उत्तराखंडी ई-पत्रिका की गतिविधियाँ ई-मेल पर

Enter your email address:

Delivered by FeedBurner

उत्तराखंडी ई-पत्रिका

उत्तराखंडी ई-पत्रिका

Tuesday, September 23, 2014

उत्तराखंडी लुब्या अर सोया बड़ी मा तू तू मैं मैं !

कन्द्यूर्या, प्रत्यक्षदर्शी ::: भीष्म कुकरेती       

  उत्तराखंडी लुब्या (राजमा )- च्च्च ! चच्च !
सोया बड़ी -ये ये ! घ्वाड़ा छौं मि कि  जु तू मि तैं च्च्च ! चच्च ! करिक खदेड़नि छे ,  भगाणी छै ?
लुब्या -छि छि छे छे !
सोया बड़ी -अरे मि क्वी खुजली वाळ कुत्ता छौं जु तु मि तैं इन भगाणि छै ?
लुब्या -अरे तू त वाडसरक्वा छे। 
सोया बड़ी -क्या ?
लुब्या -तू त भूमाफिया छे जु दुसरो जमीन जायजाद पर जबरदस्ती कब्जा कर दींदु। 
सोया बड़ी -ह्यां मि अबि इज्जत से बात करणु छौं हाँ !
लुब्या -अरे ! जा ते पर फूल नि ऐन !
सोया बड़ी -हूँ !
लुब्या -जा म्यार ब्रह्म सच ह्वाल तो फूल ऐन बि तो त्यार बीज बुसे जैन! बीज नि बुसेन त त्वै पर टेर लग जैन!
सोया बड़ी -यी क्या बकबास च ?
लुब्या -अर जु तबि बि तेरी बड़ी बण बि जैन त बणदि त्वे पर कुयड़ लग जैन , फंगस  जैन धौं !
सोया बड़ी -अरे गाळि दीण मि तैं बि आंद।  इन घात घळळु कि आवाज दक्षिण अमेरिका तलक पौंछि जाली। पता त चौल कि ह्वाइ क्या च ?
लुब्या -हूँ ! पुछणु छे कि क्या ह्वाइ ? अरे बेशरम , बदजात इन पूछ कि क्या नि ह्वाइ ?
सोया बड़ी -बकबास करण मा तू बेलवाल भुट्टो ह्वे गे। 
लुब्या -ऐ तू मि तैं सुंगर बोलि दे पर बेलवाल भुट्टो कि गाळि नि दे हाँ !
सोया बड़ी -यां पागल जन बात करील तो मिन त्योकुण  बेलवाल भुट्टो जरदारी हि बुलण। 
लुब्या -अरे यदि क्वी बदजात कैकु  राज ताज छीनल तो जैक ताज -राज जालु तो वैन गाळि नि दीण तो क्या करण ? मुंड मा बिठाल ? बड़ै माँगल (प्रशंसा गीत ) ?
सोया बड़ी -ह्यां पर मीन त्यार क्या बिगाड़  ?
लुब्या -अच्छा सरा पुंगड़ी पर कब्जा करिक पुछणी छे कि मीन क्या कार ? मेरि सरा कूड़ी खै गे अर फिर बि अजाण ह्वेक पुछणि छे कि क्या ह्वे ?
सोया बड़ी -अरे या बकबास मेरी समज से भैर च। 
लुब्या -त्वे पता च , मकुण राजमा बुले जांद छौ याने दाळु राजमाता ! अर अब ? 
सोया बड़ी -अब क्या ?
लुब्या -पैल  रविवारौ कुण बड़ी लगन से राजमा  दाळ बणाद छा।  हरेक खंदेर , हरेक दुकानदार मि तैं बड़ी इज्जत दींद छौ।
सोया बड़ी -अर अब ?
लुब्या -अब जब बिटेन यी बहुराष्ट्रीय कम्पन्यूंन त्यार प्रचार प्रसार कार अब क्वी मि तैं पुछ्दु इ नी च।  अरे संडे तो छवाड़ो अब त उड़द की दाळ मा मेरी जगा त्वे तैं डाळि दींदन। इनि हाल राल तो पता नि मि हर्ची इ नि जौं !
सोया बड़ी -हाँ तो मीम प्रोटीन च , फैट च पर सोडियम कतै नी च , कोलेस्ट्रोल नी च कर्बोहाइड्रेट्स छन। कैल्सियम च, विटामिन्स छन आदि आदि 
लुब्या -अरे पर मीम बि त सी गुण छन कि ना ?
सोया बड़ी -पर जु बहुउपयोग म्यार ह्वे सकुद स्यु त्यार नि ह्वे सकद। 
लुब्या -यी सब साम्राज्यवादी, सामंतवादी , पूंजीवादी पोषित बहुदेशीय कंपन्यूँ शरारत च कि त्वै तैं प्रमोट करणा छन। 
सोया बड़ी -हं हं ! जब बि कै पर भीत पोड़ना वु कम्युनिस्ट बण जांद , बामपंथी बण जांद।  जैदिन अम्बानी  या मल्लया पर भीत पोड़ल ना वूंन कम्युनिष्टि भाषा बुलण मिसे जाण।  तू बि फटेहाल दिनुं आशंका मा कम्युनिष्ट ह्वे गे अर 
लुब्या -पर तू पहाड़ों की संस्कृति , परम्परा तैं नुक्सान क्या खतम ही करणी छे। तू संस्कृति भंजक छे , परम्परा तोडू सिद्ध हुणि छे।
सोया बड़ी -वाह ! छनि तो बोले बोले , चंळु -मंट्यळु   बि बोले जिसमे बड़े छप्पन छेद !
लुब्या -क्या मतबल ?
सोया बड़ी -तीन बि त अठारवीं -उनीसवीं सदी मा भारतमा खानपान संस्कृति पर अतिक्रमण कौर छौ अर जोर शोर से अतिक्रमण कौर छौ। 
लुब्या -ये बिंडी नि बोल हाँ।  मीन त्यार दांत तोड़ि दीणण हाँ !
सोया बड़ी -चोर का चर्र चर्र चार बचन ! 
लुब्या -मीन क्या चोरी कौर ? क्या चोरी कार हैं ?
सोया बड़ी -मि तैं सब पता च।  त्यार असली मैत दक्षिण अमेरिका याने पेरू , मैक्सिको च अर यूरोपी ब्यापारी त्वै तैं दक्षिण अमेरिका बटें यूरोप लैन अर फिर भारत लैन। 
लुब्या -गलत।  मेरी कुछ जाती अफ़ग़ानिस्तान अर हिमालय मा बि पुरण जमाना से छौ.
सोया बड़ी -हाँ पर उ लुब्या तो तू नि छे ना।  तीन बि एक दैं भारत की खानपान संस्कृति पर जबरदस्त धक्का लगै छौ। अर संस्कृति क्वी तालब नी च जु रुक्युं राव , संस्कृति तो बगदि नदी च ।
लुब्या -नै नै ! मीन भारत तैं फायदा ही दे छौ। 
सोया बड़ी -हाँ  अफु पर बितदि तो हरेक तैं संस्कृति टूटणो डौर लगद।  खानपान मा जै बि अनाज , दाळ , भुज्जी , फल माँ पौष्टिक तत्व ह्वाल , बहुप्रयोग ह्वाल वो खाद्य पदार्थ पुरण खाद्य पदार्थ तैं पैथर धकेळदु।   
लुब्या -दिखुल त्वै तैं कि तू म्यार साम्राज्य तैं खंड मंड करदि दैं !
सोया बड़ी - हां हा हा ! कॉंग्रेस हारी गे किन्तु अबि बि भाजपा कुण बुलणि च कि मीइ ही वास्तविक राष्ट्रीय राजनीतिक पार्टी छौं।  त्यार बि हाल कॉंग्रेस जन  छन तू अबि बि मानणो तयार नि छे कि अगला दशक किडनी बीन्स ना अपितु सोयाबीन्स का छन ! 

Copyright@  Bhishma Kukreti 22 /9/ 2014       
*लेख में  घटनाएँ ,  स्थान व नाम काल्पनिक हैं ।
 लेख  की कथाएँ , चरित्र व्यंग्य रचने  हेतु सर्वथा काल्पनिक है 
  
Garhwali Humor in Garhwali Language, Himalayan Satire in Garhwali Language , Uttarakhandi Wit in Garhwali Language , North Indian Spoof in Garhwali Language , Regional Language Lampoon in Garhwali Language , Ridicule in Garhwali Language  , Mockery in Garhwali Language, Send-up in Garhwali Language, Disdain in Garhwali Language, Hilarity in Garhwali Language, Cheerfulness in Garhwali Language; Garhwali Humor in Garhwali Language from Pauri Garhwal; Himalayan Satire in Garhwali Language from Rudraprayag Garhwal; Uttarakhandi Wit in Garhwali Language from Chamoli Garhwal; North Indian Spoof in Garhwali Language from Tehri Garhwal; , Regional Language Lampoon in Garhwali Language from Uttarkashi Garhwal; Ridicule in Garhwali Language from Bhabhar Garhwal; Mockery  in Garhwali Language from Lansdowne Garhwal; Hilarity in Garhwali Language from Kotdwara Garhwal; Cheerfulness in Garhwali Language from Haridwar

No comments:

Post a Comment

आपका बहुत बहुत धन्यवाद
Thanks for your comments