लोकप्रिय कवि : हरीश जुयाल 'कुट्ज'
झूठा सौं खैकि भग्यान गुळादंगी कैरिगे
दूध मा पाणि मिलैक भग्यान गुळादंगी कैरिगे
योजनों परसाद बजट की तौलिंद खैंडी -खुंडिक
कमीशनै दबुळ घुमैकि परधान गुळादंगी कैरिगे
हमरा नौ का इंदिरा आवासा बदल हम खुणि
सड्यां फड़िका छैंकि बेमान गुळादंगी कैरिगे
अत्यड़ा खाणु च ईमानदारी कु लिंडर्या छ्वारा
जाळी घुंघरी काकी हैवान गुळादंगी कैरिगे
पौणौं आदिर खातिर कनक्वै ह्वैलि छुचौ
भंडार भितर जैकि परवाण गुळादंगी कैरिगे
खबर सै च सरगन बैठण हड़ताल मा
लगणु च भुय्यां ऐकि असमान गुळादंगी कैरिगे
लासी छूटि गेन चटगा पौड़गे 'जुयाळ ' फर
केस उल्टू बणैकि पुलिस गुळादंगी कैरिगे
No comments:
Post a Comment
आपका बहुत बहुत धन्यवाद
Thanks for your comments