दुखी रौणौ कामयाब तरीका

पथभ्रष्ट कर्ता   :: भीष्म कुकरेती  

 सुखी रौण , खुसी मा रौण , दुखी  नि हूण  से सबसे बड़ो नुकसान यु हूंद कि जौं तैं तुम सुखी दिखण नि चांदा वो भि आपकी प्रसन्नता से प्रसन्नता प्राप्त कर लीन्दन। जब कि जीवन का नियम च कि अपण दिवार गिर जावो पर दुसरो कमर टुटण चयेंद। अतः  अफु ना सै दुसर तैं दुखी दिखणो बान कनकैक बि दुखी हूण आवश्यक च।

                   ---------------- कबि बि वर्तमान मा नि रौण से मजेदार दुःख प्राप्ति------------------

हरेक का पास एक सदाबहार चीज च अर वो च वर्तमान। किन्तु, परन्तु , अवश्य ही हरेक को एक भूतकाल बि हूंद अर एक्सीडेंट नि हो तो भविष्य बि।

 यु सही च कि यदि तुम वर्तमान मा रैल्या तो तुम सुखी रैल्या , जु अबि च वैमा मजा लेल्या तो आनंदप्राप्ति  हूंद , अर   वर्तमान मा आनंद लीणो वास्ता खर्च बि नि करण पोड़द।  किन्तु , परन्तु,  यदि तुम वर्तमान मा रैल्या तो तुमर आस पास का लोग क्या कुत्ता तैं बि आनंद प्राप्त ह्वे जाल और यु त हम  सब्युं कुण असह्य बेदना हूंद कि आस पास का लोग सुखी ह्वे जावन ।  याने वर्तमान मा रौण से नुक्सान हूंद तो आपतैं कै बि करिक वर्तमान मा नि रौण चयेंद। दुसरों के दुःख प्राप्ति हेतु अपण वर्तमान पर लात लगाण जरूरी च।

               ---------------वर्तमान मा नि रौणो   अजमयां , अचूक , शीघ्र असरकारी कौंळ (तरीका ) --------------

कुछ पथ्य छन जाँसे आप अपण वर्तमान से दूर ह्वे जैल्या -

१- भूतकाल का दुखी अनुभवुं तैं याद नि बि आणा ह्वावन तो बि दुखी अनुभव याद कारो , सेठ लुक़मान का हिसाब से आपक  वर्तमान अवश्य ही रसातल को चली जाल। जन कि तुम्हारी प्रेमिका या प्रेमी समिण हो अर प्रेम की छ्वीं जरूरी हो तो आप अपण भूतकाल मा खईं मार याद कारो तो अवश्य ही  प्रेमिका /प्रेमी भाग जाल।  

२- भविष्य की चिंता - यदि आप पर भूतकाल का दुःख याद करिक कुछ बि फरक नी पड़णु च अर आप तब वर्तमान का सुख का मजा लीणा छंवां तो भविष्य मा हूण वाळ एक्सीडेंट , मृत्यु अर कैक झिड़की  बारा मा सुचण शुरू कर द्यावो , वर्तमान फुर्र से उड़ जाल , आप वर्तमान से दूर ह्वे जैल्या अर आप असहनीय दुःख मा गोता लगाण लग जैल्या।  

३- अबि बि यदि , जु , तब बि दुःख से तुमर ज्यु नि भर्याओ तो वूं चीजुं पर ध्यान द्यावो जौं तैं तुम पसंद नि करदा।  अवश्य ही , जरूर , विश्वास कारो आप दुःख  संसार मा पौंछि जैल्या। 

४- इथगा दुखुं से बि धीत नि भर्यावो तो अपण आस पास का लोगुं दगड़ दुर्ब्यवहार कारो।  वर्तमान आपकी पंहुच से भैर ह्वे जालु अर दुःख तुमर खुट ध्वेक प्यालो।

५- यदि तुम यूँ दुःख का पहाडुं से फिर बि असंतुष्ट छंवां तो वर्तमान तैं भगाणो हैंक नायब , कामयाब , सुरक्षित तरीका च कि आप अपण प्रकृति छोड़ द्यावो अर दुसर प्रकृति का हिसाब से व्यवहार कारो। खुसी गायब  ह्वे जालि अर अप्रसन्नता का बादल ऐ जाला अर वर्तमान छू मंतर ह्वे जाल।

६-शर्मनाक घटनाओं की याद करिक बि आप वर्तमान तैं खदेड़ सकदा , सुख तैं धक्का दे  सकदा अर दुःख का चदरु ढिकाण ले सकदा। 

यदि आपन अळगाक पथ्य -परेज ढंग से ल्याई तो तुमर बुबाजी , ददा जी, कक्याससुर  का साडू भाई की कसम तुम तो तुम !  तुमर   आण वळि सात पीढ़ी बि वर्तमान मा रौण लैक नि राली अर अगली सात पीढ़ी बि दुःख का झूला मा झुलणी राली अर सुख सदा  का वास्ता  बिमुख ह्वे जाल। 

 

Copyright@  Bhishma Kukreti 25 /9/ 2014       
*लेख में  घटनाएँ ,  स्थान व नाम काल्पनिक हैं । लेख  की कथाएँ , चरित्र व्यंग्य रचने  हेतु सर्वथा काल्पनिक है 

 
Garhwali Humor in Garhwali Language, Himalayan Satire in Garhwali Language , Uttarakhandi Wit in Garhwali Language , North Indian Spoof in Garhwali Language , Regional Language Lampoon in Garhwali Language , Ridicule in Garhwali Language  , Mockery in Garhwali Language, Send-up in Garhwali Language, Disdain in Garhwali Language, Hilarity in Garhwali Language, Cheerfulness in Garhwali Language; Garhwali Humor in Garhwali Language from Pauri Garhwal; Himalayan Satire in Garhwali Language from Rudraprayag Garhwal; Uttarakhandi Wit in Garhwali Language from Chamoli Garhwal; North Indian Spoof in Garhwali Language from Tehri Garhwal; , Regional Language Lampoon in Garhwali Language from Uttarkashi Garhwal; Ridicule in Garhwali Language from Bhabhar Garhwal; Mockery  in Garhwali Language from Lansdowne Garhwal; Hilarity in Garhwali Language from Kotdwara Garhwal; Cheerfulness in Garhwali Language from Haridwar;