कास ! म्यार पति बि सरकारी इंजिनियर हूँदो !

गढ़वाली हास्य व्यंग्य

चबोड़ इ चबोड़ मा

                    कास ! म्यार पति बि सरकारी इंजिनियर हूँदो !

                         चबोड्या : भीष्म कुकरेती

मेरि कज्याणिन खिजेक ब्वाल , " हूँ ! तुमार दगड़ रैकि क्या पाइ ? तुम से बढ़िया त वी इंजिनियर इ ठीक छौ . छ्याई त काळो अर स्याड़ो पण इथगा बेज्जती त नि होंदी ... !"

मीन पूछ ," ह्यां कु इंजिनियर अर क्यांकि बेज्जती ?"

वींन जबाब दे," जु इंजिनियर तुमसे पैल मि तै दिखणो ऐ छौ , एक दै त मि बि मानि गे छौ , पण तैबरी तुमारि फोटो अर जन्मपत्री बि ऐ गे छे ."

मीन बोलि ," अर मुहल्ला मा क्यांकि बेज्जती ?"

वींन ब्वाल , " तुमर जगा उ सरकारी इंजिनियर हून्द त हमारो ड़्यार अम्बानी या डाबर जन अमीर लोगुं नजीक होंदु ."

मीन पूछ , " त .."

वा अनसुणि ह्वेक बुल्दी गे ," हमर ड्यार घूस का पैसों बुसड़ होंदु , घूस का रुप्यों कठघळ होंदी अर हम उं रुप्यो कठघळ मा सीड्युं से चढ़दा।"

मीन ब्वाल , " अर इनकम टैक्स , ई डी वळा सिंयां रौंदा ?"

वा बुल्दि गे ," इनकम टैक्स का क्वी टंडन जन दयालु अधिकारी हम तै सलाह दींदु बल जब भारत मा काळो धन तै विदेसी खासकर स्विस बैंको मा जमा कराणै सौ सुविधा च त घौरम काळो रूप्यों कठखौळ लगाणै जर्वत क्या च ?"

मीन पूछ , " त ?"

वा बुल्दि गे , " फिर टंडन जन इनकम टैक्स अधिकारी हम तै जेनेवा क एक फोन नम्बर दीन्दो . हम वैबरी टंडन जी क नौनु तै अपण टैक्स अर फिनेंसियल कन्सल्टेंट बणाइ दीन्दा ."

मीन पूछ , " फिर ?"

वींन ब्वाल , " फिर म्यार सरकारी इंजिनियर हजबेंड स्विस बैंक को वै नम्बर पर फोन लगांदो। त उख बिटेन जबाब मिल्दो, " अपण पता द्याओ हम अपण प्रतिनिधि तुमर ड्यारम भिजणा छौवां "

मीन पूछ , " फिर ?"

वींन ब्वाल , " फिर हमर पता बतांद इ वै स्विस बैंको प्रतिनिधि हमर ड्यारम ऐ जांदो ."

मीन ब्वाल , " फिर "

वींन ब्वाल , ' फिर वो बैंक ऐजेंट हमारो फॉर्म भरदो . हम तै बैंक अकाउंट नम्बर अर गुप्त कोड नम्बर बतांदु "

मीन पूछ ," फिर ?"

वींन अग्नै ब्वाल , ' फिर हम वै ऐजेंट तै अपण रुप्यों कटघळ दिखांदा . वू एजेंट रूप्या गणनों कुणि द्वी चार चार्टेड अकौंटेंट मजदूरों तै बुलांदु . वो चार्टेड अकौंटेंट मजदूर बुसड़ो अर कठखळौ रूप्या गणदा अर .."

मीन पूछ , " अर फीर "

वा बुल्दि गे ," फिर आठ दस एम कौम मजदूर आंदा अर वो हमर रूप्या ट्रक मा चढै दींदा . इना एम कौम मजदूर हमर काळो रूप्या ट्रक मा चढाँदा उना जेनेवा बिटेन फोन ऐ जांदो कि हमर अरबो रुपया स्विस बैंक मा जमा ह्वे ग्याई . हम तै बड़ो चैन मिल्दो ."

मीन पूछ , "क्यांक चैन ?"

वींन दनकांद दनकांद ब्वाल , " अरे भारत मा , घौरम बैठ्याँ बैठ्याँ हमारो अरबो रुपया स्विट्जर लैंड का बैंको मा जमा ह्वालो त हम तै चैन नि आलो ?"

मीन पूछ , " फिर ?"

वींन गम्भीर ह्वेक ब्वाल , " फिर हम टंडन जन इनकम टैक्स अधिकारी क सलाहानुसार कै टैक्स हेवन देस जन कि सेंट किट्स आई लैंड या मोरेसिस मा एक कंपनी खोल्दा ."

मीन पूछ , ' त तुम तै कंपनी रजिस्टर करणों बान उख जाण पोड़दो ?"

मेरी घरवाळि न ब्वाल , " ना ना ! उ बि एजेंटो परतापन इखि रैक कंपनी रजिस्टर ह्वे जाली ."

मीन पूछ , ' अर कंम्पनी क पता या एड्रेस?"

वीन राज ख्वाल , " उख पोस्ट बौक्स का पता पर कंम्पनी रजिस्टर करै सकद्वां . यूं देसुं तै एक या द्वि परसेंट सर्विस चार्ज दीण पोड़द बस "

मीन पूछ , " फिर ?"

वींन ब्वाल , " फिर हम स्विस बैंक से रुपया यीं मौरेसिस की कंम्पनी मा ट्रांसफर करौंदा ."

मीन पूछ , " फीर ?"

वीन रहस्य बथाई , " फिर हम मौरेसिस कंम्पनी से फौरेन इन्वेस्टमेंट स्कीम का तहत ये रुपया तै भारत मन्गौंदा अर भारत मा इज्जत से बिजनेस करदा ."

मीन पूछ , " फीर ?"

वीन बताई , ' हमारा वित्तमंत्री बयान दीन्दा कि भारत मा ऍफ़ डी आइ मा बढ़ोतरी हुणि च . हम बि सूखि अर भारत सरकार बि सूखि "

मीन पूछ , " अर जु पकड़े गे त ?"

वींन ब्वाल , " पैल त पकड्याणों चांस नि आंदो . पकड़े बि ग्याई त हमारी न्याय प्रक्रिया मा देरी से आठ दस साल इनि निकळ जाला "

मीन पूछ , "अर जु न्याय प्रक्रिया जल्दी पूरि ह्वे ग्याई त ?"

वीन घमंडम ब्वाल , " त क्या ह्वाई हजबेंड तै द्वी चार सालै जेल ह्वेलि अर क्या ?"

मीन पूछ , " अरे हजबेंड तै द्वी चार सालै जेल होलि अर तु बुलणि छे कि क्या ह्वाई ?"

वींन समझाई , " इखमा क्या च . एकाक त्याग से सात पुस्तों की गरीबी त दूर हवेलि कि ना ?"

मीन पूछ ," बाई द वे , तुमारो वो इंजिनियर अजकाल कख च ?"

वीन दुखी ह्वेक बथाई , "बिचारो तै सात साल की जेल ह्वे ग्याई . द्वि मैना बिटेन जेल मा च ."

मीन पूछ , " अर वैका परिवार का त बुरा हाल होला ?"

वीन खुलासा कार , " वैका सरा परिवार स्विट्जरलैंड शिफ्ट ह्वे ग्याई अर उं सब्युं तै स्विट्जरलैंड की नागरिकता मीलि गे . सब सुखी छन ."

मीन ब्वाल , " मतबल हर युग मा बाल्मीकी अपुण परिवारौ बान चोरी करदो अर परिवार त मजा करदो पर पाप को भागी बणदो सिरफ अर सिरफ बाल्मीकि "

Copyright@ Bhishma Kukreti 11/11/2012