरी कमाई ही ह्वावो।  कलर्क इन सेफ सीट की खोज मा रौंद जख सीणो , घाम तापणो मौक़ा बि खूब ह्वावो अर रिसवत खाणो क्वी रोक टोक नि ह्वावो।  अधिकारी घूस की रकम लुकाणो इन सेफ की खोज मा छन जैं सेफ पर विजिलेंस विभाग की नजर नि पोड़।
               अजकाल सेफ त पृथ्वी बि नी च। बिचारी पृथ्वी ! 

            हम ये लोक की कम चिंता करदवां पण स्वर्ग लोक मा सुव्यवस्थित सीट बुक कराणों बान भौत सा कुकर्म करदां अर ब्यालौं  , बुगठ्यौं , कुखड़ो की अमानवीय बळी चढौन्दा । 

             सुव्यवस्थित सीट की चिंता कै तैं बि चैन से नि सीण दींदी। 

       आपक क्या हाल छन ? आप तैं सेफ सीट मीलि गे कि ना ? 

           

Copyright@ Bhishma Kukreti  13/3/2014 

*कथा , स्थान व नाम काल्पनिक हैं।  
[गढ़वाली हास्य -व्यंग्य, सौज सौज मा मजाक  से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  द्वारा  जाती असहिष्णुता सम्बंधी गढ़वाली हास्य व्यंग्य; ढांगू वाले द्वारा   पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले द्वारा   भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले द्वारा   धर्म सम्बन्धी गढ़वाली हास्य व्यंग्य;पौड़ी गढ़वाल वाले द्वारा  वर्ग संघर्ष सम्बंधी गढ़वाली हास्य व्यंग्य; उत्तराखंडी  द्वारा पर्यावरण संबंधी गढ़वाली हास्य व्यंग्य;मध्य हिमालयी लेखक द्वारा  विकास संबंधी गढ़वाली हास्य व्यंग्य;उत्तरभारतीय लेखक द्वारा  पलायन सम्बंधी गढ़वाली हास्य व्यंग्य; मुंबई प्रवासी लेखक द्वारा  सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक द्वारा  सरकारी प्रशासन संबंधी गढ़वाली हास्य व्यंग्य; भारतीय लेखक द्वारा  राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; ढोंगी धर्म निरपरेक्ष राजनेताओं पर आक्षेप , व्यंग्य , अन्धविश्वास  पर चोट करते गढ़वाली हास्य व्यंग्य    श्रृंखला जारी  ]