कुछ छिटगा :रचयिता : डॉ नरेन्द्र गौनियाल

********कुछ छिटगा *******

 

रचयिता : डॉ नरेन्द्र गौनियाल 

 

१-****ऑफिस****

सुविधा शुल्क
च्या-पाणि
घर्या घ्यू
अखोड़ों दाणी
निथर  कलम
अगने नी घस्गाणी

 

 

२-**** रोजगार योजना ****

बाटों माँ
घाटों माँ
माटु छलकाण
अपणा-परायों तै
काम लगाण
गल्दम-सल्दम
अर
जेठ जी का पौ बारह .

 

 

*****सोच *****

एक पर्यावरणविद
पर्यावरण सुरक्षा विषय पर
आयोजित सेमिनार माँ
जाणा छाया
बस का भितर बैठ्याँ
गैरी सोच माँ ड़ूब्याँ
सिगरेट पर सिगरेट पींदा
धुवां का गोल-गोल छल्ला
उड़ाना छाया

 

 

*******केर ******

राज मिस्त्रीन .
वास्तु धैरी
भुयां बीटी धुरपाल तक
एक-एक ढुन्गू  चीनि
तिखंडी जिन्ग्लादार  कूड़ी तैयार 
घर बैसू ह्वैगे
पर अब वो
खुटी बि नी धरी  सकदु
देली का भितर
घरबैसु कना बाद
रालू सिर्फ भैर 
पता नी कु
मारि गे केर ...........

सर्वाधिकार : डॉ नरेन्द्र गौनियाल