कॉंग्रेसी भग्यान भक्त दर्शन, जगमोहन सिंह अर बलदेव सिंह आर्य जन नेतौं बारा मा किलै नि रूंद ह्वाल ?

(Best  of  Garhwali  Humor , Wits Jokes , गढ़वाली हास्य , व्यंग्य )
-
 चबोड़ , चखन्यौ , ककड़ाट  :::   भीष्म कुकरेती    
-

     अचकाल सोनिया गांधी , राहुल गांधी अर अहमद पटेल बड़ा परेशान , आतुर अर चिंतित छन बल यदि गुजरात का चुनाव नि जितदा, यदि 2019 का चुनाव नि जितदा त भाजपा सरकार सब नेहरु –गांधी मिमोरिय्ल पर ताळ लगै द्याली अर राष्ट्रीय धरोहरों नाम रोबर्ट बाड्रा पुत्रों नाम पर नि धरे जाल . राहुल अर प्रियंका चिंतित छन बल नया नया एयरपोर्ट आणा छन त क्वी बि एयरपोर्ट सोनिया गांधी नाम से नि  बुले जालो .सोनिया गांधी क रुण च बल इथगा स्मार्ट सिटी आणा छन किन्तु मोदी सरकारन अबि तक एक बि प्रपोज्ड सिटी का नाम राहुल गांधी नाम से धरणो प्रपोज नि कार . गुलाम आजाद का बुलण च बल स्मार्ट सिटी का नाम राहुल गांधी अर प्रियंका का नाम से नि होला तो भारत का लोगुं पर बड़ी नाइन्साफी ह्वेली  .गुलाम का दगड्या गांधी प्यादा उर्फ़ आनन्द शर्मा बुलणु  च बल इंडियनों उपर इथगा अत्याचार तो ब्रिटिश लोगुंन नि कार जथगा अत्याचार भाजपा  नेहरु खानदान का नाम बगैर स्मार्ट सिटी खुलण से करणी च .

  ब्याळी उत्तराखंडी फेसबुक मा गांधी परिवार का दुःख  दिखेणु छौ . नेहरु प्रेमी रूणा छा बल केंद्र सरकारन नेहरु का नाम से क्वी बिज्ञापन नि दे . इंदिरा भक्त ऐड़ाट भुभ्याट करणा छा बल राज्य सरकारन नेहरु स्तुति नि कार . तो मोदी भक्तों जबाब छौ  बल कनो मनमोहन सरकारन नरसिम्हा राव तै कथगा  दें याद कार .

       जख तलक प्रत्येक कौंग्रेसी  कु सवाल च कॉंग्रेसी नेहरु गांधी का अलावा  कै हैंक तैं कॉंग्रेसी नि समझद . उत्तराखंड मा 17 सालों  मादे 10 साल कौंग्रेस कि सरकार छै किन्तु गौ बुरु चीज च जु नौरसी नारायण दत्त , इम्पोर्टेड विजय बहुगुणा या नेहरु खानदानी प्यादा हरीश रावतन महान गांधीवादी भक्त दर्शन जी का बाराम सोचि बि  हो।  मीन कखि नि पौढ़  बल कबि यूं नेहरू गाँधी  ड्यार पाणी भरण वाळ , राहुल गांधी का खुट जपकाण  वळ या संजय गांधी चप्पल उठाण  वळुं कबि भक्त दर्शन जी का नाम पर कै कूण्या  नाम धौर हो।  मि तै याद नि यूं चाटुकारोंन गढ़वाल का प्रथम लोकसभा सदस्य  भक्तदर्शन जी का नाम पर क्वी गोष्ठी उरै हो।  माँ बैणि तलाक धौं  जु सोनिया गांधी तैं अपण ब्वे से भी अधिक महत्व दीण वळ कॉंग्रेसी कार्यकर्ता बि भग्यान भक्तदर्शन तै सुमरिंद  ह्वावन धौं।  यदि  लाटू , पप्पू जन राहुल तै दुनिया का महान राजनैतिक मनण  वाळ कॉंग्रेसी कार्यकर्ता दुसर  मनीषी तै बि कॉंग्रेसी मानदां तो विकिपीडिया मा भक्त दर्शन जीक जन्म दिवस की तिथि बि डळवांद।  

      हरीश रावत जीन त जैदिन इंदिरा गांधी की फोटो द्याख तै दिन बिटेन अपड़  द्वी आँख फोड़ी देन।  तबि त सस्तो भोजन स्कीमो नाम इंदिरा अम्मा नाम धार।  हरीश रावत इंदिरा प्रेम मा सर्वथा अंधा ह्वे गेन निथर  हरीश रावत साब    भग्यान जगमोहन सिंह जीक  उत्तराखंड  हेतु राशन दीणो योगदान तै याद करदा अर सस्तो भोजन स्कीम का नाम 'जगमोहन स्कीम ' धरदा।  जगमोहन जीको उत्तराखंड तै क्वा राशन मिलण चयेंद मा बड़ो योगदान च।  भग्यान जगमोहन सिंह जीन  उत्तर प्रदेश कैबिनेट से भौत बार लड़ै लौड़ बल चूँकि गढ़वळि -कुमाउँनी बजरु -जुंडळ नि खांदन त गढ़वाळ -कुमाऊं मा राशन मा बजरु -जुंडळ ना अपितु ग्युं भिजे जावन। बड़ी जद्दो जहद  बाद उत्तर प्रदेश कैबिनेटन स्वीकृति दे  गढ़वाल -कुमाऊं मा बजरु -जुंडळ  जगा ग्यूं भिजे जावन।  आज नेहरू -गांधी का प्यादों  तै पता नी बल एक दैं राशन म ग्यूं कु  क्या महत्व छौ। क्या नेहरू -गांधी का गुलामुं तै जगमोहन सिंह नेगी  का स्मरण नि करण चयेंद ? क्या नेहरू -गांधी  चाटुकार कार्यकर्ताओं तै  जगमोहन सिंह जी का बारा मा विकिपीडिया खाता नि खुलण चयेंद ? पर जब नेहरू -गांधी का अलावा  कुछ नि दिख्यावो तो जगमोहन सिंह जी , कैन करण 

     उन त राहुल गांधी दलित अस्मिता का बान आंसू ना इटली की नदी जन पो अर टिबर बगांदन।  किंतु उत्तराखंड मा ऐक यूं तैं ठाकुर सिंग अर बामण प्रसाद ही याद आंदन (हरिद्वार -उधम सिंह की मजबूरी माँ टमटा  या आर्य नाम लीण पड़द ). कर्मठ, ईमानदार स्व बलदेव सिंह आर्य को शिल्पकार स्वाभिमान उत्थान मा बड़ो योगदान च। मि कॉंग्रेस्यूं तै पुछण  चाणु छौं बल स्व बलदेव सिंह आर्य का नाम पर एकाद योजना , स्व बलदेव सिंह नाम पर एकाद सड़क का ही नामा ह्वे जांद तो क्या वैलोक मा नेहरू -इंदिरा , राजीव जीकी आत्मा रुसे जांद क्या ? हाँ गोमती नगर लखनऊ मा जि एक मार्ग का नाम बलदेव सिंह आर्य  मार्ग च पर शायद यी क्वी हौर बलदेव छन ।  

  इनि स्व झब्बन लाल आर्य को शिल्पकार  अस्मिता उत्थान आंदोलन मा बड़ो योगदान च किंतु झब्बन लाल जी तै  क्वी बि नेहरू गांधी का गुलाम कॉंग्रेसी याद नि करद।  नेहरू-गांधी  पर एक आधा पेजौ पैम्फ्लेट छप जावो तो कॉंग्रेसी मिनिस्टर ये पैम्फ्लेट तै हरेक विभाग मा भिजणो बान आकास पाताळ एक कौर दींदो  किन्तु जब भग्यान झब्बन लाल स्मृति मा ऊंक  नौनु श्री विजय मधुरन पुस्तक छाप त कै कॉंग्रेसीन यीं  किताब  तैं  सूंग  बि नी च। 

  कॉंग्रेस का बुरा हाल इलै छन किलैकि कार्यकर्ता हर्चि गेन।  कार्य करता हर्चल ही जब स्थानीय विभूतियों की कॉंग्रेस मा क्वी स्मरण नि ह्वाल , स्थानीय विभूतियों की अनदेखी ह्वेलि, स्थानीय नेताओं की क्वी पूछ नि  ह्वेलि तो अवश्य ही कार्यकर्ता हर्चल।  अर जब कार्यकर्ता ही हर्चल तो अच्छो खासो मनुष्य का नाम पप्पू या पिद्दी ही पोड़ल।  जी  हाँ ज्वा पार्टी स्थानीय नेताओं की अवहेलना कारली त अंत मा  वीं पार्टी का सर्वे सर्वा  पिद्दी ही ह्वाला। 

     

15/11 / 2017, Copyright@ Bhishma Kukreti , Mumbai India

*लेख की   घटनाएँ ,  स्थान व नाम काल्पनिक हैं । लेख में  कथाएँ , चरित्र , स्थान केवल हौंस , हौंसारथ , खिकताट , व्यंग्य रचने  हेतु उपयोग किये गए हैं।

-

    ----- आप  छन  सम्पन गढ़वाली ----
-
 Best of Garhwali Humor Literature in Garhwali Language , Jokes  ; Best of Himalayan Satire in Garhwali Language Literature , Jokes  ; Best of  Uttarakhand Wit in Garhwali Language Literature , Jokes  ; Best of  North Indian Spoof in Garhwali Language Literature ; Best of  Regional Language Lampoon in Garhwali Language  Literature , Jokes  ; Best of  Ridicule in Garhwali Language Literature , Jokes  ; Best of  Mockery in Garhwali Language Literature  , Jokes    ; Best of  Send-up in Garhwali Language Literature  ; Best of  Disdain in Garhwali Language Literature  , Jokes  ; Best of  Hilarity in Garhwali Language Literature , Jokes  ; Best of  Cheerfulness in Garhwali Language  Literature   ;  Best of Garhwali Humor in Garhwali Language Literature  from Pauri Garhwal , Jokes  ; Best of Himalayan Satire Literature in Garhwali Language from Rudraprayag Garhwal  ; Best of Uttarakhand Wit in Garhwali Language from Chamoli Garhwal  ; Best of North Indian Spoof in Garhwali Language from Tehri Garhwal  ; Best of Regional Language Lampoon in Garhwali Language from Uttarkashi Garhwal  ; Best of Ridicule in Garhwali Language from Bhabhar Garhwal   ;  Best of Mockery  in Garhwali Language from Lansdowne Garhwal  ; Best of Hilarity in Garhwali Language from Kotdwara Garhwal   ; Best of Cheerfulness in Garhwali Language from Haridwar    ;गढ़वाली हास्य -व्यंग्य ,  जसपुर से गढ़वाली हास्य व्यंग्य ; जसपुर से गढ़वाली हास्य व्यंग्य ; ढांगू से गढ़वाली हास्य व्यंग्य ; पौड़ी गढ़वाल से गढ़वाली हास्य व्यंग्य ;
Garhwali Vyangya, Jokes  ; Garhwali Hasya , Jokes ;  Garhwali skits , Jokes  ; Garhwali short Skits, Jokes , Garhwali Comedy Skits , Jokes , Humorous Skits in Garhwali , Jokes, Wit Garhwali Skits , Jokes