उत्तराखंडी ई-पत्रिका की गतिविधियाँ ई-मेल पर

Enter your email address:

Delivered by FeedBurner

उत्तराखंडी ई-पत्रिका

उत्तराखंडी ई-पत्रिका

Thursday, April 19, 2012

आवा ! हमर विश्व विद्यालय मा बेईमानी सीखो !

आवा ! हमर विश्व विद्यालय मा बेईमानी सीखो !
                                  चबोड्या-चखन्यौर्या - भीष्म कुकरेती
प्रिय विद्यार्थी गण अर संरक्षक गण !
आप लोगूँ तै बताणो जरुरात नी च बल आज की कठिन , गळा-काटो प्रतियोगी परिस्थिति मा प्रतियोगी गुणो अलावा
छ्वारा-छोर्युं मा बेइमानी गुण होण प्रतियोगी गुणों से जादा जरुरी च. डूञडो काणो भीक बि तबी मांगि सकदो जब वै मा या वींमा
बेईमानी करणो गुण ह्वावन. आज बगैर बेईमानिक नौकरी पाण त राई दूर नौकरी क फौरम बि नि पै सकदवां. बगैर बेईमानिक
क्वी बि प्रमोसन नि पाई सकदो . याने कि बथाणै जर्वत नी च कि आज बेईमानी भौती आवश्यक अतिरक्त गुण च.
 
                                  ब्वेक पुटुक बिटेन क्वी बेईमानी नि सीखिक आंदो !
 
              उन त वैज्ञानिक सालों से कोशिश मा लग्यां छन बल बच्चा ब्वेक पुटकन इ बेईमानी सीखिक आओ. पण अबि तलक वैज्ञानिकों
तै रति भर बि सफलता नि मीलि.
                   जन कि लीडरशिप बि सिखाये जांद उनी अब बेईमानी सिखाणो प्रोफेसनल विश्व विद्यालय खुलणा छन. आप तै ख़ुशी ह्वेली बल हमारी
डिसहौनेस्टी टीचिंग यूनिवर्सिटी बेईमानी सिखाण मा दुनिया कि दस टौप युनिवरसिटियूँ मा एक यूनिवर्सिटी च. पोरुक साल टाइम्स मगेजीन मा
हमारि यूनिवर्सिटी क बारा मा एक आलेख बि छप.
 
                                     डिसहौनेस्टी टीचिंग यूनिवर्सिटी का टीचिंग स्टाफ
 
                 डिसहौनेस्टी टीचिंग यूनिवर्सिटी क चांसलर बेईमानी लाल कु नाम जग प्रसिद्ध च. बेईमानी लाल चार्ल्स शोभराज को च्याला छया.
डिसहौनेस्टी टीचिंग यूनिवर्सिटी का हरेक डीन अर प्रोफ़ेसर फान्देबाजी क वजै से कम से कम छै साल जेल मा रैक अंयाँ छन. कुछ ख़ास प्रोफ़ेसर त टू जी
स्पेक्ट्रम अर कौमन वेल्थ गेम्स का आरोपी बि छन. बेईमानो क बेईमान नेता हमर यूनिवर्सिटी का विजिटिंग प्रोफ़ेसर छन. यूनिवर्सिटी का भौत सा क्लर्क
टैक्स चोरी का आरोपी छन. डिसहौनेस्टी टीचिंग यूनिवर्सिटी क क्वी बि कर्मचारी इमानदार नी च.
 
                               प्रैक्टिकल ज्ञान
 
              जख तलक प्रैक्टिकल ज्ञान को सवाल च हमर देश का हरेक जेल से सम्बन्ध छन अर हम विद्यार्थियुं तै हरेक मैना जेल लीजान्दा जख
ख़ास ख़ास बेईमान कैदी विद्यार्थियुं तै बेईमानी क प्रक्टिकल शिक्षा दीन्दन. डिसहौनेस्टी टीचिंग यूनिवर्सिटी वर्ल्ड डिसहौनेस्टी इनहैंसर ओर्गेनाइजेसन
की प्रमुख सहयोगी संस्था च.
 
                                      सिलेबस का ख़ास चेप्टर
 
                हमर सिलेबस हर साल बदले जांद जां से विद्यार्थी सामयिक चोरी अर बेईमानी से वाफिक रावन. हमर सिलेबस मा
बेईमानी का अटल अर अमूल्य सिद्धांत,नकली सर्टिफिकेट बणाणो अर पाणो तरीका, झूट बोलणो ख़ास दस तरीका,बेईमानी करद दै बि सच्चो सीधो दिख्याण,
पापी ह्वेक बि पुण्यात्मा क ढोंग रचणो तरीका, नेतागिरी, सरकारी महकमाओं बेईमानी कनो करण कि पकड़ मा नि आये जाओ,
मंत्री ह्वेक या औफ़िसर ह्वेक हर पाल बेईमानी करण पण अफु तै दुनिया क सबसे बड़ो इमानदार घोषित करणो अमोघ तरीका, चोरक चरचर बचन,
स्कैम मा फंसीक बि कनो विधान सभा या लोकसभा मा इमानदारी पर लम्बा लम्बा भाषण दीण , आदि ख़ास चेप्टर छन.
 
                                                    अस्स्योर्ड नौकरी
 
                हमर बड़ा बड़ा खाऊ -प्याऊ विभागुं मा पूरी पछ्याणक च अर हमर विद्यार्थ्युं तै खाऊ -प्याऊ विभागुं शर्तिया नौकरी मिलदी
                              हमारा सफल विद्यार्थी
 
              क्वी इन क्षेत्र नी च जख हमारा पढ़ायाँ विद्यार्थी नि हवावां , राजनीति , सरकारी विभाग, गैर सरकारी संस्थान अर एन.जी.ओ. मा हमर
सिखयाँ बेईमान विद्यार्थी नाम अर दाम कमाणा छन.
हमारी यूनिवर्सिटी क रिकोर्ड च कि आज तक हमरा पढ़ायाँ विद्यार्थी पर बड़ा बड़ा बेईमानी कि भगार लग पण आज तक कबि बि
पकड़ मा नि आइ.
प्रवेश का वास्ता आज इ हमारी यूनिवर्सिटी क बेईमानाचार्य से मीलो. नकली या असली सर्टिफिकेट क्वी बि चौलल.
 
Copyright@ Bhishma Kukreti