सरकार

छचराट भी करद
फफराट भी करद
उन् त रैंद बणीक कुम्भकरण
ब्वण प्वड़ी सदनी
जब पोडद खैड़ा की चोट विपक्षी
त बगत बगत धक्ध्याट भी करद
इमनदरी कु रैन्द सुखो सदनी
बैइमानौं फर बसंती बयार भी करद
कत्गोवं का बुज्झा दिन्द चुल्लाह
त कत्गोवं फर मुच्छीयलौंल वार भी करद
लुटिक सरया मुल्क बगत बगत
 अपड़ा खाली भकार भी भोरद
कत्गोवं थेय रखद धैरिक हत्गुली मा 
त कुरची कुरची क कत्गोवं का कुहाल भी करद 
सरकार याँ खुणी ही त बोल्दीन छुचा
जू काम चाहे कार नी कार
पर झपोडिक सरया मुल्क मा प्रचार भी करद
पर झपोडिक सरया मुल्क मा प्रचार भी करद
पर झपोडिक सरया मुल्क मा प्रचार भी करद 

रचनाकार :गीतेश सिंह नेगी , सर्वाधिकार सुरक्षित