दांत मंजाणो कु ब्रैंड लौं ?

गढ़वाली हास्य-व्यंग्य

सौज सौजम मजाक-मसखरी

हौंस इ हौंस मा, चबोड़ इ चबोड़ मा

                             दांत मंजाणो कु ब्रैंड लौं ?

                               चबोड़्या-चखन्यौर्या: भीष्म कुकरेती

(s =आधी अ )

घरवळिन रुस्वड़ बिटेन धै लगैक ब्वाल।" सुणो! तुम दूध लीणों जाणा छंवां तो जरा दुकान बिटेन 'अक्का' ब्रैंड को टूथ पेस्ट लै आवो! अक्का इ लैन हां। 'क्योंकि बहू ने सास बनना है ' सीरियल की खास बड़ी जवान बहू अक्का टूथ पेस्ट की ही वकालात करदी।

बेडरूम बिटेन ब्वेकि धै सुण्याइ," नै नै ! अक्का टूथ पेस्ट ये घरम आयि त मीन आन जल छोड़ी दीण। पता च 'क्योंकि बहू ने सास बनना है ' सीरियल की खास बड़ी जवान बहू बड़ी दुत्ति च वा त अपण सासु तै मुरिंड बिटेन धकल्याणै कथगा कोशिस करणी रौंदी। वीं दुत्ति भकलौण्युमा कतै नि आण। तू इन कौर दुक्का टूथ पेस्ट लै आ। 'क्योंकि सास बहू को चैन नही लेने देगी ' की भिभड़ट्या सास की पहली पसंद 'दुक्का ' टूथ पाउडर च।

वै इ बेड रूम बिटेन अवाज दे," सूण! दुक्का टूथ पेस्ट नि लै दुक्का टूथ पेस्टम हिल्दा दांतों तैं ठीक पकड़णै तागत नी च। तू इन कौर 'तिक्का' टूथ पेस्ट लै। 'ससुरजी की बहू' सीरियल को मुरदार ससुर 'तिक्का' टूथ पेस्ट से ही अपण नकली दांत मजांदो"

घरवळिन रुस्वड़क दरवजम ऐक ब्वाल," जो ये घरम 'दुक्का' पेस्ट आयि त मीन नास्ता क्या लंच बि नि बणान। याद च तुम तै कि कन 'क्योंकि सास बहू को चैन नही लेने देगी ' की भिभड़ट्या सास 'दुक्का' टूथ पेस्ट को विज्ञापन मा बुल्दि," यदि आप चाहते हैं कि आपकी अड़ियल से अड़ियल बहू आपके कब्जे में रहे तो सुबह शाम 'दुक्का' टूथ पाउडर प्रयोग करें।

मीन ब्वाल," तो बुबा जीक पसंदीदा 'तिक्का' टूथ पेस्ट लयों?

उना ब्वेक आवाज आयि," ये बुड्या क त दिमाग खराब हुयुं च। अरे हमर घरम 'तिक्का' टूथ पेस्ट आलो त मेरि दगड्याणि मि तैं बुड्या समजण बिसे जाला। द्याख नि च टी वी मा 'तिक्का' टूथ पेस्ट को विज्ञापन - बूढ़े से बूढ़े दांतों की रक्षा करता है 'तिक्का " टूथ पेस्ट'"

बड़ो नौनो अवाज आइ,' डैड! आज मेरी नई गर्ल फ्रेंड आणि च त 'चुम्मा अप' टूथ पेस्ट लयावो। वीं तैं वो ही छोरा पसंद छन जो ' चुम्मा -अप' पेस्ट प्रयोग करदन।

ब्वेक अवाज आइ।" हाँ 'चुम्मा -अप ' टूथ पेस्ट से मी तै क्वी ऐतराज नी च।"

बाबक आवाज आइ," ये ! जू म्यार दगड्यो तै पता चौलल बल तेरि दादि चुम्मा -अप' पेस्ट करदी त दगड्योन मै तै चिरडाण ,बुड्ढ़ी घोड़ी लाल लगाम'. ये घरम 'चुम्मा -अप' पेस्ट आलो तो मीन फिर से सिगरेट पीण शुरू कौरि दीण"

कणसो नौनोन धै लगाइ," पापा आज मेरि पुराणि गर्ल फ्रेंड आणि च अर वा वै इ नौनो दगड़ करदी जो 'लव बाइट' टूथ पेस्ट से दांत मंजांदन। आप 'लव बाइट' टूथ पेस्ट जरूर लैन "

मेरि घरवळीन बोलि," चलो 'लव बाइट' टूथ पेस्ट इ लै आवो। मेरी सहेली बुल्दन बल 'लव बाइट' टूथ पेस्ट जवान मानसिकता की निसानी च "

बड़ो नौनन भैर ऐक ब्वाल," नो नो ! माइ दिस न्यू गर्ल फ्रेंड हेट्स'लव बाइट' टूथ पेस्ट ."

घरवळिन ब्वाल," ठीक च ! मेखुण 'अक्का' ब्रैंड को टूथ पेस्ट लै आवो"

ब्वेन आदेस दे।" मी तै त 'दुक्का' पेस्ट इ चयाणु च"

बुबाक बुलण छौ," तो फिर त मि तै केवल 'तिक्का' टूथ पेस्ट ला"

बड़ो नौनन धमकी दे," जु 'चुम्मा अप' टूथ पेस्ट नि आल त मीन कॉलेज जाण बंद करी दिण"

कणसु नौनोक अल्टिमेटम छौ," तो जु 'लव बाइट' टूथ पेस्ट नि आलो तो मीन औड़ि औड़ि कैक फेल ह्वे जाण"

मी दुकान बिटेन सब्युं कुण वूंकी पसंदै टूथ पेस्ट लैक औउं।

इथगा मा घरवळिन पूछ," दूध किलै नि लाया?"

मीन ब्वाल," या तो दूध प्यावो या अपण अपण पसंदीदा टूथ पेस्ट से दांत मंजावो"

सब्युंक एकी दगड़ आवाज आइ," हम तै अपण पसंदों टूथ पेस्ट चयाणों च ना कि दूध"

Copyright@ Bhishma Kukreti 5 /3/2013