नेतागिरी का कु-करतबी जागर

नेतागिरी का कु-करतबी जागर

१-जागर को पवांण (शुरवाती पूजा)

जै जस दियां ये , जै जस दे हाई कमांड माता

जै जस दे प्रजातंत्र को नाम पर खानदानी राज को दिवता

जै जस दे जन सेवा का नाम पर जनता तैं ठगण वाल़ू दिवता

जै जस दे है कमांड मा बैठ्युं युवराज दिवता

जै जस दे पंचनाम दिवता

जै जस दियां -ठगी , परपंच , मक्कारी , स्वारथ , कुर्सी की भूख का पंचनाम दिवता ए

२- बिघन दूर करणो जागर

हाई कमांड का बड़ा बड़ा नेता - घडी घडी का बिघन टाळ

प्रजातंत्र का नाम पर खानदानी माता का जाया , तू बिघन टाळ

परपंच को खेत्रपाल प्रताप सिंग कैरों , आया राम गया राम की धरती हरयाणा त्वे तैं नमस्कार

पार्टी का नाम पर चन्दा बाज तेरो सुमरिन

पैलो सुमरिन करदो मै भ्रष्टाचार की देवी

दूजो सुमरिन करदो मै अनाचार की देवी

३- जागरण का दिवता

चुनाव का परब जाग , गौ स्वरुप वोटर जाग

धर्मस्वरूप संसदीय जाग, ठाटबाट को कांठा जाग

भानुपंखी हवाई जाज की फोकट की जातरा जाग

चमचों की भीड़ जाग , बेशर्मी की होड़ जाग

मथि वाळ तैं पुळयाँण बिरोध्युं तैं जुत्याण सीख रे बाबा

जनमुखी का मुखोटा पैरंण सीख रे बाबा, भितर बिटेन जन बिरोधी का अवगुण सीख रे बाबा

दिवाकर भट्ट की आत्मा जाग रे बाबा , जै डाळी तैं लगाई वीं डाळी तैं काटण सीख रे बाबा

पोखरियाळ की जिन्दी आत्मा जाग , कोशियारी की जिन्दी आत्मा जाग , दुसर तैं सी एम् की कुर्सी मा नि बैठण दीणे कौंळ सीख रे बाबा

सी एम् , पी एम् की कुर्सी पर सदाब्रत टक्क लगाण सीख रे बाबा

भारत मुखी का मुखोटा पण स्विस बैंकमुखी का कुढब सीख रे बाबा

ज़ात पाट का नाम पर वोट -भीख मांगण सीख रे बाबा

भारत तैं जात पांत , भासा का नाम पर लड़ाण का पैंतरा सीख रे बाबा

चुनाव मा गुल़ादंगी का हथियार चलाण सीख रे बाबा

जु मि कुरू त वो ठीक , जु बिरोधी कारन तो वो सब गलत , बिरोध्युं पर बेबजै लांछन भगार लगाण सीख रे बाबा

लालू यादव की जिन्दी आत्मा जाग , प्रजातंत्र बचाणो बान कज्याण तैं मुख्यमंत्री बणाण सीख रे बाबा

मुलायम सिंग की जिन्दी आत्मा जाग , जु हैंक पर गोळी चलाओ त ठीक पण अफु पर लाठी चली त प्रजातंत्र को नाश बुळण सीख रे बाबा

करुणा निधि की जिन्दी आत्मा जाग , टू जी स्कीम का घोटाला को ठीकरा मीडिया पर फोड़ण सीख

बी जे पी की ज़िंदा आत्मा जाग, कोंग्रेस मा भ्रष्टाचार देख पण यदुरप्पा को भ्रष्टाचार तैं न्याय को नाम दीण सीख रे बाबा

गूणी अपण पूँछ नि दिखदु पण बांदर को पूँछ तैं लम्बो बताण सीख रे बाबा