क्या सचमुच मा धन्ना सेठ सरकार चलान्दन ?

गढ़वाली हास्य व्यंग्य

चबोड़ इ चबोड़ मा

                                     क्या सचमुच मा धन्ना सेठ सरकार चलान्दन ?

 

                                                     चबोड्या : भीष्म कुकरेती

 

अजकाल मीडिया मा, चौंर्युं मा (चौपाल ) बथा हूणा छब कि सरकार राजनीतिक पार्टी चलांदन या धन्ना सौकार सरकार चलांदन . जथगा मुख तथगा बथा . क्वी बुल्दु सरकार त सरकारी अधिकारी चलांदन। हस्ताक्षर मंत्री करदन त हैंको बुल्दु बल धन्ना सौकारौ बुलण पर इ अधिकारी अधिनियम बणान्दन अर धन्ना सेठौ जोर पर इ मंत्री लोग हस्ताक्षर करदन . कथि त इन बि बुलणा रौन्दन बल हेरक धन्ना सौकारक गुलाम जन ऐम पी , ऐम एल ए खरीद्याँ रौंदन। जथगा मुख तथगा तौंका अपड़ा विचार , अपुण धारणा . कथगा त इन बि बुलंणा रौंदन बल विद्वानु धारणा बि धन्ना सौकारू रखैल होंदन। जन धन्ना सेठ चादन तनि विद्वान धारणा बदल्दन अर धन्ना सौकारूं थैलि जोर पर इ विद्वान लोग हौरुं सम्मति , धारणा , मति , मन बदलणो जतन करदन। कथगा इ गपोड़ी बुल्दन बल अजकाल त विद्वान् अपणी धारणा बणान्दि नि छन बल्कण मा विद्वान् लोग सेठुं नफा नुकसानौ हिसाब से सुचदन अर तब जैक इ धारणा बणौन्दन। इलै इ हरेक विद्वान की धारणा या त भारतीय धन्ना सेठुं या विदेसी धन्ना सेठुं अणसाळु मा ढऴयांदी।

 

सच क्या च अर झूठ क्या च पता लगाणो मि अपण दगड्या सुकेश जंबानी क ड्यार ग्यों जु दक्षिण मुंबई मा सौवीं मजिल की एक बिल्डिंग मा रौंद . सुकेश जंबानी भौति व्यस्त उद्योगपति च . मि ग्यों त जंबानी फोन पर व्यस्त छौ .

 

- हां ! हेलो मि सुकेश जंबानी बुलणु छौं। क्या ? अलण प्रदेश मा निर्यातित माछों पर सेल टैक्स बढ़ाणै बात चलणि च यां से हमारो माछो व्यापार कु नफा कम ह्वे जालो ? ठीक च मि कुछ करदो छौं

.

- हेलो! अलण प्रदेशौ पावर ब्रोकर्याणि ! खीरा गाडिया ! हाँ मि सुकेश जंबानी बुलणु छौं . वो मंत्री जी तै रैबार दे दी बल प्रदेश मा निर्यातित माछों जगा घरेलु माछों पर सेल्स टैक्स बढ़ाओ। .... तो अछा ! इथगा देर मा तुमन दुसर फोन से मंत्री जी तै मेरो आदेस दियाल अर मंत्री जी बुलणा छन बल आजि अबि सरकारी अधिनियम बदले जालु . वेरी गुड ! हाँ हाँ ! अपण कंसल्टेन्सी चार्जो बिल भेजो अर वैबरी पेमेंट भिजे जालो ... अछा अछा ! विरोधी दल की बि बातच ...त ठीक च तुम वूंको मुख बंद करणो इंतजाम बि करि द्याओ मि यांकुणि अलग से फीस दे द्योलु . बढ़िया बढ़िया . एकाद करोड़ ! हाँ बाजिब बात च . सिधांत की बात च .जु बि कुत्ता पूछ हिलाओ वै तै लुतकी -पुतकी-हडकि मिलण इ चयेंद अर जु बि बल्द विरोध मा मुख ख्वालो वैक मुख घासन बंद कौरी द्याओ .

 

- हाँ हाँ मि सुकेश जंबानी बुलणु छौं . येस मिस्टर मैनेजर ! क्या बात च ? क्या कोयला खदान आबंटन मा गैर नियमु बल पर हमारि कम्पनी तै जो जो खदान मीलि छ्याई वां पर क्वी अधिकारी जांच बिठाण वाळ च . त ठीक च ...हां हाँ ठीक च जु वै अधिकारी क नौनु हावर्ड यूनिवर्सिटी मा दाखिला लीण चाणो त कारो ना एड्मिसन कु इंतजाम अर पांच सालौ खुणि जंबानी एजुकेसन ट्रस्ट से वजीफा को इंतजाम बि करी द्याओ . द्याखो जी मिस्टर मैनेजर आप त भारतीय प्रशासन का चुस्त मुस्त अधिकारी छ्या त आप बि जाणदा इ छन कि जु कुत्ता पूँछ हिलाओ वै तै काम को हिसाब से लुतकी -पुतकी -हडकी मिलण इ चयेंद अर जु बि बल्द विरोध मा मुख ख्वालो वैक मुख घासन बंद करि दीण चयेंद . ...अचा अछा ... अं अं ... अछा वेरी गुड अछा अधिकारी जी मानी गेन अर ऊँन नियमो अधिनियमो व्याख्या बि बदलि याल . वेरी गुड . त बस मिस्टर मैनेजर ! आज से आप अफिक निर्णय ल्याओ हमारो ब्यापार को एकि सिद्धांत च बल जु कुत्ता पूँछ हिलाओ वै तै काम को हिसाब से लुतकी -पुतकी -हडकी मिलण इ चयेंद अर जु बि बल्द विरोध मा मुख ख्वालो वैक मुख घासन बंद करि दीण चयेंद .

 

- हाँ हाँ ! मि सुकेश जंबानी बुलणु छौं . क्या इंडिया को सबसे बड़ो बुद्धि जीवी हमारो ब्यापार का विरोध मा लेख लिखणु च . त वै तै कै बड़ो एजुकेशनल न्यास की फेलो शिप दिलाओ अर भारतीय ब्यापार विकास अन्वेषण का वास्ता विदेश भ्रमण की व्यवस्था कौरी द्याओ। क्या यु वुद्धि जीवी तबि बि नि मनणु च। ठीक च त नियम या च बल पैल तर्क से मनाओ , निथर पैसा या अर्थ से पुऴयाओ , अर तबि बि समिण वाळ नि मानो त त डंडा मारो . अच्छा अच्छा ! ह्वै ग्याई ना . तै बुद्धि जीवी क तंगड़ी टूटी गेन ना ! वेरी गुड। क्या अब वो हमारो ब्यापार का सकारात्मक व्याख्या करणो तैयार छन . द्याखो जी सिद्धांत च बल जु कुत्ता पूँछ हिलाओ वै तै काम को हिसाब से लुतकी -पुतकी -हडकी मिलण इ चयेंद अर जु बि बल्द विरोध मा मुख ख्वालो वैक मुख घासन बंद करि दीण चयेंद अर यां से बि काम नि चलो त डंडा दिखाओ .

 

-- हाँ मि सुकेश जंबानी बुलणु छौं . क्या मीडिया मा हमारो विरुद्ध समाचार आणा छन . त ठीक च मीडिया मालिकों से बात कारो कि हम ये साल पोरु साल से दस गुणा जादा विज्ञापन दयोला . हूँ ..हूँ ...हूँ ... अछा सुब मीडिया मालिक मानी गेन अर हमारो विरुद्ध क्वी बी समाचार ये साल नि आला . वेरी गुड . कुत्ता क हिसाब से इ हडकी दीण चएंद .

-- हेलो हेलो ! हाँ ...हाँ मि सुकेश जंबानी बुलणु छौं . हाँ हाँ पावर ब्रोकर्य़ाणी वीरा खाडिया जी ब्वालो .वेरी गुड तो तुमन पूरो इंतजाम कौरी आल कि मंत्रीमंडल गठन माँ हमारा समर्थक ही मंत्री बौणल . अरे वाह सया न्यूज द्याखो ! जादातर मंत्री हमारा इ समर्थक छन . हाँ हाँ तुमारी फीस ईं दै जादा इ होली . भै हमारो त सिद्धांत च बल जथगा बड़ो काम उथगा इ बड़ो ब्याला की बलि। अठ्वाड़ो हिसाब से इ ब्याला मारे जान्दन . जथगा बड़ी अठ्वाड़ उथगा इ बड़ा ब्याला अर उथगा इ जादा ब्याला .

अब जब मि जाणी इ ग्यों कि असल मा सरकार कु चलान्दो त मि बगैर सुकेश जंबानी से बात कर्युं ऐ ग्यों .

 

Copyright@ Bhishma Kukreti 2/11/2012