इ रूणा किलै छन ?

गढ़वाली हास्य व्यंग्य

हौंसि हौंस मा, चबोड़ इ चबोड़ मा

                     इ रूणा किलै छन ?

                   चबोड्या : भीष्म कुकरेती

- ये मेरि ब्वे ! इ ग्राम प्रधान, सरपंच , ब्लॉक प्रमुख इन ह्यळि गाडि गाडिक किलै रूणा छन ? यूंका -क्वी सगा मोरि गे क्या ?

-अरे कैको धरम बुबा मोरि जावो त यूंन निरस्येक रूणि इ च कि ना ?

-अरे पण धरम बुबा मोरण पर इन ह्यळि ? अरे इन लगणु च जन बुल्यां यूंन भुकि मोरि जाण . इन लगणु च जन बुल्यां मोरण वळो दगड़ यूंको पाणि धार बि बिसकि जालो अर यूं सब्युनं तिसा मोरि जाण

-हां ! हां बुन्याल यूंका घास -तेल -पाणि इंतजाम करण वळो जि सोरग जोग ह्वे गे .

-हें

-हां जी

- अर यि क्या फंड धुऴया, काम बिगड्या, दल्ला बि इनि रोणु च जन बुल्यां यु रंड्वा ह्वे गे ह्वाउ, यु त दुखम इन रूणु च जन बुल्यां एकी सरा कुटुमदारि इकसुठी छुरे गे होलि धौं

- अरे जु भिखार्यु भीक मांगणो जगौ दल्ला जब कैक परतापन भौत बड़ो ट्रेडिंग एजेंट बौणि जावो अर इनमा जब गौड फादर मोरि जावो त ये दल्ला खुणी त एकी सरा कुटुमदारि इकसुठी छुरे गे भै

-हैं मोरण वळो ए दल्ला कु बि धरम बुबा छौ ?

-हां- ये भै ! सि शराब बिरोधी सामाजिक कार्यकर्ता त माटो मा दुखन धृतराष्ट्र जन रतबऴयाणु च जन बुल्यां येको पूरो खानदान इ सफाचट ह्वे गे हो धौं

- जु दिनम शराब विरोधी आन्दोलन चलाओ अर रात शराबो ठेकेदार बिटेन चंदा ल्याओ अर इनमा शराबो ठेकेदार मोरि जावो त ये महान सामाजिक कार्यकर्ता बान पूरो खानदान इ सफाचट ह्वे गे कि ना ?

- त मोरण वळो शराब माफिया छौ

- नै वो त गवर्मेंट अप्प्रूव्ड लिकर डिस्ट्रिब्युटर छौ

- हैं ! सि सार्वजनिक निर्माणों धुर्या ठेकेदार, लैंड माफिया, अर हौरि माफिया सरकारी अधिकार्युं दगड़ भकोरा भकोरिक किलै रूणा छन

-किलैकि मोरण वळो सरकारों बदौलत दसियों सरकारी ठेका जि लींदो छौ त सब्युं तै इमानदारी से बांटी मीलि जांदी छे अब कैकि बांटी लुठे जावो त वैन रूणि च कि ना ?

-हे भै ! छ्वटा नेता, सरकारी नेता , विरोधी दलों नेता आज एकि ढौळ मा इन सोग मनाणा छन जन बुल्यां यूंका ब्वेबाब इकदगडि सांग मा सजे गे होवन धौं

- अरे राज्य कु सबसे बडो चालबाज , जालसाज, धोकाबाज , जु यूं नेताओं घौर रुपयों थड़का लगांदो ह्वाओ मोरि जावो त यूंन इनि त रुण जन यूं नेताओं ब्वे बाब मड़घट जोग ह्वे गे ह्वावन धौं

-औ त राज्यौ सबसे बड़ो छक्टू (ठग ), बेईमान, घूसबाज , अनयाड़ो ब्यापारी फुड्डा मोरि गे ?

- नै नै वो अफिक नि मोर दुई भाई आपस मा लड़िक मोरि गेन

-औ तबि यूं अनाचार्युं घौर बरजात पोडि च। अछा यूं बेशर्मों धरम पिता फुड्डा मोर अर युं दुराचार्युं न छुपुल पैरि दे

-हां प्रजातंत्र मा इनि होंद।

Copyright@ Bhishma Kukreti 20/11/2012