जब गढ़वळी साहित्यकार फ़ौज मा भर्ती ह्वेन !

सरसर चबोड़

                                                  जब गढ़वळी साहित्यकार फ़ौज मा भर्ती ह्वेन !

                                                  भीष्म कुकरेती

                                    ब्याळि सुपिन मा क्या दिख्दु बल सौब् गढ़वळि साहित्यकार फ़ौज मा काम करणा छन अर सौब तैं ऊंका साहित्यिक काम से इ काम बंटे गे :

लीला दत्त कोटनाला - लार्ड रिप्पनक बड़ा लींण से लीला दत्त कोटनाला जी क प्रमोसन हूण इ वाळ च

योगेन्द्र पुरी - ' मिलिटरी मंदिरूं मा 'फूलकंडी 'लेकी ब्यणस्यरिक बिटेन स्याम तलक फूल पौन्चान्दन

अर मंदिरूं मा शशि शेखरा नन्द 'पुष्पांजलि' चढान्दन

भोला दत्त देवरानी - भोला दत्त देवरानी 'पाखा घसियारी ' क कट्यूँ घास फौजी घुडसाल तक सार्दन

सदा नन्द कुकरेती - 'गढवाळी ठाट 'मा सदा नन्द कुकरेती मेस मा स्वाळ-पक्वड़ पकौन्दन

केशवा नन्द कैंथोला, बलदेव प्रसाद नौटियाल अर गुणा नन्द पथिक फौज्युं तैं रामायण सुणान्दन त आदित्य राम दुधफुड़ी गीता पाठ करदन.

सदानंद जखमोला अर सचिदानंद कांडपाल - सदानंद जखमोला अर सचिदानंद कांडपाल द्वी मिलिटरी मा हलकर छन अर मिलिटरी बेस से डिफेन्स मिनिस्ट्री मा रैबार पौन्चान्दन

भजन सिंह सिंह- भजन सिंह सिंह मिलिट्री ट्रेनिंग स्कूल मा 'सिंग नाद' स्टाइल का मोटिवेटर छन

शिवा नन्द पांडे - शिवा नन्द पांडे क काम च गाड गदनो मा मिलिटरी टेंटूं मा दिवळ छिल या लालटेन से 'उज्यळि' करण

डा भक्त दर्शन : डा भक्त दर्शन सेना मा हाई प्रोफाइल 'दिवंगत औफ़िसरूं' विधवों पेन्सन पट्टा क काम सम्बाल्दन।

डा शिव प्रसाद डबराल- डा शिव प्रसाद डबराल 'अलकनंदा घाटी ' मा मिलिटरी सर्वेयर छन

अबोध बंधु बहुगुणा : टिट फॉर टैट ' रणनीति का ब्युंत अनुसार अबोध बंधु बहुगुणा तैं पाकिस्तान मा 'दैसत' फैलाणो पाकिस्तान भिजे गे.

उन बहुगुणा अर रजनी कुकरेती क आपस मा 'व्याकरण ' कु जि सिखाल क कारण मिलिटरी कोर्ट मा मुकदमा बि चलणु च

सुदामा प्रसाद प्रेमी - सुदामा प्रसाद प्रेमी स्टोर मा ज्वा बि 'अग्याळ ' आन्द वांको हिसाब किताब दिखदन.

चक्रधर बहुगुणा - बहुगुणा जी मिलिटरी बैंडमा 'मोछंग' बजांदन

रघुवीर सिंह रावत - रघुवीर सिंह रावत मिलटरी का 'गुठ्यारो' मोंळ ओ पतरोळ छन

घनश्याम रतूड़ी - . घनश्याम रतूड़ी 'चोला बदल' का एक्सपर्ट माने जान्दन त यूनीफ़ॉर्म विभाग मा दर्जी बण्या छन

कन्हया लाल डंडरियाल- कन्हया लाल डंडरियाल जी राशन ऑफिस मा छन अर 'अन्ज्वाळ'इन इ किचन वालूं तैं राशन भौरिक दींदन.

कन्हया लाल डंडरियाल जीन कथगा इ कोशिश कार कि ए साल उंकी पोस्टिंग सिविल एरिया मा ह्व़े जाओ त ह्युन्दो मैनौं

'कीडू ब्व़े' तैं गाँ से भट्यावन. पण ए साल बि साब लोगूँ न कन्हया लाल डंडरियाल जी तैं 'चुसणा' दिखै द्याई.

धर्मा नन्द उनियाल- धर्मा नन्द उनियाल मिलिटरी बग्वानूं मा 'हिसर, किनगोड़ अर काफळ' ऊँ बुट्या काटदन

गोविन्द चातक - गोविन्द चातक बि मिलिटरी बग्वानूं मा ' फूल पति' छंड्यार्दन

गिरधारी लाल कंकाल - गिरधारी लाल जी तैं बिल्डिंगऊँ पंछी भगाणो काम मिल्युं च त 'फुर्र 'घिंडुड़ी बोलिक कवा, करैं भगाणा रौंदन.

दगड मा भगवती चरण निर्मोही क काम बि 'हिलांस' जन पंछी भगाणो च बल.

दुर्गा प्रसाद घिल्डियाल - दुर्गा प्रसाद घिल्डियाल तैं रेजिडेंसियल क्वार्टरूं मा 'म्वारि'यूँ जळम्वट साफ करणो काम मिल्युं च पण रोज शिकैत आणा नि इ रौंदन बल

दुर्गा प्रसाद घिल्डियाल जी दूसरों 'ब्वारी' यूँ पर 'गारी' मारणा रौंदन.

भगवती प्रसाद जोशी हिमवंतवासी - बडी कोशिश अर सिफारिश से भगवती प्रसाद जोशी हिमवंतवासी तैं हिरदय राम मास्टर की जगा पर मास्टरगिरी मीली गे

सुरेन्द्र पौल- सुरेन्द्र पौल बि डंडरियाल जी दगड राशन स्टोर मा छन अर 'चुंगटि' न नापिक मसाला दीन्दन.

गोकुला नन्द किमोठी: लापता सैनिक विभाग मा सैनिकुं पितरूं रैबार अखब़ारूं मा छपवाणो काम करदन

ललित केशवान: ललित केशवान मिलट्री गार्डनूं मा 'खिल्दा पात अर हंसदा फूलूं ' की कट्टिंग करदन.

प्रेम लाल भट्ट - साब लोगूँ क पुटक पर 'कुतघळी' दीण से साब लोग खुश छन अर अब भट्ट जी तैं क्वी 'उर्ख्यलै घाण जन नि कुटदो' .

जीत सिंह नेगी- जीत सिंह नेगी नै नै भर्ती हुईं सूबेदारनि 'वीरा ' क दगड ' उचि-निसि डांड्यू ' सर्वे करदन .

चन्द्र सिंग राही - चन्द्र सिंग राही जी मिलिटरी बैंड मा 'रण सिंगा ' बाजंदन

पाराशर गौड़ - पाराशर गौड़ मिलिटरी फिलम पब्लिसिटी मा छन अर बीसेक सालुं से 'जग्वाळ' मा छन बल कै दिन त 'क्वी चक्र'

मीलल

योगेश्वर प्रसाद पांथरी- पैल गढ़वाल राइफल मा राइफल मैन छ्या पण 'गढ़वाल राइफल ' किताब मा टाइपिंग मिस्टेक से कुछ गलत घटना छपणो छ्वटो सी जुरम मा

पंथारी जी क ट्रांसफर लैंसडाउन से कोटद्वार ह्व़े गे. हालांकि सौब तैं पता बि च बल टाइपिंग मिस्टेक स्वरुप ढौंडियाल जी कि छे, पण ढौंडियाल जी पी.एम्.ओ.

मा मिलिटरी पर्सनल डिपार्टमेंट मा हूण से बची गेन

राजेन्द्र धष्माना - राजेन्द्र धष्माना 'अर्ध ग्रामेस्वर ' सिपैयुं तैं लेफ्ट-राइट लेफ्ट-राइट परेड करान्दन

नेत्र सिंग असवाल - बगैर अपण साब से पुछ्याँ अर नियम विरुद्ध नेत्र सिंग असवाल जीन कै 'ढांगा से साक्षात्कार ' कार बल त नेत्र सिंग असवाल तैं नौकरी से बर्खास्त करे गे

शेर सिंह गढ़ देसी- शेर सिंह गढ़ देसी न फांस कविता छपाई त सेना मा निरसा फैल़ाणा जुर्म मा सस्पेंड छन

कुला नन्द भारतीय - कुला नन्द भारतीय नाई क काम करदन अर स्ब्युं तैं 'डौळया ' बणान्दन

नित्या नन्द मैठाणी- ऑल इंडिया रेडिओ मा फौजी प्रोग्राम इ दीन्दन

प्रताप शिखर - प्रताप शिखर चैना बोर्डर पर मिलिटरी हवामान विभाग मा छन अर ऊं मा एकी काम च , दूरबीन लेकी इ दिखण कि 'कुरेड़ी फ़टी ' गे कि ना

जग्गू नौटियाल: जग्गू नौटियाल टियर गैस फैक्टरी मा टियर गैस प्रोडक्सन मा काम करदा छया अर अब रिटायर हूणो बाद अपण 'सम्लौण'

पर काम करणा छन.

भीष्म कुकरेती: फील्ड मार्शल भगवती प्रसाद नौटियाल तैं गाळि भ्वरीं चिट्ठी लिखणो दंड मा भीष्म कुकरेती क कोर्ट मार्शल हुयुं च

अर यांको बजै से भीष्म कुकरेती का  भौत सा जूनियर साहित्यकारूं तैं पचास हजारी मैडल मील पण भीष्म कुकरेती तैं मेडल नि मील त

भीष्म कुकरेती पर 'कबलाट' की बीमारी लगीँ च

डा. नन्द किशोर ढौंडियाल : ' गढ़वाली व्यंजन' किताब क कारण डा. नन्द किशोर ढौंडियाल मिलटरी मेस मा रूटळ पकान्दन.

डा. मनोरमा ढौंडियाळ अर धनेश कोठारी : डा मनोरमा ढौंडियाळ जु बि फौजी डौर जांद वैमा गढ़वळी मंतर पौढीक रख्वळी करदन अर

दगड मा धनेश कोठारी बखर या कुखुड़ मारद दें 'ज्यून्दाळ' डालदन .

वीना पाणी जोशी : वीना पाणी जोशी बि मिलटरी गार्डन मा काम करदिन अर कथगा इ दैञ बुरासुं पर पिठै लगाणो जुरम मा मिलिटरी से ससपेंड बि ह्व़ेन

बीना बेंजवाळ: बीना बेंजवाळ को काम च फौजी बिल्डिंगूं क दिवाल 'कमेड़ा' से लिपण. अर जरोरात पोड़ी गे त 'कमेड़ा क आखारूं न देश भक्ति का

सन्देश दिवालुं पर लिखण .

पूरण पंत पथिक- पूरण पंत को काम च मिलिटरी मेस मा जवानु तैं खाणक खाणो, चाय पीणो बान 'गढ़वाळी मा धाई' लगाण

मदन डुकलाण : मदन डुकलाण मिलिटरी पोस्ट औफ़िस मा फौज्युं 'चिट्ठी -पतरी ' छंट्याणो काम कर्रदन

इश्वरी प्रसाद उनियाल अर विमल नेगी : इश्वरी प्रसाद उनियाल दुश्मन देस मा अपण जासुसुं 'रन्त रैबार' लांदन त विमल नेगी दुश्मन देस मा

गलत 'खबर सार' याने कि र्यूमर फैलान्दन

चक्रधर कुकरेती - चक्रधर कुकरेती अच्काल सस्पेंड छन. कुकरेती वंशावली मां चक्रधर कुकरेती न जसपुरों बहुगुणो वन्सावाली बि छापी दे.

अबोध बंधु बहुगुणा न मुकदमा कार बल बहुगुणा बन्सावली छापणो एकाधिकार बहुगुणो तै इ च ना कि कै कुकरेती तैं त अबोध जी मुकदमा जीति गेन.

एक हैंक मुकदमा राम प्रसाद बहुगुणा न कार बल जब हम मथि मुल्क्यों न बहुगुणा बन्सावली मा सल़ाणी बहुगुणो नाम नि छाप त चक्रधर कुकरेती

तैं क्वी अधिकार नि छयो कि वो सलाणी बहुगुणो क बन्सावली छापन. चक्रधर जी यू मुकदमा बि हारी गेन अर सस्पेंड ह्व़े गेन. उना कोटद्वार का ढाण्गळ

का कुकरेती अलग नाराज छन कि चक्रधर कुकरेती न जसपुर का कुकरेत्युं दगड बहुगुणा वंशावली त खूब छाप पण ढाण्गळक कुकरेत्युं वन्सावळी नि छाप.

विचारा चक्रधर जी ! ना मुंडित का रैन ना गाँव का

लोकेश नवानी- लोकेश नवानी क काम च जवानुं कपड़ा 'फंची ' भौरिक धोबी घाट लिजाण अर लाण. ऊँ लोकेश जी काम धोब्यूँ तैं 'धाद' लगाणो बि च

नरेंद्र सिंह नेगी: नरेंद्र सिंह नेगी डाइटिंग अर हेल्थ मेंटेनेंस डिपार्टमेंट मा हरेक जवान तैं बथान्दन बल " कथगा खैलि !"

बी. मोहन नेगी: बी. मोहन नेगी दुश्मन जासुसुं (जौंक फोटो उपलब्ध नि ह्वाऊ) क फोटो बणान्दन

जयपाल सिंह रावत : जयपाल सिंह रावत मिलटरी पेस्ट कंट्रोल विभाग मा छिपडु, किदलु, मूस जन कीड़ मक्वड़ भगांदन

बिहारी लाल जालंधरी : बिहारी लाल जालंधरी चाइना बोर्डर पर साउंड डिटेक्टर छन अर इन पता लगान्दन बल पल्तिर चीनी रडार 'गढ़वाळी या कुमाउंनी ध्वनि'

पकड़द छन कि ना

.

हरिश जुयाल : मिलिटरी हौस्पिटल मा जब बि मरीजुं की 'उकताट' बढ़दि हरीश जुयाल तें 'खिग्ताट 'कौरिक म्रीजुन बीमारी ठीक करण पड़द.

ओम प्रकाश सेमवाल - कै बि बड़ो असरदार औफ़िसरऊँ फूफुं तैं 'मेरी पुफु' बोलिक प्रमोसन पर प्रमोसन लीणा छन

उमा भट्ट - उमा भट्ट मिलिटरी स्कूल मा टीचर छे पण कै टी.वी रिपोर्टर बड़चोदन स्टिंग ओप्रेसन कार बल उमा भट्ट तैं 'द्वी आखर' से जादा नि आन्द त

अच्काल उमा भट्ट नौकरी से सस्पेंड च .

दर्शन सिंह बिष्ट- . दर्शन सिंह बिष्ट भारत- नेपाल 'केर' (बौर्डर) पर बिजली विभाग मा काम करदन.

गिरीश सुंदरियाल- गिरीश सुंदरियाल दुश्मन जासुसुं 'अन्वार' पछ्यणो विभाग मा छन

वीरेंद्र पंवार - मिलिटरी रिसर्च विंग मा ह्युन्दों मा 'कन कैक वसंत आलो' क खोज मा लग्यां  छन.

शांति प्रकाश 'जिज्ञासु' - शांति प्रकाश 'जिज्ञासु' न इंटरव्यू दियुं च अर 'आस' मा छन कि अप्वाइंटमेंट लेटर जल्दी इ आलो.

तोताराम ढौंडियाल - जब कबि मिलिटरी क्वार्टरूं मा कैक ब्या ह्वाओ त तोताराम ढौंडियाल जबरदस्ती ' गढ़वाळी मांगळ ' लगंदन .

साब लोग ऊंका ट्रांसफर करण चाणा छन पण साब लोगूँ समज मा इ नि आणो च बल तोताराम ढौंडियाल जी तैं 'गाव या शहर' मादे

कख भिजे जाओ.

डा.दाता राम पुरोहित: डा.दाता राम पुरोहित मिलिटरी ऑफिसरूं तैं 'चक्रव्यूह', 'गरुड़ व्यूह' जन वार स्ट्रेटिजी सिखान्दन अर कबि कबि डेप्युटेसन मा

जर्मनी बि जान्दन

.नरेंद्र कठैत - मेस मा 'पाणी ' भरदन

देवेश जोशी - देवेश जोशी हवामान विभाग मा 'घाम, पाणि , छैल' क हिसाब रिकार्ड करदन

डा. अचला नन्द जखमोला - 'कोष विधा' का लिख्वार' डा. अचला नन्द जखमोला अच्काल

गढ़वाळी आलोचना का फील्ड मार्शल भगवती प्रसाद नौटियाल बिटेन 'गढ़वाली मा हिंदी कन पुच्याण'

की ट्रेनिंग लीणा छन.

दीन दयाल बलुणी - साब लोग 'घंघतोळ मा छन बल बलुणी जी तैं बोर्डर पर रखे जाओ या बैक ऑफिस मा !

 

डा नरेंद्र गौनियाल- डा गौनियाल मिलिटरी रूस्वड़ बिटेन भैर इ नि आन्दन किलैकि उंकी 'धीत' इ नि भोर्यांदी

 

ब्रिजेंदर कुमार नेगी - ब्रिजेंदर कुमार नेगी क्या सुन्दर बैक ऑफिस मा छया एक दिन 'उमाळ' मा ऐक गौन्त्या (टूर वल़ू जॉब) विभाग मा ट्रांसफर ल्हें ल्याई

 

दिनेश ध्यानी- दिनेश ध्यानी तैं हमेशा बांजै धार मा निगरानी काम दिए जांद. जब की ध्यानी जी तैं काम करद दें ' गंगा जी का जौ' दिखण पसंद च

 

गीतेश नेगी , जयारा जी, जेठुरी जी , बाल कृष्ण ध्यानी - गीतेश नेगी , जयारा जी, जेठुरी जी , बाल कृष्ण ध्यानी जी आद्युंन

इन्टरनेट स्पेसोग्रैफी क अब्बल नंबरूं मा इम्तान  पास कौरी आल अब टेरीटोरियल एडमिनिस्ट्रेसन मा कमीसन/रिकोग्निसन कि जग्वाळ मा छन .

 

 .विपिन पंवार तैं मिलिटरी मा नि लिए गे किलैकि जु मनिख सम्राट ह्वाऊ वैक मिलिटरी मा क्या काम?  

(कृपया नॉट करें - यह लेख केवल कोरी कल्पना पर आधारित है . )