बुफे लंच-डिन्नर सस्तो किलै हूंद ?

गढ़वाली हास्य व्यंग्य

हौंसि हौंस मा, चबोड़ इ चबोड़ मा

                            बुफे लंच-डिन्नर सस्तो किलै हूंद ?

                                             चबोड्या: भीष्म कुकरेती

(s=-माने आधी अ )

अजकाल बुफे डिन्नर या बुफे लंचौ याने बुफे पार्टीs प्रचलन बढ़ी गे . जख जावो तख सडकोंम तुम तै -बुफे पार्टी कैसे दी जाय या - बुफे पार्टीम खाणों तरीका जन किताब मीलि जाला। आप तै सिखये जांद बल जैदिन बुफे पार्टी ह्वावो वां से एक या द्वी दिन पैलो बरत धरण जरूरी होंद . याने अजकालो हिसाब से बुफे पार्टीम जाण ह्वावो त नीनु पुटुक जाण ही सभ्य पुरुसुं काम च।

जु तुमन पार्टी दीण त बुफे पार्टी दीणम फैदा च . बुफे पार्टीs खर्चो सस्तो आंद . होटल वाळ तीन सौ टका को डिस्काउंट दीणों तयार रौंदन .

ब्याळि , रिवाजो हिसाब से , द्वी दिनों नीनु पेट लेकि मि एक बुफे पार्टीम होटल ग्योँ। उख पार्टीम मीन अंक्वाई (अन्थाजण) बल उख बड़ा बड़ा लोग छ्या किलैकि सबि अंग्रेजीम बचऴयाणा छया अर सबि एक हैंक तै हीण समजणा छ्या।पैलो जमानम जु संस्कृतम बचऴयांदो छौ अर सब्युं तैं छ्वटो समजदो छौ वी बड़ो आदिम हूंद छौ अब जु अङ्ग्रॆजिम बचऴयांदो अर सब्युं तैं छ्वटो समजदो वो ही बड़ो आदिम हूंद .

मि प्लेट लेक सलादों एरियाम ग्योँ त उख सबि बीस किस्मो सलाद मिक्स सलाद छया एक बि सलाद इकुऴया नि छौ । सलादो तौळ बनि बनि नामै प्लेट छे जन कि 'मिक्स्ड ग्रीन एंड ग्रीन बेल्जियन सलाद'; 'चीज, वेजिटेबल एंड पास्ता मिक्स्ड स्पेनिश सलाद';'चिकन मिक्स्ड विद पल्स पोर्तगीज सलाद'; 'मंगोलियन स्रिम्प प्राउन एंड लोबस्टर सलाद '; 'टेन वेज मिक्स्ड विद जमाइकन सौस कैरिबियन सलाद' आदि आदि। मीन एक सलाद गाड अर मेरि खानदानी सरयूळया जात जगी गे . मै लग ये सलादम अलग अलग दिनम कटीं भुजी या दाळ च . मीन गढ़वाळी बैरा तै पूछ ," भैजि ! इन लगणु च चिकन मिक्स्ड विद पल्स तीन चार दिन बासी च ."

बैरान जबाब दे ," हाँ ! भुला ताज होटलों पर्स्याक वेडिंग पार्टीम बच्युं चिकन सलाद मांगक चिकन च अर ओबेराय होटलौ नितर्स्यो तिरैं पार्टी मांगन बच्युं दाळ सलाद च। हमन द्वि मिलै देन "

मीन बोलि," अर नाम दे द्यायि - 'चिकन मिक्स्ड विद पल्स पोर्तगीज सलाद'"

"खाणों नामकरण मार्केटिंग डिपार्टमेंट वाळ करदन ." बैरा क जबाब छौ .

मि नौनवेज टेबल जिना ग्योँ त उख दुन्या भरौ नौन वेज से मेज भोरिं छे जन कि मोमिजी जापानीज चिकन'; 'अरेबियन लैम्ब विद ऑस्ट्रेलियन सौस' ; 'बेल्जियन डक लेग एंड मलेसियन डक रिब्स विद रसियन रेसिपी' आदि आदि

मीन 'इन्चिलाडा मेक्सिकन चिकन' चाख त फिर से मेरो भितरौ खानदानी सरयूळ जागृत ह्वे गे। मीन गढ़वाली बैरा तै पूछ ," भुला ये मैक्सिकन चिकनम तीन चार किस्मौ चिकन लगणा छन "

गढ़वाली बैरान बथाई बल हाँ द्वी तीन बड़ा बड़ा होटलों से ब्याळि-पर्स्यौ चिकन आलो त तीन चार किस्मौ चिकनs स्वाद आलो ही .

मि तै होटलों परचेज मैनेजर बडोला जी मीलि गेन। बडोला जी हमर अड्गैंका छन त वूंन बथै बल हम बड़ा बड़ा होट्लूं से बच्युं खाणा खरीददवां अर फिर मिक्स कौरिक नै नै रिसिपी बणौन्दा अर नया नया नाम देकि आप लोगुं तै परोसदवां

मीन पूछ," पण बडोला जी! यो त ऐथिकल बिजिनेस नी च। दुसर होटलों बच्युं खाणक नया नाम से बिचण क्वी बढ़िया बात त नी च ?"

बडोला जीक जबाब छौ," एक बात बथाओ तुम सरीका कम आमदनी का लोगुं तैं इथगा जादा खाणक सौ रुपया प्लेट मिलणों च त यां से खुशगंवार एथिकल बिजनेस क्या ह्वे सकुद ?"

खैर जो बी ह्वाओ मै तै बनि बनिक खाणों मील मि इखमा इ खुश छौ .

Copyright@ Bhishma Kukreti 27/01/2013