मेरा पहाड़ ........

देवभूमि त्वैको ब्वदीन उत्तराखंड ,हिमवंत तेरो नाम केदारखंड
खंड ही खंड रैगैन वार बटी छ्वाड, मेरा पहाड़ ,मेरा पहाड़ .
गंडेळ  किदला जाना जीव बण्या छां ,माछौं को नों नी कखी , डौखा बण्या  छां
चौंर्या स्याल बिंडी ,हर्चिगैन काखड़  ,मेरा पहाड़ ...........

गंगा जमुना को मैत निरपाणी  डांडा, बुतण  लग्यां  सबी कांडा ही कांडा
पाणी सुख्युं ,धंद हर्चीं रगड़ - बगड़ ,मेरा पहाड़ ...........
गौली कै ह्यूं गदिन्युं रौल्युं समैगे ,ढुंगा रैडी-बोगी बोगी गंगल्वादा ह्वैगे
किलारोडी प्वाड्दीन भारी उखाड़ -पखाड,मेरा पहाड़ ...........

लापता खाडू का हम सिंग बण्या छां ,छोट्टू क्वी  रायो निछ ,ब़डा बण्या छां ,
किले जी होंद इनो ,बिजोग प्वाड, मेरा पहाड़ .............

@पूरण पन्त पथिक देहरादून