अपण कमजोरि तैं तागतम बदलणो कुछ टुटब्याग/ब्यूंत

गढ़वाली हास्य -व्यंग्य 

 सौज सौज मा मजाक मसखरी 

   हौंस,चबोड़,चखन्यौ     
    सौज सौज मा गंभीर चर्चा ,छ्वीं   

                         अपण कमजोरि  तैं तागतम बदलणो कुछ टुटब्याग/ब्यूंत   

                              चबोड़्या - चखन्यौर्या: भीष्म कुकरेती (s = आधी अ ) 

 कमजोरी हरेक मा होंदी अर हरेक चाँद बल वैकि कमजोरि तागत मा बदली जा। टुटबग्या खटरागी  ब्यूँताचार्य न कुछ ब्यूंत बतायाँ छन जाँ से कमजोरि तागत मा बदले जै सक्याँदन।
जन कि जडू मा तुमम कोट- स्वेटर नि ह्वावो तो अपण कमीजो बटन खोलि रौब से हिटो अर हठ योग पर भाषण द्यायो बल मनुष्य तैं अपण शरीर तैं जलवायु सहन करण लैक बणावो।
मोडर्न जुत  खरीदण लैक पैसा नि ह्वावन तो 'आधुनिकता हमारी परम्परा अर संस्कृति को छत्यानाश  करणी  च' को आन्दोलन चलाओ।
ज  तुमम हापूस आम खरीदणो पैसा नि छन तो दुनिया तैं बिगुल बजैs बथाओ कि आम खाण से क्या क्या नुकसान ह्वे सकद। ह्वै साको तो अंटी मैंगो कंजंम्पसन संस्था बणावो अर चंदा लेकि हापूस खावो।
यदि तुम छुट कद का छवां तो विष्णु को वामनावतार का जागर गावो अर लम्बा छंवा तो अमिताभ बच्चन को फोटो गौळम लटकिक लम्बू दादा का गीत गावो।
जब काळ बेटों ब्वायो टैम आवो तो भगवान कृष्ण अर भगवान राम का सांवला रंगों वन्दना करण लाजमी च।
बेटीन अंतरजातीय विवाह करि द्यायि त आधुनिकता का गुण गावो अर बेटी घरबैठि हो तो परम्परा की दुहाई द्यावो 
जु तुम कॉंग्रेसी छंवा अर उत्तराखंड का छंवां तो नरेंद्र मोदी तैं  उत्तराखंड माँ विकास नि हूणों जुमेवार ठहरावो।
हां जु तुम उत्तराखंड का भारतीय जनता पार्टी का नेता छंवां अर क्वी डा रमेश  निशंक पर  भ्रष्टाचार का आरोप लगावो तो प्रधान मंत्री मनमोहन सिंह से इस्तीफा मांगो।
यदि तुम भारतीय जनता पार्टी का लो सभा या राज्य सभा को सदस्य छंवां अर कै बि छुटभया  भाजापाई नेता पर लांछन लग तो लोक सभा की कारवाई रुकवै द्यावो।
यदि तुम बोर्ड ऑफ क्रिकेट कंट्रोल ऑफ इंडिया का अध्यक्ष छंवाँ अर कै क्रिकेट खिलाड़ी  पर सट्टा खेलणो खबर बि आवो तो वै खिलाड़ी तैं त बगैर असलियत जण्या बर्खास्त कारो अर यदि बीसीसीअई को सदस्य या तुमर जंवाई सट्टा खिलदा पकड़े ग्यायी तो ब्वालो न्यायिक जांच को आखरी  परिणाम से पैल हम क्वी कार्यवाही नि करी सकदवां।
 जु तुमर नौनु इमतान मा फेल ह्वै ग्यायि तो दुनिया मा परीक्षा पद्धति का विरुद्ध गाळी गलौज कारो।
यदि तुम अपण नौनु तैं अंग्रेजी स्कूलम भिजण लैक नि छंवाँ तो राष्ट्र भाषा अर स्थानीय भाषा का गुण गावो।
जु तुमर ट्रांसफर मन मुताबिक़ ह्वे जावो त चुप रावो अर यदि ट्रांसफर मन मुताबिक़ नि ह्वावो तो ट्रांसफरम भाई भतीजावाद अर भ्रष्टाचार पर भाषण भीषण करो।
पड़ोसी तैं बेलो पौवर्टी लाइन को कार्ड मीलि जावो पटवरि पर घूसखोरी क अभियोग लगावो .
जु तुमर भितर जुत रखणो जगा नी च तो द्वार पर पट्टी लगावो जख मा लिख्युं ह्वावो -कृपया अपना घमंड-गुस्सा  और अपने जूते बाहर ही उतारें .
जु तुम प्रवासी गढ़वाळी कवि या लिख्वार छंवाँ अर भौत दिनों से कुछ समज मा नि आणु कि क्या लिखे जावो तो पलायन पर ल्याखो या तू ह्वेलि बीरा घसियार्युं का भेष माँ की नकल करी क्वी करुण रस की कविता लिखण शुरू कौर द्यावो 



Copyright @ Bhishma Kukreti  24/05/2013            
(लेख सर्वथा काल्पनिक  है )