गढ़वळि बाल साहित्य -5
साग- भुज्युं राजा को च ?- खांडि ( भाग) -2
भीष्म कुकरेती
(s=-माने आधी अ )
(यां से पैलौ फाड़ी/खांडि म आपन पौढ़ बल कन साग भुज्युं मा राजा बणनो बान प्रतियोगिता ह्वे। एक बुडड़ि तै छाण-निराळ करणों बोले गे। पेल ड्यूरेबिलिटी/जादा उम्र को हिसाबन प्याज अब्बल आई अर खीरा (कद्दू ) दुसर नम्बर पर आई । अब अग्वाड़ि बांचो ...)
बुडड़ि - उमरो या ड्यूरेबिलिटी हिसाब से त प्याज भुज्युं महाराजा अर खीरा राजा ह्वाइ।
सबि - न्है ! न्है ! यो न्याय-निसाब ठीक नी च, कै माँ क्या क्या विटामिन , क्या मिनरल च यांको बारं बि सूत भेद लिये जाण चयेंद।
बुडड़ि - ठीक च। अब तुम एकैक कौरिक बथावो बल तुमम क्या क्या विटामिन छन अर यि विटामिन क्या क्या काम आन्दन।
सबि- नै नै पेल हम तैं निस्तार करण पोड़ल बल कु विटामिन क्या क्या कम आंदो।
बुडड़ि - हां या बात बि सै च। जरा बथावदि बल कथगा विटामिन होंदन अर यूंक क्या गुण होंदन।
च्यूं -अब तलक तेरा विटामिनु बाराम पता हुयुं च।
बुडड़ि - बिलकुल सै बात। हां ये लिंगड़ ! इन बथादि बल विटामिन ए -A की कमि से क्या होंद अर बिंडी विटामिन A की मात्रा से क्या नुक्सान हूंद?
लिंगड़- विटामिन ए की कमि से रतौंधी ,हाइपरकिरोटिसिस अर किराटोमालेसिया जन बीमारी ह्वे सकद। जु बिंडी विटामिन A की मात्रा ह्वेलि त हाइपरवितामिनोसिस A की बिमारी ह्वे सकद।
बुडड़ि - शाबाश। बिलकुल सही उत्तर। हे खुंतड़ इन बथादी बल विटामिन A का सोर्स क्या छन या विटामिन A कै कै साग भुज्जी अर खाणो से मिल्दो?
खुंतड़- नारंगी,पीला पक्याँ फल,हरा पत्तों साग ,पळिन्गु, खुंतड-लिंगड़, हौरु बसिंगो, गाजर,खीरा (कद्दू ) ककड़ी . अर ढिबर-बखरो फेफड़ों से विटामिन A मिल्दो।
बुडड़ि - सही उत्तर। हाँ ये गाजर ! इन बथादी बल विटामिन बी1 क्या च?
गाजर- विटामिन बी1 माने थियामाइन अर विटामिन बी1 की कमि बेरी-बेरी (जलोदर जन ),वर्निके-कोर्साकोफ सिंड्रोम की बिमारी सकद। अर जाद्तिन मांश पेशी क बिमारी
बुडड़ि - विटामिन बी1 को सोर्स क्या छन/
गाजर- जौ,भूरो चौंळ, जुंडळ, हरी सब्जी, च्यूं, अलू गोभी, मटर, हरो लुब्या-सूंट, गोभी, सुखा मेवा, , अंडो आदि से विटामिन बी1 मिल्दो।
बुडड़ि - वाह, बहुत सही जबाब! हाँ त हे खीरा जरा विटामिन बी2 क बाराम बथादी
खीरा-विटामिन बी2 माने रिव्लोफ्लैविन। विटामिन बी2 की कमी से ऐरिबोफ्लैविनोसिस हूंद।विटामिन बी2 दूध,क्याळा,भुज्यां मुंगरी,हरा लुब्या -सूंटो, बंसक्यळ आदि से मिल्दो
बुडड़ि -या हवे ना बात ! राईट आनसर। हां त ये मूळा जरा इन बथादी बल विटामिन B3 क्या च ?
मूळा- विटामिन B3 को मतलब हूंद नियासिन ।विटामिन B3 की कमि से पेलाग्रा याने चमड़ा फटणै बिमारी होंद त विटामिन B3 की जादतीन यकृत खराब हूंद।
बुडड़ि - त्वे तै ज्ञान च। अब बथादी विटामिन B3 का स्रोत्र क्या क्या छन?
मूळा- विटामिन B3 का स्रोत्र खजूर, टमाटर,हरी भुजि,गाजर, शकरकंदी,दाणेदार अनाज, दलहन,च्यूं,शिकार, नट्स-अखोड़ , काजू आदि छन।
बुडड़ि - होसियारों हुसयार छे रे तू। अच्छा ! हे पिंडाळु ! विटामिन B 5 को बाराम बथादि
पिंडाळु-विटामिन B 5 माने पैंटोथिनिक ऐसिड। विटामिन B 5 की कमिन पारेस्थिसिया रोग हूंद त जादतिन डीएसटी हवे जान्दन।उन सबी खाणों चीजुंम थ्वड़ा-थ्वड़ा विटामिन B 5मिलदो पण शिकार अर अनाजों छुक्यलम जादा मिलद।
बुडड़ि - तीन बि सही जबाब दे भै ! ये भै मर्सू जरा विटामिन B 6 क बाराम बथादि
मर्सू -विटामिन B 6 माने पाइरिदौक्सिन आदि। यो विटामिन अलग अलग अनाज . भुज्युंम पाए जांदो। विटामिन B 6 की कमिन एनीमिया, नर्वस सिस्टमम खराबी हूंद अर इनि जादतीन बि नर्वस सिस्टमम खराबी ऐ जंद।विटामिन B 6 शिकार, कळेजि,अनाजों दाणम, भुज्युंम जनकि -गाजर, गोभी, मुंगरी , प्याज, ,दूध, अल्लू , ककड़ी, क्याळा, काफळ, डंफु आद्युंम पाए जांद अर खाणों गरम करण से विटामिन B 6की मात्राम कमी आन्द जांद।
बुडड़ि - छे त तू छ्वटु सि पण छे तु ज्ञान से भरपूर। ये कंडाळि ! विटामिन B H/7 को बाराम तू क्या जाणदि?
कंडाळि ! विटामिन B H या 7 माने बिओटिन। विटामिन B H या 7 काचो अंडाक पीलो भागम, कळेजि, कुछ भुज्युंम पाए जांद।
बुडड़ि -भलो! भलो! सही उत्तर। हे! सिमळो घ्वागा! जरा विटामिन B 9 क बाराम बथादि।
सिमळो घ्वागा- विटामिन B 9 कुणि फोलिक एसिड बुल्दन अर यांक कमि से मैगालोबलास्ट क अलावा गैबण जनान्युंम फोलिक एसिड की कमी से बच्चा जनम पर फर्क पोड़द। विटामिन B 9 हरा पत्तों भुजि,अनाज, रुटि, कळेजिम मिल्दो।
बुडड़ि- मान गये उस्ताद। हां भै तैड़ू ! जरा विटामिन B 12 क बाराम खुलासा करदि
तैड़ू- विटामिन B 12 कुण कोबेलामिन बि बुल्दन। विटामिन B 12 शिकार अंडा अर कुछ बैक्टीरियाओंम मिल्द।
बुडड़ि- सही जबाब। हे बसिंगू !तू विटामिन Cक बाराम क्या जाणदि?
बसिंगू- विटामिन Cक नाम ऐस्कौरबिक एसिड बि च। विटामिन C की कमिन स्नायु रोग हूंद .विटामिन C सेव, आड़ू, क्याळा,अन्गूर, काफ़ुळ,लिंबु,नारंगी, लीची, आम, खीरा, टमाटर, गोभी,ककड़ी, तोरी,च्यूं, प्याज, मटर,अल्लु,मूळा,पळिङ्गॊ,भट्टा,
बुडड़ि-राईट आनसर। हां भै राइ विटामिन D क बाराम क्या च ?
राइ- विटामिन D तैं कोलेकैलसिफिरोल बुल्दन अर च्यूं, अंडा,कळेजिम खूब पाये जांद।विटामिन Dक कमिन रिकेट्स जन बिमारी अर ज्यादतीन हाइपरविटामिनोसीस हूंद।
बुडड़ि-लाजबाब जबाब। गुदड़ी जरा विटामिन E पर प्रकाश डाऴदि।
गुदड़ी- विटामिन E कुण टोकोफिरोल्स बुल्दन।विटामिन E की कमि से नुक्सान कबी कबि ही हूंद।विटामिन E गाजर, बंसक्यल, गोभी, मुंगरी, ककड़ी परिवार, भट्टा,हरो मर्च,हरी फली,भिंडी,प्याज, खीरा आलू , मटर , हरी भुजि आदिमा मिल्द
बुडड़ि- गुदड़ी के लाल ! हे च्यूं ! जरा इन बथादी बल विटामिन K क्या च?
च्यूं- विटामिन K माने फिलोक्विनोन अर विटामिन K का मुख्य स्रोत्र छन -हरी सब्जी अंडा, कळेजि आदि।
बुडड़ि- भौत बढिया उत्तर ! अब तुम सौब इन बथावो बल क्या विटामिनो आधार पर साग भुज्युं राजाक पछ्याणक ह्वे सकद ?
सबि - नै नै ! कै ना कै भुजिम एक महत्वपूर्ण विटामिन त होंदि च।
बुडड़ि- त क्या करे जावु?
सबि - मिनरल्स अर प्रोटीन आदि क हिसाबन छाण-निराळ हूण चयेंद।
बुडड़ि- ठीक च भोळ मिनरल्स अर प्रोटीन आदिक हिसाबन छाण-निराळ होलू की क्वा भुजि राजा च।
Copyright@ Bhishma Kukreti 18/02/2013
साग- भुज्युं राजा को च ?- खांडि ( भाग) -3 म बाँचो ......
No comments:
Post a Comment
आपका बहुत बहुत धन्यवाद
Thanks for your comments