उत्तराखंडी ई-पत्रिका की गतिविधियाँ ई-मेल पर

Enter your email address:

Delivered by FeedBurner

उत्तराखंडी ई-पत्रिका

उत्तराखंडी ई-पत्रिका

Tuesday, November 6, 2012

अमिताभ बच्चन कु बंगलौ भूगोल अर चीनै सामरिक शक्ति

Critical review of Garhwali satirical prose- 87

चबोड़ इ चबोड़ मा

                   अमिताभ बच्चन कु बंगलौ भूगोल अर चीनै सामरिक शक्ति

                             चबोड्या : भीष्म कुकरेती

 

कै बि देसै प्रगति-बढ़ोतरी, रक्षा माँ सरकार की चेतना, जनता की चेतना द्वीइ जरूरी होंदन . अर यि एक हैंक पर असर डाळणा रौंदन .

 

यु दिखे ग्याई बल रक्षाक मामला माँ हम आम लोग फकोरिक बौंहड़ सियां रौंदा अर हम तै पोड़ी बि नि रौंदी बल सरकार रक्षा मामला मा कथगा चितळ च . इख तलक कि हमारा नेता जु फोकटौ फड्याण मा रोज वर्ल्ड रिकॉर्ड तुडणा रौंदन अर रोज ऐं वै बुलण मा वर्ल्ड रिकौर्ड बणाणा इ रौंदन वूं तै बि नि पता कि रक्षा क्या होंदी . पोर परार न्यूक्लियर डील बिल पास होणै दै सब्युं पोल खुल कि जो न्यूक्लियर डील बिल समर्थन करणा छ्या अर जो विरोध करणा छया दुयुं तै नि छौ पता कि न्यूक्लियर डील छ क्या च? बस द्वी पाळी वळा ढोल दमौ त बजौणा छा अर कै नि पता कि हम जु ढोल दमौ बजौणा छ्न्वां यु संग्रांदी बजौण च कि बरजात खुलणो बजाणा छंवां

 

जनता मा रक्षा प्रति चेतना कथगा इ तरां से आंद .

 

एक जरिया हमारा पत्रकारिता संसार बि च . जु जनता मा रक्षा प्रति लोगुं तै चितळ करांदु . पण मै नि लगदु प्रजातन्त्रौ चौथु खाम यिं जुमेवारी निभाणु च . एकाद टीवी न्यूज चैनेल छोड़िक बकै चैनेल त सोप ओपेराओं का एजेंट छन .

 

हम सबि जाणदा भोळै लड़े दारुम्दार वायु सेना पर इ रालो अर हम तै जादा ना सै थोड़ा भौत पाकिस्तान अर चीनै वायुसेना शक्ति कु ज्ञान जरूरी च . किलै कि हमारी जन चेतना सरकारी चेतना वास्ता जरूरी च . अर यांकुण पत्रकारों तै बि अपण मिळवाक दीण जरूरी च।

पण जादातर हमारो पत्रकार समाज सियुं सि दिख्यांद .

 

हमारा पत्रकार इन खुज्याण मा त अग्वाड़ी रौंदन कि कतरीना कैफ कु बचपनौ नाम क्या छौ पण यी पत्रकार इन बताण मा शरमै जान्दन कि चीनौ एयर फ़ोर्स कु नाम 'पीपल'स लिब्रेसन आर्मी एयर फ़ोर्स '

 

हमारी जनता बि कम नी च हम तै यो पता च कि फलाणों फ़िल्मी ऐक्टरो बंगला कथगा बड़ो च पण गौ बुरी चीज जो हम तै खबर ह्वाओ कि चीनी हवाई सामरिक शक्ति अमेरिका, रूस का बाद दुनिया मा तीसरी बड़ी शक्ति च।

 

पत्रकार यी जरूर बथांदन कि शाहरुख खान का कथगा चौकीदार छन पण इन बथांद दै यूं पत्रकारों गिच पर बुज्यड़ जांदो कि चीन क एयर फ़ोर्स माँ तकरीबन 3, 3,30000 वायु सैनिक अर 26000 नाविक वायु सैनिक छन .

 

हमारा देसौ पत्रकार इन ढोल बजै बजैक बथांदन फलाणा टी वी सीरियल का सेट मा इथगा अलमारी , इथगा सोफा सेट , इथगा कुर्सी छन पण इन बताणो बगत पर यि पत्रकार मूंड तौळ बीड़ी पीण बिसे जांदन कि चीनौ एयर फ़ोर्स मा 2500 से बिंडी एयरक्राफ्ट छन अर नेवल फ़ोर्स मा 570 से बिंडी एयरक्राफ्ट छन

 

हमारा जागरूक पत्रकार ऐश्वर्या राय -बच्चन अर करीना -सैफऔ ब्यौ मा एक एक चीजौ अंतर बथाण मा एक हैंकाक दगड़ मारकाटी प्रतियोगिता करदन पण चीन अर भारतौ एयर फोर्सुं मा क्या क्या अंतर च की बातौ बारा मा ना त गिच खुल्दन ना इ कलम पैऴयांदन।

 

हमारा पत्रकार अमिताभ बच्चन का ड्यारो भूगोल का बारा मा तजबिज से दसो पना मा व्योरा दीन्दन पण ये मेरी ब्वे चीनौ एयर फ़ोर्स बेजिंग मिलिट्री रीजन , चेंगडु मिलिट्री रीजन, गुआन्ग्झू मिलिट्री रीजन ,जिनान मिलिट्री रीजन,लानझोऊ मिलिट्री रीजन, नानजिंग मिलिट्री रीजन,सेन्यांग मिलिट्री रीजन, 15 वीं एयरबोर्न कोर्प्स माँ प्रशाशनिक ढांचा मा बंटी च लिखद दै यूं पत्रकारों स्याई सूख जांदी .

 

हमारा पत्रकार कै फिलमौ रिसर्च कै तरां से हुणि च की खोज मा दिन रात लग्याँ रौंदन अर बथान्दन कि यशराज फिल्म की रिलीज से अजय देवगन पर क्या फरक पोड़ल पण चीन की नई वायु सेना शक्ति से भारत पर क्या फरक पोड़ल खुज्याणों बगत पर इ लोग बैंकोग पटाया जात्रा पर चली जांदन .

 

वो समौ अब नि रै गे कि रक्षा की चेतना सरकारी महकमा तक सीमित राव आज समौ ऐ ग्याई कि हम बि रक्षा का मामला मा थ्वड़ा भौत चितळ रौंवां। सबि जुमेवारी सरकारऔ मौणि मा धरण ठीक नि होंदी बल्कण मा कुछ जुमेवारी अपण मुंड मा धरण बि जरूरी होंद , जन की चीन की सामरिक शक्ति बारा मा जनता तै बि सजग रौण चएंद . जनता की सजगता ही सरकार तै सही निर्णय दिलाण मा सहायक होंदी .

 

Copyright@ Bhishma Kukreti 7/11/2012

 

No comments:

Post a Comment

आपका बहुत बहुत धन्यवाद
Thanks for your comments