उत्तराखंडी ई-पत्रिका की गतिविधियाँ ई-मेल पर

Enter your email address:

Delivered by FeedBurner

उत्तराखंडी ई-पत्रिका

उत्तराखंडी ई-पत्रिका

Monday, May 7, 2012

रिफौर्म भुलि हरान किलै च?

चबोड्या चखन्यौर्या : भीष्म कुकरेती
 
स्टॉक मार्केट (सेबिक जंगळ मा घास कटद  दें धाई  लगान्दी ) : ए रिफौर्म भूलि! ए भूलि रिफौर्म !
रिफोर्म (कळकळि अवाज मा)  :हाँ ए दीदी .
स्टॉक मार्केट- क्या कनि छे ए भूलि?
रिफौर्म - बस,  अपण त इकु  धर्म च गोब्लिआइजेसन अर  म्यार काम च बस  मातबरों या सेठों तै हौरी जादा  मातबर बणाण अर दगड मा गरीबों तै हौरी बि गरीब बणाण.
स्टॉक मार्केट- ह्यां इ त म्यार  बि जन्मजाति पंथ च बल छ्व्टा छ्व्टा निवेशकों से थ्वड़ा थ्वड़ा  पूँजी लूठिक धनी लोगूँ तिजोरी भरण. पण अबि क्या करणि छे?  
रिफौर्म- ह्यां अच्काल त वर्ल्ड बैंक , आई.एम् ऍफ़ बैंक, अमेरिकी , अंग्रेज, जापानीज गलादरों दियुं काम करणो छौं अर खुले आम गरीबुं  फसल काटिक यूँ गलादारों  कुठार भरणो छौं. अर तु  क्या करणि छे?
स्टॉक मार्केट- बस तकरीबन स्यू  इ काम करणो छौं.  छ्वटा  छ्वटा निवेशाकुं तै पुळयाणु  छौं अपण जमीन जायजाद बेचिक स्टॉक मार्केट मा लगाओ. पण अच्काल यि छ्वटा  छ्वटा निवेशक बि चलाकी सीखी गेन.
रिफौर्म- अरे यि गरीब लोक कथगा बि चालाकी, हुस्यारी  सीखी जैन धौं एक दै हमर छ्का पंजा मा ऐ  जैन धौं फिर यूंक क्या मजाल कि हमर दंस से बची जावन! उ द्याख णि च अफ्रिका क देसूं मा, अर्जंटाइना, यूनान मा. म्यार छाकर मा फ्न्स्याँ छन अर अब दुःख बि मी छौं अर दवा बि मी ई छौं. अब यून्का यि हाल छन बल ना त यूँ से सयांद अर ना इ फिक्यांद.    
स्टॉक मार्केट- हाँ या बात त सै च.
रिफौर्म- अब तू  अपण इ हाल देखी लेदी. जो स्टौक मार्केट का बल पर फैकटरयुं मालिक बण्या छन ऊंका निवेश नाम मातरो हुंद पण कमाई अर ठाट जन बुल्या राजा महाराजा ह्वावन धौं. अर स्टौक मार्केट मा या फैक्ट्री मा नुकसान ह्वाओ  त सरकारी बैंक डुबदन, गरीब निवेसकों पैसा डुबद  या सरकाओ खजानों लुट्यान्द. फ़ोकट का मालिकों त मजा इ रौंदन.
स्टौक मार्केट: हाँ त बुना ! रिफोर्म माने अमीरुं कि खुकली भौरों अर गरीबों क खुकली साफ़ कारो.
रिफौर्म : वो बिगळी बात च अलग छ्वीं छन बल  मेरी बात मा सबसे जादा बात गरीबी भगाणो कि इ करे जांदी.
स्टौक मार्केट : ए भूलि उन त मी बि अच्काल हरान हुयुं छौं पण ए रिफ़ॉर्म  भूलि तू जादा कमजोर दिखेणि छे अच्काल. क्या बात च?
रिफौर्म- ए दीदी ! अब क्या बुलण जब बिटेन यि बहु दलीय  सरकारन मै तै  घर बिठाळ   म्यार हाल कुहाल होणा छन .
स्टौक मार्केट: औ हाँ हाँ ..
रिफौर्म : अब देख ना मै तै अबि रिटेल मा फोरेन इन्वेस्टमेंट को भात-दाळ अर्जेंट चयाणो च त वा मेरी अपणि ख़ास नणद ममता बनर्जी कोपखाना चलि जांद अर बुल्दी बल रिटेल मा इन्वेस्टमेंट कु भात-दाळ  इख नि लाण. उना म्यार दूरै  रिश्ता की नणद नी च वा मायावती  वै बि बार बगत पर रिटेल मा फोरेन इन्वेस्टमेंट को भात-दाळ चलाण रुकवै दीन्दी. अब म्यार ससुर बिचारो मनमोहन जी ,  क्या जी कारो. वु त बिचारा चैक बि चुप ह्व़े जान्दन.
स्टौक मार्केट; हाँ भै यीं ममता क बि क्या बुलण भै!  अपण  ससुरास बंगालौ कुण  डबल भैरिक रूप्या त चयाणा छन पन ना  त यीं तै टाटा क इन्वेस्टमेंट सुहांद अर ना इ फोरेन इन्वेस्टमेंट. ये भै क्वी ईं तै पूछण वाळ बि नी च ये भै  या त अपण  जमीन ब्याचो, अपण खान ब्याचो, अपण जंगल ब्याचो, अपण नाक नथुली ब्याचो  अर फिर पैसा मांगो. ना,  नथुली बि नि बिचण  अर फोकट मा रूप्या बि चयाणा छन. इन कखी हुंद च क्या?
रिफोर्म: हाँ त बुनाई ! अब फोरेन इन्वेस्टमेंट अर अपण जमीन ब्याचो जन खाणक मै  तै नि मीलल त मीन कनकै ज़िंदा रौण.
स्टौक मार्केट: कै डाक्टर तै बि दिखाई कि ना ?  
रिफौर्म: कनी दिखाई . प्लानिंग कमीसन, अमेरिका का कथगा इ कंसलटेंटु  तै मीन नब्ज दिखाई अर सबि एकी रिपोर्ट दीणा छन बल भारत तै भैर देसूं सेठुं मा हौर जमीन बिचण पोडल तबी मेरी हालत मा सुधार होली .
स्टौक मार्केट; हाँ पण अच्काल त बिजोग इ पोड़ी गे हमर पैलो खसम एन .डी ए. बि अच्काल हम दुयूं कुणि दुश्मन बण्यु च भै.
रिफौर्म: हाँ ये दीदी जब तक एन .डी ए. हमर खसम/पति छयो त हम कुणि बनी बनी क फोरेन इन्वेस्टमेंट को भात लान्दो छौ अर अब हमर नै खसम यूपीए हमखुणि फोरेन इन्वेस्टमेंट को खाणक लाणै बात बि करदो त य़ी एनडीए ये बवे , अग्यो  करण बिसे जांद. 
स्टौक मार्केट; ह ए भूलि अच्काला खसम बड़ा स्वार्थी ह्व़े गेन . पण  तीन अपण मैत खबर त दे इ याल कि ना ?   
रिफौर्म: रैबार कबो भेजी आल. अब सी भो ल मेरी मौसी हिलेरी क्लिंटन कन आणि च अब वा मेरी नणद  ममता बनर्जी अर पुराणि नणद सुषमा स्वराज से मिलण वाळ च.
स्टौक मार्केट; औ त मेरी बि तब्यत सुदरी जाली . या  हिलेरी क्लिंटन भौत हुस्यार च हाँ!
रिफौर्म: हाँ मी तै पूरो विश्वास च अब भारत की जमीन फिर से खूब बिकली , लोगूँ नाक नथुली बिकली अर हम दुयुंक तब्यत सुदरी जाली.
स्टौक मार्केट; त्यार मुखुम घ्यू शक्कर भै
Copyright@ Bhishma Kukreti , 7/5/12

No comments:

Post a Comment

आपका बहुत बहुत धन्यवाद
Thanks for your comments