दिवतौं दिवळि-बग्वाळि नीबत सौं संकल्प

गढ़वाली हास्य व्यंग्य

हौंसि हौंस मा, चबोड़ इ चबोड़ मा

          दिवतौं दिवळि-बग्वाळि नीबत सौं संकल्प

                        चबोड्या : भीष्म कुकरेती

ईं बग्वाळि कुणि परमेश्वरन सबि दिवता पूछिन बल भै जरा इन त बतावा भारतौ बाबत तुम लोगुन क्या क्या सौं घटिन , क्या संकल्प करिन ? त हरेक दिवता अपण अपण सौं संकल्प बथान्दा गेन

काकभुशंड जीन बोलि बल अचकाल भक्त लोग बद्रीनाथ जन जगा मा जांदन अर भक्ति मा इथगा डूबि जांदन कि भक्तिरस की रस्याणो जगा पोलीथिन बैग , कचरा मन्दिरों मा छोड़ि ऐ जांदन . ये बरस मि भक्तों मा आम भक्ति दगड्या दगड़ पर्यावरण भक्ति भि भरुल .

वरुण जीन सौं घौट कि ये बरस जरूर गंगा -जमुना सफाई अभियान को काम पूरो ह्वे जालो अर नेता लोग, सरकारी कर्मचारी, ब्यापारी घूसो रौ मा नयाणों जगा पवित्र गंगा -जमुना मा नयाला .

पशुपतिनाथन सौगंध खैकि बोलि बल चूँकि सोप ओपेरा देखिक भारत की जनता क दूरदृष्टि कमजोर ह्वे गे त मि भारत की जनता तै चक्षु ज्ञान की दवा द्योलु जां से वो नेपाल मा चीन की गति विधि पर नजर डाळणै रैन .

सुबुधि दिवता न कसम खाई बल अचकाल भारत का योजनाकार अमेरिकी या युरोपौ किताब बांचिक भारतौ बान योजना बणौन्दन त ये साल म्यार काम एकि रालु कि जनि यि योजनाकार बेकार मा अमेरिका या यूरोप की नकल कारल मि खैड़ों न यूंक गुदुल गाडुल .

धनवन्तरी जीन संकल्प लींद बोलि बल हरेक नेताक ग्रामीण स्वास्थ्य चिंता क इन्जेकस्नु बाबजूद बि ग्रामीण स्वास्थ्य की हालात दिनों दिन खराब इ होणि च त ये बरस मेरो ध्यान बस ग्रामीण स्वास्थ्य विकास पर रालो 

.

कृषि देविन सौगंध खैनि बल भारतौ प्रधान मंत्री अर कृषि मंत्री सियां बि राला पण मीन त ये साल तिसरी कृषि क्रान्ति बीज हरेक पुंगड़ म बूण।

भंडारी दिवतान कसम ले बल ये साल कथगा बि फसल होलि मि अनाज तै सड़ण नि द्योलु .

कृषि देवी अर भंडारी दिवता देखादेखी वन देवी, फूलदेवी , बागवान दिवता अर पशु दिवतान बि कसम ले बल ये साल फारेस्ट , फ्लोरिकल्चर, हौरटिकल्चर कुणि रिफौर्म की कलम उगाये जालि 

.

हनुमान जीक घुण्ड ठोकी कसम च बल वो ये साल हरेक भारतीय मा अपण देसों रक्षा बान इनि चेतना जगाला जन ऊँन कबि राम चेतना जगाई छे . हनुमान जीन परमेश्वरम अर्जी बि दियाल कि वाल्मीकि अर तुलसीदास कु पुनर्जन्म ह्वाओ जो भारत मा देस रक्षा चेतना फैलावन। परमेश्वरन हनुमान जीक अर्जी पास कौरि आल अर ये साल वाल्मीकि अर तुलसीदास क अवतार भारत मा देस रक्षा चेतना फैलाला

बृहस्पति जी अर शुक्र जीन सरस्वती देविक ब्लैक बोर्ड मा लेखिक सौं घटि कि ये साल वू सबि भारत मा भारत लैक शिक्षाक पौ ख्त्याला (आधार शिला धारल ).

लक्ष्मी देवी न कुबेर जीक सौं त घौट छन कि वा भारत मा धन धान्य की बरखा कारलि पण दगड़ इन बि बोलि गे कि धन धान्य कै कैक ड्यार जाला वांकि जुमेवारी त सोनिया गांधी, प्रधान मंत्री राज्यों मुख्य मन्त्र्युं की ही रालि।यां पर सद्बुधि दिवता न सौं घटी बल मि यूं सब्युं पर सद्बुधि क टीका जरूर लगौल .

न्याय दिवता ग्विल्ल न सौं घटि कि ये साल त्वरित न्याय प्रक्रिया बाबत भारत मा जन चेतना वास्ता एक नयो अना हजारे जनता क समणि आलो

इनी हरेक दिवता न सौं घटिन अर आखिरैं ..

विश्वकर्मा न बोलि बल मि हाउसिंग , रोड ट्रांसपोर्ट , इन्फ्रास्ट्रक्चर मा तेजी से सुधार त लौलु पण भ्रष्ट तन्त्र कु जड़ नाश करणै जुमेवारी त परमेश्वर जीकि च।

परमेश्वर जीन बि सौं घटी कि ये साल लोकपाल बिल राज्यस्भा मा धरे जालु पण बिल पास करणै जुमेवारी राज नेताओं की इ ह्वेलि आखिर नेता त अफु तै में से बड़ा जि समजदन

Copyright@ Bhishma Kukreti 14/11/2012