उत्तराखंडी ई-पत्रिका की गतिविधियाँ ई-मेल पर

Enter your email address:

Delivered by FeedBurner

उत्तराखंडी ई-पत्रिका

उत्तराखंडी ई-पत्रिका

Sunday, September 4, 2016

Garhwali Poems by Payash Pokhara Part-1

Critical and Chronological History of Modern Garhwali (Asian) Poetry –-308
                    Literature Historian:  Bhishma Kukreti

     आदिम
         ******
मनख्यूं की घिमसांण मा कख हरचणु  आदिम 
यखुळ्या-यखुलि अफु थैं अफि ख्वजणु 
आदिम 
गौं-गळ्या मा त्वैथै फुलफुल देळि किळै
दिखेण 
फुलदेई की कुंगळि जैड़्यूं थै उपड़णु 
आदिम 
अब चखुलों का च्युचांण फर भि चिरड़ै जांद 
तबि  कन्दुड़ु अपणा अंगुळा क्वचणु  आदिम 
बाघ बांदर सुंगर चौका खळ्याण  छन रिटणा 
अपणा यूं दगड़्यौं दगड़ क्य ब्वलणु  आदिम 
अफु से जादा चंट चालाक कैथै  नि चिताणु 
तबि  दुख दलेदरा का थौला ब्वकणु 
आदिम 
हैंसि खुसि घड़ेक अपणि धणैत लगै ले
'पयाश
कन ह्यळि गडि गडिक रुंदरौ थै द्यखणु 
आदिम 
पयाश पोखड़ा 
त्वै उज्यळा दीणा का बाना
***********************
उमाळ जिकुड़ि कु सुदि  नि
खत्याई होलु 
कुछ  कुछ वींल त्वैथैं कन नि
बताई होलु 
रामि बौराणि सि वा जरुर पुंगड़ि
ग्वडणि रै होलि।
तबि  तिल अपरि कपळि रंगुड़ु
लगाई होलु 
इन लगद कि तिल अपणि खुटि
जादै अळगै दीं 
तबि  तिल सबसे पैलि यो सरग
लिमाई होलु 
आंख्यूं मा तेरि लाज सरम 
लुकईं  रै होलि 
तबि  से झुठन्दरा  अपणु मुक
फरकाई होलु 
सर्या जिदंगि चखुलों का फंखुड़ु
छिनरणा रै जो।
अब क्य जो बुढैण दां क्वी फत्यलु
बचाई होलु 
'पयाशनि बोल कि  आग वीकीं
पिळचईं होलि 
त्वै उज्यळा दीणा का बाना जिकुड़ु
जळाई होलु 
@पयाश पोखड़ा 
बाटाजो आज भि त्वै जग्वाळ कना छन
*************-*********************
ढुंगा गारौं थैं किटदा-किटदा बाटा 
ठण्डु मठु कै हिटदा-हिटदा बाटा 
मोळ-माटल भलिकै लप्वण्यां बाटा 
चुना-कम्यड़ल छक्वै छप्वण्यां बाटा 
द्यप्तों मा दुर्बा आसीस मंगदा बाटा 
माद्यौ-मंदिर की देळि भ्यटदा बाटा 
पाटि-ब्वळ्ख्या बस्ता ब्वक्दा बाटा  इसक्वळ्या छ्वारों थैं ट्वक्दा बाटा 
धर्या-धार उचा-निसा डांडो का बाटा 
नवळि पंद्यरिम अग्यर्या भांडो का बाटा 
घास लखुड़ु की बिठिगि बिसौण्यां बाटा 
ख्वींडी दाथि थमळि थैं पळ्यौण्यां बाटा॥
दगड़्यों को दगुड़ु ख्वज्दा-ख्वज्दा बाटा।
सौंजड़्यों का दगड़ रुज्दा-रुज्दा बाटा॥
तेरि खुदेड़ खुद का समळ्यौण्यां बाटा।
बिसरीं छुवीं बातु का बिसरौण्यां बाटा॥
पुरणा बाटों जनै वी नज़र पुर्यांदा बाटा 
खाळा-म्याळों मा वी खिर्तू उर्यांदा बाटा॥
औडळ बथौं मा भलिकै भतड़ेदां बाटा 
हैंस्दा-ख्यल्दा कुरचेन्दा पतड़ेदां बाटा 
कमर टुटीं डुण्डि सि उकळि का बाटा।
घुण्डों की खपचईं सि उंधरि का बाटा॥
थक्यां-थक्यां म्वरण्यां-म्वरण्या बाटा।
चिगैं चिंग्वात चिरण्यां-चिरण्यां बाटा॥
पैटगीं इखरु सांस ल्हिदां-ल्हिदां बाटा।
बैठगीं रस्तम तमखू पींदा-पींदा बाटा 
डुण्डा ब्यगड़ा तिर्वण्यां मर्वण्यां बाटा।
मुर्क्या भड़क्यां चिर्यां चिर्वण्यां बाटा 
खैड़-कत्यार छील-छींजा उकरदा बाटा।
ज्यूंदा-म्वर्यां थैं कांधिम लिखरदा बाटा॥
कै दगड़ भि आणि  जाणि करदा बाटा।
यकुंलास मा भि यखुलि नि डरदा बाटा॥
अब  तुमरा चौकम बिसयां छन बाटा। द्वरढक्कि देखिकि खिसयां छन बाटा॥
दुबट्टा तिबट्टा अर चौबट्टा बाटा 
झणि कनै लिजाला  घंघत्वळ्या बाटा॥
घूम-घामिक ये रिटदा-रिटदा बाटा 
कै गौं जाणा ह्वाला ये हिटदा बाटा 
ठ्यलेंदा रस्ता अर सरकदा बाटा 
द्यख्दै-द्यख्दा सर्र-सर हरचदा बाटा 
रोज़ तेरि लब्बी लपग्यूं थैं गैंणदा बाटा 
रोज़ अपणि जिकुड़ि थैं खैंणदा बाटा 
हांतुमरि जग्वाळ करदा-करदा बाटा 
से गीं अपणि निंद मरदा-मरदा बाटा 
@पयाश पोखड़ा 
काश........!!!
*************
मि वल छाल अर तू पल छाल नि हूदुं 
काश ! हमरा बीचम यो पहाड़ नि हूदुं 
हमत तुमथैं सानि कैकि भि न्युति दींदा 
काश ! आंख्यूं बीचम यो पहाड़ नि हूदुं 
जिंदगि मा सदनि मौत थैं ख्वजणा रवां 
काश ! मौत कु मैती यो पहाड़ नि हूदुं 
हमरा गिच्च फर तुमरि छुवीं नि आंदी 
काश ! हुंग्रा पुर्याणु यो पहाड़ नि हूदुं 
मि अपणि लगांदु  तुमरि भि सुणुदु 
काश ! रुसयूं-खिसयूं यो पहाड़ नि हूदुं॥
खौळ्यां सि चौका-खल्याणा का बीच मा।
काश ! चौंफ्ळा ख्यळ्दु यो पहाड़ नि हूदुं॥
'पयाशदगड़ तुमरा गौं हम भि आंदा 
काश ! मुख ऐथर खड़ु यो पहाड़ नि हूदुं॥
पयाश पोखड़ा 
"कुछ  बोलि जैई"
****************
आख्यूं-आंख्यूं मा कबरि-कबरि कुछ  बोलि जैई 
छुयूं-छुयूं मा अपणि गठ्यईं गेड़ खळ्ळ खोलि जैई 
सच्चि-झूटी भलि-बुरि सबि छुवीं म्यारा बांठ धैरिगे 
आंदा-जांदा कबरि अपणि खुचिलि भि टटोळि जैई 
जौं छुवीं सुणि-सुणिक दुख्यरि जिकुड़ि होलि कैकि 
सच्ची भि होलि ताबोलि नाप्वारम धोळि जैई 
भ्यलि कि डैळि सि मिठ्ठि होलि तेरि छुयांळ गैळि 
पर घुघुति कफु हिंलास का दगड़ा दगड़ि
तोलि जैई 
कभि  कभि क्वीकन नि आलु द्वार उगाड़ि राखि 
अपणि मयळ्दु माया कि मंदिरि कूणि मा बिटोळि जैई 
बिरणा ह्वैकि भि अपणा आंसु किळै लुकंया छन 
'पयाशकी खालि खुचिलि मा द्वि बूंद फोळि जैई 
@पयाश पोखड़ा 
"वो क्वी हौरि ह्वाला"
********************
हे बगत ! मि सड़म हिट नि सकदु
त्वै बरोबर 
वो क्वी हैरि ह्वाला जु त्वै अधमिरा
बाटों मा छौंपला 
हे डौंड्यां ! मि द्यप्ता नि ह्वै सकुदु
त्वै बरोबर 
वो क्वी हौरि ह्वाला जु द्यप्तुळ मा
द्यप्ता सि कौंपला 
हे ढुंगेर ! मि नि घण्टे सकुदु डाळि
त्वै बरोबर 
वो क्वी हौरि ह्वाला जु लंगलंगि
भौक्यूं थैं लौंपला 
हे मायादार ! मि नि ह्वै सकुदु मयळ्दु
त्वै बरोबर 
वो क्वी हौरि ह्वाला जु जिकुड़ि थैं
'पयाश सौंपला 
@पयाश पोखड़ा 
आजादी......? Kavita
---------
पाड़ बटैकि आजादी ....?
पाड़ भ्यटैकि  जादी 
पाड़ छोड़िक आजादी ....?
पाड़ बौड़िक  जादी 
पाड़ मुक फरकाणा कि आजादी ....?
पाड़ कु मुक द्यखणा कु  जादी 
पाड़ जनि छैं  सिनै आजादी ....?
पाड़ कि ज्वनि पाड़ जनै  जादी 
@पयाश पोखड़ा 
जो सदनि हैंका कि कूड़ि-पुंगड़ि थैं हत्याणा रैं
---
जो सदनि हैंका कि कूड़ि-पुंगड़ि थैं हत्याणा रैं 
वो भग्यान अफु खुण अफि खड्वळु खत्याणा रैं 
मुण्ड नवैधुपणु दिवैकरणा रैं डौण्ड्या का ठाउ मा 
पर वो द्यप्ता पुजै मा भि सदनि अपणो थैं
घत्याणा रैं 
अपणा-पर्यो फर प्वणि भारी बिपत देखि-
सुणिकि भि 
छपछिपी प्वाड़ जिकुड़ि मा जौंकि वो पीठ थमथ्याणा रैं 
गुर्रौ अपणु कांचळ निखोळिक अफार वे
द्वळणा बैठ्यूं चा 
अर ये लकीरा का फक़ीर कोरी कांचळ थथ्याणा रैं 
मीनतमजूरि कैकि जाड़ा बैठ्यां लोग टुक्कू पौंछिगीं 
ये बड़आदिम बिरणि पीठि मा अफुथैं पत्याणा रैं 
छांछ छोळि-छाळिक वो गुन्दकि नौणि कि घूळि गैन 
ये कपळि फर रंगुड़ु लपोड़िक भाग थैं लत्याणा रैं 
बाटा बिरड़ा छाया जु सुबेररुम्कां घार बौड़ जाला 
यो थारम दे-देकि "पयाशपापी पराण बुथ्याणा रैं 
@पयाश पोखड़ा 
"वो"
*******
घुट्ट-घुट्ट भडूळ्यं मा 'वो'
इन ब्वना छन 
कि उंका हाल भि ऐन-सैन
मि जना छन 
उळ्यरु पराणहरचीं जिकुड़ि,
ख्वजदेर आंखि 
झणि कैका खयालु मा 'वो'
कै जनै ह्यना छन 
बल मुखड़ि मनखि कि भौत
कुछ बतै दींद 
तबि  'वोकरळि नज़र इनै-
उनै धना छन 
दिनम पोतळराति जोगण अब
मेरि दगड़्या ह्वैगीं 
पर जून-गैंणौं दगड़ अब 'वो'
क्य कना छन 
घुंघट्या की ढण्डी से गैरी
मेरि जिकुड़ि चा 
'वोबल भक्कम फाळ मरणा कु
सांसु कना छन 
हे घुघतीकफूहिंलास 
म्यारा खळ्याण मा 
तुमरि बोलि सुणि लगद जन
'वोब्वना छन 
भारी चलेतरचबौड़्याचुकलेर
ह्वै ग्या हवा भि 
तबि  'वोबन्द भितरों का
द्वार ख्वना छन 
म्यारा खुदेड़ गीतगज़ल थैं
पैड़ि-सुणि की 
'वोअपणि मयल्दु माया खुण
"पयाशब्वना छन 
@पयाश पोखड़ा 
"ढुगौं का ठप्पकौण्यां"
********************
कत्गा रौला-बौला  उनि छप्पत्वळै कि
तैर ग्या वो 
पर हम खुणै  ढुगौं का ठप ठप्पकौण्यां
धैर ग्या वो 
जाणिकि भि अजाण बणिकै वैका काख-
धाड़ बैठु मि 
 लाटु अपणि जगा छोडिकि सर्र फुण्डै
सैर ग्या वो 
क्युंकळिकिसळिकादै अर जिकुड़ि मा
भटुळि सि लगैकि 
आंख्यूं-आंख्यूं मा झणि क्य-क्या सानि
कैर ग्या वो 
तिसळा पराणा की छम्वट्या तीस भि
तिसळि रै ग्याइ 
म्यारा रुफ़ड़ांदा सरैल देखिकि जणि
डैर ग्या वो 
दुन्यां का समणि गिच्चु उफरणा की
हिकमत नि छे 
ब्वन-बच्याणा कु कभि भितर  कभि
भैर ग्या वो 
दीनद्वफरि का चुड़ापट्टि का घाम मा
ठण्डू छैल सि 
जांदा-जांदा अचाणचक "पयाशखुणै
ठैर ग्या वो 
पर हम खुणै  ढुगौं का ठप ठप्पकौण्यां
धैर ग्या वो 
@पयाश पोखड़ा 
"जिकुड़ि का मोर-संगाड़"
**********************
इत्गा भि यखुल्या-यखुलि कभि नि राया,
जिकुड़ि का मोर-संगाड़ 
कभि  क्वी,संगुळु बजालु,तरसणा छाया,
जिकुड़ि का मोर-संगाड़ 
 ब्वालाअब कैमा लगाणै अपणि,
खैरि-बिपदासुख-दुख 
अब  गौं मा भि कैका नि उगड़्यां छाया,
जिकुड़ि का मोर-संगाड़ 
अपणु-पर्याअदाइ-दुसमनवाडा सरै
अर उज्याड़ खवै 
सर्या रुड़ी-बसगाळ भलिकै सैड़िगे छाया,
जिकुड़ि का मोर-संगाड़ 
पल ख्वाळा का बूथा दाजि ब्वना छाया,
अपणा नाती-नतण्यूं मा 
वे जमन मा दिन-रात खुल्यां रैंदा छाया,
जिकुड़ि का मोर-संगाड़ 
एक जमनु इन भि अयूं  अचकाळ,
म्यार गौं का वार-प्वार 
भिचोळि-भिचोळिक भि नि खोलि पाया,
जिकुड़ि का मोर-संगाड़ 
मिल  अपणि छुवीं-बत्था सदनि,
दिल का भित्नै लुकाणु रौं 
पर दिवल्युं का भि कच्चा कंदुड़ छाया,
जिकुड़ि का मोर-संगाड़ 
ल्हेलु भि  कनकै ल्हेलु अपणि
जागा-जमीनि की फ़रद 
घूसखवा पट्वर्री का पट बन्द कर्यां छाया,
जिकुड़ि का मोर-संगाड़ 
कोठि,बग्लांकारफून हौरि झणि
क्य-क्या झमकयूं चा 
फेरि भि खन्द्वार सि किळै दिखेणा छाया,
जिकुड़ि का मोर-संगाड़ 
कभि  कभिक्वी  क्वीकन नि आलु
म्यारा भि ध्वार-धरम 
तुमरा भर्वंसा "पयाशका ख्वल्यां छाया,
जिकुड़ि का मोर-संगाड़ 
पयाश पोखड़ा 
हम भि कै जमन"
****************
बरखा का दीड़ों मा भिज्दा छाया,
हम भि कै जमन 
सौणा का स्वीणों मा रुज्दा छाया,
हम भि कै जमन 
सर्र कुएड़ि सि लौकेन्दि छे,
जब-जब जिकुड़ि मा 
तुमरा सौं तुमथैं  ख्वज्दा छाया,
हम भि कै जमन 
आंखि-आंख्यूं मा मायादार,
छुवीं-बत्था बिंगै कि 
छुयांळ आंख्यूं कि छुवीं लुच्छ्दा छाया,
हम भि कै जमन 
पोतळ सि कभि ईं धार वोर ,
कभि वीं धार पोर 
झणि किळै तुमरा पैथर भज्दा छाया,
हम भि कै जमन 
बुलबुल पलोसिक अर कैदि,
स्युदिं-पाटी कटोरिक 
तुमर बान बैख जन सज्दा छाया,
हम भि कै जमन 
@पयाश पोखड़ा 

अस्तित्व की विडम्बनाफर द्वि गढ़वळि शेर ----
बूंद बणिकै चुप्प बैठ्यूं रौ,
आंख्यूं का कुण्यूं मा 
भैर ढळक्येळि  आंसु सि,
हर्चि जैलु गळ्वड़्यूं मा  ()
ब्याळि तक जो मवस्यूं का
मुच्छ्यळा मुंजाणा रैं 
लोग उंथैं आज धुपणूं
दीणा कु खुज्याणा रैं  ()
@पयाश पोखड़ा 

नि दिखेन्दी"
************
क्वी घिंडुड़ि  घुघुति,
सटुलि नि दिखेन्दी।
चौका तिर्वळि अब क्वी,
चखुलि नि दिखेन्दी 
क्वी खाळा  म्याळा,
कौथिग नि उरेन्दा 
लाल जल्यबि दगड़ क्वी,
बंसुळि नि दिखेन्दी 
सरम ल्याज़ का दगड़ा,
सूनू चन्दी भि हरचा 
दादी का गाळुन्द अब क्वी,
हंसुळि नि दिखेन्दी 
मासाचौमासा मा हैरि-
मौळ्यार धौ दिखेन्दा 
पर कखड़ि-ग्वदड़ि की,
लगुलि नि दिखेन्दी 
पैड़ि-लेखि गैन लोग,
अब गळद्यवा नि राया 
गौं मा कैकि डाळा लगीं,
झगुलि नि दिखेन्दी 
सैड़िकि कुयड़ु-कुयड़ु सि,
ह्वै ग्याइ वा डाळि 
झपन्याळ पात सि वींकी,
भिंटुलि नि दिखेन्दी 
जनै द्याखा "पयाशउनै,
जिकुड़्यूं का चोर छन 
क्वी पराज़  खुद,
भटुळि नि दिखेन्दी 
@पयाश पोखड़ा 
झूटु  आदिम"
***************
सेरेक सच्चु अर पाथेक झूटु  आदिम।
तबि  थांता मसकुटौल कूटु  आदिम॥
जमादरि कबि  थ्वकदरि सि दिख्याई।
तबि  कत्गौले भलिकै लूटु  आदिम॥

ल्वैखाळ ह्वैकि ल्वै का छंछ्वड़ा लगैन।
तबि  कत्गै दा फट्ट फूटु  आदिम॥
सदनि लूण मरचा की मुट भ्वरीं राखा।
तबि  सबुल भूटंण सि भूटु  आदिम॥
तकणा तकण हुईं राया दिन राता की।
तबि  सुख्यूं क्याडु सि टूटु  आदिम॥
कबि गिच्चा बटैकि भला बाग नि छूटा।
तबि  कड़ु गिळै सि घूटु  आदिम 
सदनि दपकाणु राया अपणा पर्यो थैं 
तबि  बिछी गुर्रो सि चूटु  आदिम 
आंखि मनिख्यूं थैं ख्वज्याणि  "पयाश"
तबि  अदम्यूं दगड़ छूटु  आदिम 
पयाश पोखड़ा 


Copyright @ Bhishma Kukreti Mumbai; 2016
Critical and Chronological History of Asian Modern Garhwali Songs,  Poets   ; Critical and Chronological History of Modern Garhwali Verses,  Poets ; Critical and Chronological History of Asian Modern Poetries,  Poets  ; Poems Contemporary Poetries,  Poets  ; Contemporary Poetries from Garhwal; Development of Modern Garhwali Verses; Poems  ; Critical and Chronological History of South Asian    Modern Garhwali Verses  ; Modern Poetries ,  Poets  ; Contemporary Poetries,  Poets  ; Contemporary Poetries Poems  from Pauri Garhwal; Modern Garhwali Songs; Modern Garhwali Verses  ; Poems,  Poets   ; Modern Poetries  ; Contemporary Poetries  ; Contemporary Poetries from Chamoli Garhwal  ; Critical and Chronological History of Asian Modern Garhwali Verses ; Modern Garhwali Verses,  Poets   ; Poems,  Poets  ; Critical and Chronological History of Asian  Modern Poetries; Contemporary Poetries , Poems Poetries from Rudraprayag Garhwal Asia,  Poets   ; Modern Garhwali Songs,  Poets    ; Critical and Chronological History of Asian Modern Garhwali Verses  ; Modern Poetries  ; Contemporary Poetries,  Poets   ; Contemporary Poetries from Tehri Garhwal; Asia  ; Poems  ;  Inspirational and Modern Garhwali Verses ; Asian Modern Garhwali Verses  ; Modern Poetries; Contemporary Poetries; Contemporary Poetries from Uttarkashi Garhwal  ;  Modern Garhwali Songs; Modern Garhwali Verses  ; Poems  ; Asian Modern Poetries  ; Critical and Chronological History of Asian Poems  ; Asian Contemporary Poetries; Contemporary Poetries Poems from Dehradun Garhwal; Famous Asian Poets  ;  Famous South Asian Poet ; Famous SAARC Countries Poet  ; Critical and Chronological History of Famous Asian Poets of Modern Time  ;
-
पौड़ी गढ़वालउत्तराखंड  से गढ़वाली कविता चमोली  गढ़वालउत्तराखंड  से गढ़वाली पद्य  , कविता रुद्रप्रयाग गढ़वालउत्तराखंड  से गढ़वाली पद्य  , कविता ;टिहरी गढ़वालउत्तराखंड  से गढ़वाली पद्य  , कविता ;उत्तरकाशी गढ़वालउत्तराखंड  से गढ़वाली पद्य  , कविता देहरादू गढ़वालउत्तराखंड  से गढ़वाली पद्य  , कविता ;