देखिल्या : राम पुर तिराहा (महान कवि कि शहीदों तै श्रधांजलि )

कवि मदन डुकलाण

 

(गढ़वाळि क महान कवि मदन डुकलाण क कविता अंतर्राष्ट्रीय स्तर का हुन्दन। मदन डुकलाण कि गणत इकिसवीं सदी क महान अंतर्राष्ट्रीय कवियुं मा होंद. ये महान गढ़वाळि कवि न उत्तराखंड आन्दोलन टैम पर रामपुर तिराहा पर हुंईं दैसत कु बिरतांत बड़ो बढिया ढंग से करी. ल्या महान कवि क राम पुर तिराहा पर कुछ पंगत-भीष्म कुकरेती)

हक्क का बाना ह्वेंगीं शहीद हमरा लाल देखिल्या

वूंका  जुल्म वूंकी दैसत का हाल देखिल्या ।

त्वेन दे छे माया कि मीतै दगड्या ज्वा समळौण

ल्वे मा भीजी आज तर्र वो रुमाल देखिल्या ।

देखिके घैल मा बैण्यु कि कुंगळि क्वन्सि जिकुडि

गङ्गा जमुना मा बि आज ऐगे उमाळ देखिल्या ।

देखी ल्वेखाळ निहत्थों कु आज गांधी जनमबार मा

शिव का हिमालम ह्यूं बि आज ह्व़े गे लाल देखिल्या ।

सर्वाधिकार @ मदन डुकलाण देहरादून

(ग्वथनी गौं बटे , २००२ से साभार )