गिनीज बुक ऑफ रिकॉर्ड मा उत्तराखंड

गढ़वाली हास्य -व्यंग्य 

सौज सौज मा मजाक मसखरी 

हौंस,चबोड़,चखन्यौ   
 सौज सौज मा , कामौ  छ्वीं
हंसी हंसी मा गंभीर चर्चा ,   

                              गिनीज बुक ऑफ रिकॉर्ड मा उत्तराखंड 

                                    चबोड़्या - चखन्यौर्या: भीष्म कुकरेती (s = आधी अ ) 
चमचा दौड़ि दौड़ि आयि अर मुख्यमंत्री समिण जोर जोर से किराण मिसे गे। खुसीन वैका मुखान बाच भैर नि आणि छे।
उत्तरखंडौ  मुख्यमंत्रीन बोली - ये निर्भागी या त कुकर ही बौण  चमचा ही रौ 
चमचा - कूँ कूँ  कुं कुं  
उ .मु .- अबे ते बढ़िया मि कुत्ता पाळदु त विरोधी पार्टीs  कै नेता की  धोती बीच बजार माँ तो खोल्दु 
चमचा - यूरेका ! यूरेका !  
उ .मु. - अरे क्यांक रेक रेका 
चमचा -मिल ग्यायी ! मिल ग्यायी !
उ.मु.- कनो तेरि बेटी जु विरोधी पार्टी नेतौ  ड्राइवरौ दगड़ भाजि गे छे। मिल ग्यायि क्या    
 चमचा -ना ना ! वा त बल ड्राइवर  तै छोडिक कै हैंकाक दगड़ भाजि गे। वींक ग्रहों मा हर हफ्ता पति या प्रेम बदलो कु रोगजि  लिख्युं च।  
उ.मु.- त बद्कु बच्चा ! क्या मील? क्या मुख्यमंत्र्याणि तै वू सरकारी  अर गैरसरकारी मूस मिल गेन जौन उत्तराखंड विकास योजनाओं की अति महत्वपूर्ण फ़ाइल बुकै देन।     
चमचा -नै नै ! मुख्यमंत्र्य़ाणि  जी तैं सरकारी फाइलूं चिंता नी च। मुख्यमंत्र्य़ाणि जी तैं चिंता च की मूस तुमर अरबों की बेनामी जायजादों पेपर-डायरी  खै गेन वांको क्या ह्वाल 
उ.मु.- अरे त क्या मील? क्या में से पैल विरोधी पार्टी सरकार को घपलों सही अर असली सबूत मील गेन।
  चमचा -नै नै चोरी चपाटी मा विरोधी पार्टी नेता तुमारा बि चचा छन। एक बि सबूत नि छोड़ि गेन।
उ.मु.- त क्या मेरि पार्टी का नेताओं स्कैन्डल की फोटो मिल गेन जाँ से मि वूं तै धमकै सकूँ  
चमचा -ना ना स्कैण्डल छुपाण मा तुमर पार्टी का नेता तुमर ससुर छन। तुमर पार्टी मा तुमर विरोधी रोज एक नया स्कैण्डल करदन  पण मजाल च जो वो  एक बि सबूत छवाड़न धौं   
उ.मु.- वो खड़र्युं करा!  त क्या मिल ग्याइ 
चमचा -वो नुक्सा मीलि ग्यायि 
उ.मु.- अच्छा तो म्यार नौनौ बान टिहरी लोक सभा सीट पर कब्जा जमाणो नुक्सा मीलि ग्यायि। 
चमचा -नै नै ! जब तलक तुमर पार्टी का ही नेता तुमर विरुद्ध भितर-घात बंद नि कारल तुमर नौनु ये जनम मा टिहरी  लोक सभा सीट नि जीत सकुद  
उ.मु.- त अबै उतकु घस्सा ! क्या मेरि तिसरी रखैल तै भगाणो तरीका मीलि गे क्या?  
चमचा -नै नै ! तुमारि तिसरी रखैल शराब लौबी कि खासम ख़ास छणका -छुमा च। जब तलक तुम मुख्यमंत्री छंवाँ शराब लौबी होंद तुम यीं तैं नि भगै सकदा। तुम तै यीं रखैल तैं नाकौ पिसडि जन सहन करण पोड़ल।    
उ.मु.- त हे कुकरौ नाजायज औलाद! क्या मील? 
चमचा - अब आपौ नाम गिनीज बुक ऑफ रिकौर्ड मा आण से क्वी नि रोकि सकुद।
उ.मु.- ओ त या बात च।  अच्छा छ क्या च वा बात जो म्यार नाम गिनीज बुक औद रिकॉर्ड मा आलो 
चमचा -तुमन तो तुमसे पैलाक मुख्यमंत्री विजय बहुगुणा को बी रिकॉर्ड तोड़ी दे 
उ.मु.- हे मादो ! मीन विजय बहुगुणा को क्या रिकॉर्ड त्वाड़  
चमचा -द्याखो भुवन चन्द्र खंडूड़ी न सार्वजनिक तौर पर कुल  617 योजनाओं बयान दे छौ. वां मादे 336 प्रोजेक्ट पूरा ह्वेन 254 प्रोजेक्ट आधा पूरा ह्वेन,27 प्रोजेक्ट शुरू ही नि ह्वेन। याने कि खंडूड़ी जीन अट्ठावन प्रतिशत (58 %) अपण आश्वासनों तैं पूर कार      
उ.मु.- तो?
चमचा -फिर नारायण दत्त तिवारी जीन 2386 प्रोजेक्ट को सार्वजनिक आश्वासन दे छौ जाँ मादे  932 प्रोजेक्ट पूरा ह्वेन अर 1454 प्रोजेक्ट पूरा नि ह्वेन याने कि तिवारी जीन चालीस प्रतिशत (40 %)आश्वासन पूरा कौरिन 
उ.मु.- तो 
चमचा -फिर डा रमेश निशंक जीन कुल जमा 1144  प्रोजेक्टों सार्वजनिक आश्वासन  दे छौ जाँ मा 407 प्रोजेक्ट पूर ह्वेन , 180 योजना आधा पूरी ह्वेन अर   557 प्रोजेक्टों पर काम ही शुरू नि ह्व़े याने की डा रमेश निशंक जी को आश्वासन अर प्रोजेक्ट पूर करण सफलता प्रतिशत पैंतीस प्रतिशत ( 35 %) च।
उ.मु.-वो तो ....
चमचा - जख तलक तुम से पैलाक उत्तराखंडौ  मुख्यमंत्री विजय बहुगुणा जी को सवाल च वून  858 योजनाओं को सार्वजनिक आश्वासन दे,  11प्रोजेक्ट पूरा ह्वेन, 9 प्रोजेक्ट अदा पूरा हवेंन अर  838 प्रोजेक्टों काम ही शुरू नि ह्वे। विजय बहुगुणा जीको आश्वासन दीण अर प्रोजेक्ट पूर होणो सफलता प्रतिशत -द्वी प्रतिशत प्रतिशत बि  कम च केवल 1.7 %
उ.मु.- फिर !
चमचा -अर आपन तीन सालम  3000 प्रोजेक्टों आश्वासन दे छौ, जाँ मादे  20 प्रोजेक्ट पूरा ह्वेन अर  3 प्रोजेक्ट अदा पूर ह्वेन। अर आप असफलता की सबसे ऊँची पायदान पर छंवाँ। असफलता का मामला मा आपको नाम गिनीज बुक ऑफ रिकौर्ड मा आण वाळ च।  
उ.मु.- साले चमचा जा भैर ह्वे जा ! मै तैं कबि मुख नि दिखै। 
चमचा -हाँ मि त आपका धुर विरोधी गिरीश रावत को चमचा पद हथियाणो जाणु छौं। जरा टीवी मा समाचार  दयाखदी जरा ..
टीवी समाचार - अभी अभी पार्टी हाई कमांड ने उत्तराखंड के वर्तमान मुख्यमंत्री को उनकी निष्क्रियता, असफलता  के कारण निकाल फेंक दिया है और श्री गिरीश रावत को उत्तराखंड का मुख्यमंत्री घोषित कर  दिया है  


Copyright @ Bhishma Kukreti  15/05/2013            
(लेख सर्वथा काल्पनिक  है )