अडवाणी जी ! तुम आगे बढ़ो , कौंग्रेस आपके साथ है

गढ़वाली हास्य -व्यंग्य 

 सौज सौज मा मजाक मसखरी  
  हौंस,चबोड़,चखन्यौ     

  सौज सौज मा गंभीर चर्चा ,छ्वीं   

                                           अडवाणी जी ! तुम आगे बढ़ो , कौंग्रेस आपके साथ है   


                            चबोड़्या - चखन्यौर्या: भीष्म कुकरेती (s = आधी अ )

             ब्याळि लाल कृष्ण अडवाणीन भारतीय जनता पार्टीs सबि पदों पर लात लगाइ अर ब्वाल बल चूँकि अब भारतीय जनता पार्टी मा नेता लोक अपण अपण महत्वाकांक्षा बान काम करणा छन तो वो पार्टी का सबि पदों से त्यागपत्र दीणा छन। उन अबि तलक लोग बाग़ अर भारतीय पार्टी वाळ त समजणा छा कि अडवाणी जी की महत्वाकांक्षा प्रधान मंत्री बणणै छै पण अब समज मा आयि कि वो निस्वार्थी बिचारा त पार्टी अर देस का खातिर प्रधान मंत्री बणण चाणा छ्या।
          अब जब अडवाणी जिन इस्तीफा दे त भाजापा का नेता ऊंक ड्यार गेन। इन बुल्दन बल राजनीति मा यु एक रिवाज च।
 मि सुचणु छौ कि जु भाजापा का नेताओं अलावा हौर पार्टी नेता बि अडवाणी का ड्यार जांदा त क्या क्या बुलदा।
 
जु डीएमके का करुणानिधी अडवाणी से मिलदा तो बुलदा - अडवाणी जी ! जु तुम प्रधान मंत्री बणदा तो मि तैं पूरो भरवस छौ कि तुम मेरि छवटि  बेटी,बड़ी बेटि जंवै अर ए . राजा पर लग्याँ अभियोग माफ़ करि दींदा पण अब मि तैं नरेंद्र मोदी दगड गोटि फिट करण पोड़ल। तुम यूँ आरएसएस वाळु तैं  ठीक से समजावो कि राजनीति मा उमर को कुछ बि लीण दीण नी च। अब मि तैं इ देख ल्यावदी जगा मांगन सरक नि सकदो पण सरा राज्य को भार उठायूँ च।
  यदुरप्पान बुलण छौ बल अडवाणी  तुम मेरी पार्टी संरक्षक बणी जावो अर कृष्ण भूमि या बाबा विश्वनाथ मंदिरों बान रथ यात्रा कारो फिर तुम प्रधानमंत्री अर मि लौह पुरुष बणलु अर म्यार नौनु खरबपति बणलु।
लालू यादव अडवाणी तै मीलल त ब्वालल  बल अडवाणी जी ! धन्यावाद ! आपन जनता दल या जनता पार्टी की मुख्य संस्कृति तै अपणाई बल अपणी ही पार्टी तैं कनकै बीच बजार मा शर्मनाक स्थिति मा डाळण बस आप इनि अपणी ही पार्टी तैं इनि बीच बजार मा नंगा करदा जावो मि तुमर दगड़ छौं .
कम्युनिस्ट पार्टी का नेता ए राजा अडवाणी दगड़  छ्वीं लगांद बल अडवाणी जी ! कसम लाल झंडा की ! आरएसएस तैं एक्सपोज करणों जु काम हमन इथगा सालों मा इथगा कोशिस का बाद बि नि कार साक आपन एकी झटका मा करी दे। आप तैं हमर पार्टी तरफान लाल किताब की भेंट च। आप आरएसएस तैं इनि एक्सपोज कारो हम रोज तुम तैं एक लाल किताब इनाम मा दींदा रौला।
 मुलायम सिंह आलो अर रुंद रुंद ब्वालल बल अडवाणी जी अब मि क्या कौरू ? कुछ दिन बिटेन मि तुमारि प्रशंसा अपण भाइयों अर भतीजों तैं डराणो करदो छौ। अब त भाई धमकी दीणा छन बल हमन बि लाल कृष्ण अडवाणी तरां अपण लगाईं डाळि  का जलड़ कटणन। आप इन बथावो कि अपण लगाईं डाळि  का जलड़ कटण आपन हम समाजवादियों से सीख कि आरएसएस मा हि इन स्कूल खुलिं गेन? 
शरद पंवार आलो अर बुलण लगल बल अडवाणी भाऊ जी ! कसम से मि ईं दै डर्युं छौ बल महाराष्ट्र मा हमन शर्तिया हारण पण तुमर अपणी पार्टी दगड़ दगाबाजी, धोकाबाजी  से अब मि तैं पूरो भरवस ह्वे गे कि महाराष्ट्र मा शिवसेना -भाजापा युति नि जीति सकद। जै परिवारों बूड -खूड अपण परिवारों झगड़ा खुलेआम रस्ता मा लालो तो वै परिवारों भिविष्य त खतम ही समझो। थैंक यू अडवाणी जी ! आपन बेशरम बुजर्ग की भूमिका अदा कार अर हम नेशनल कौंग्रेस अर कौंग्रेस युति मा दुबर प्राण डाळि दे।
रायपुर बिटेन अजित जोगी आयि अर बुलण बिस्यायि बल अडवाणी जी तुमर पार्टी अर देस का प्रति छद्म , नकली,दिखावटी,  बनावटी स्वांग , नाटक, ड्रामा  से अब छतीस गढ़ का कॉंग्रेसी निश्चित छन कि अबैं दै छतीस गढ़ मा बीजीपी चुनाव नि जीति सकदी। मि कौं शब्दों मा तुम तै धन्यवाद द्यूं?
मायावती क फोन आलो  बल अडवाणी जी ! मोदी फैक्टर से मि डर्युं छौं कि उत्तर परदेस मा सबसे बडो नुक्सान मि तैं ही हूण पण तुमारो निहुण्या , निखण्या,जड़कट्वा हरकतों से अब उत्तर परदेस मा नरेंद्र मोदी की आंधी रुक जालि। तुम इनि बेशरम हरकत कारो अर अपण पार्टी की नया डुबांद जावो तो एक मूर्ति मि तुमर बि लगै द्योलु अर मूर्ति तौळ लिख्युं राल कि लाल कृष्ण अडवानी -एक अतृप्त आत्मा जैन अपणी प्रधान मंत्री की महत्वाकांक्षा बान अपण  अंतिम दिनों मा कुलघाती, कुलनाशी,कुलविनाशी ,कुलंकटकि, कुलघ्नी , कुलनिमाड़ी काम कार!   
राहुल गांधी बि  आयि अर बुलण बिस्यायि अंकल ! अंकल ! पता च ममी क्या बुलणि छे ? ममीन ब्वाल बल जख तुम सरीखा परिवार उजाड़ो  संरक्षक  ह्वावन तो भाजापा वाळु तैं दुश्मनु जरूरत ही नी च। ममी क रैबार च बल लाल कृष्ण अडवाणी जी तुम आगे बढो , मोदी को रोको और कौंग्रेस आपके साथ है। ममी न पूछ बल पद्म श्री अबि दिलौं कि जब भाजापा चुनाव हारली तब दिलौं?         
   
बीजेपी का कार्यकर्ता ऐन अर बुलण बिसेन बल अडवाणी जी ! तुमन अफिक एक पदवी 'लौह पुरुष ' की  धारण करी छे वीं तैं उतारो अर तुम त पुरुष की पदवी लैक बि नि छंवाँ जो मनुष्य अपण परिवारों झगड़ा बीच बजार मा लावल  वो तो पुरुष छ्वाड़ो  किमपुरुष बुलण लैक बि नी च ! 


Copyright @ Bhishma Kukreti  11/06/2013     
(यह लेख सर्वथा काल्पनिक है )