उत्तराखंडी ई-पत्रिका की गतिविधियाँ ई-मेल पर

Enter your email address:

Delivered by FeedBurner

उत्तराखंडी ई-पत्रिका

उत्तराखंडी ई-पत्रिका

Wednesday, July 9, 2014

सन 2014 -2015 बजटौ भविष्यफल

घपरोळया , हंसोड्या , चुनगेर ,चबोड़्या -चखन्यौर्या -भीष्म कुकरेती      
                     
(s =आधी अ  = अ , क , का , की ,  आदि )
 आम बजट का बारा मा 99 . 97  प्रतिशत जनता अर 99 . 9 9 9 प्रतिशत राजनीतिज्ञ जाणदा बि नि छन कि बजट  हूंद क्या च अर बजट से आर्थिक दशा -दिशा कना जाली अर हरेक बजट पर अपणी राय दीण मा पैथर नि रौंद तो मि किलै रौं ?
मी बि 8 /7 2014 कु केंद्रीय बजट की भविष्यवाणी आज सुबेर 6 . 13 पर करणु छौं -
वित्त मंत्री चकाचक सफेद कपड़ों मा निर्धारित समय पर आला।  लोकसभा मा कार से उतरद वित्त मंत्री की  नजर , ध्यान , टक बजट पर कत्तै नि राली अपितु यां पर रालि कि भारतीय  अर विदेशी टीवी , अर अन्य मीडिया का कैमरा ठीक से ऊंकी लाइव कवरेज कारन। टीवी का संवाददाता अरुण जेटली का वै बैग पर बार बार कैमरा ज़ूम कारल जैक पुटुक बजट धर्युं राल। ये बगत विरोधी दल का टीवी न्यूज लोभी नेताओं मुक लटक्यूँ राल कि क्वी ऊं तैं नी पुंछणु च। 
असल मा वित्त मंत्री तैं पता रौंद  कि बजट का पिटारा खुलणो बाद सब कुछ फुस्स ह्वे जाल तो  वित्त मंत्री बजट से पैल ही इतराण /घमंड दिखाण मा विश्वास करदन किलैकि बजट खुलणो बाद तो वित्त मंत्री खलनायक  जांद । वित्त मंत्री इतरांद -इतरांद , घमंड से , गरूर से , गर्व से बैग पकड़िक लोकसभा भवन पुटुक प्रवेश कारल।  जनि वित्त मंत्री लोकसभा भवन भितर घुसला कि लोकसभा टीवी चैनेल लोकसभा मा घ्याळ दिखाल।  वर्तमान विरोधी दल भूतपूर्व विरोधी दल भाजपा की नकल कारल अर लोकसभा कार्यवाही नि चलण दीण पर याने खेचल -वाधा करण पर आमदा राला अर एनडीए  सांसद कॉंग्रेस  का पदचिन्हो पर चलणो कोशिस कारल याने एनडीए का सांसद लोकसभा कार्यवाही चलाण पर आमदा राला। लोकसभा मा कव्वारौळी, किल्ला रोंळी,    कुकर्यौयूळ , करैंयुं जन करकराट , छळयुं जन  किलकण, कतल  हूणो बाद जन किर्राट, किलबिल , कणाट , ककड़ाट , म्च्युं राल अर भारतीय जनता अपण मुंड फोडणी रालि कि हमन त सांसदों से  सभ्य आचरण     की आशा करी छे अर यी सांसद तो रागसुं से बि फंड आचरण करणा छन। 
इथगा घ्याळ मा क्वी मंत्री याने संसदीय मंत्री कुछ ब्वालल अर लोकसभा अध्यक्ष अनुमति देली कि कार्यवाही आगे बढ़ाया जाय। 
बिचारा नरेंद्र मोदी घड़याला कि ये घ्याळ से बढ़िया तो गुजरात विधानसभा की कॉंग्रेसी शांति छे। 
खैर लोकसभा अध्यक्ष वित्त मंत्री से बजट का पिटारा खुलणो ब्वालल। 
वित्त मंत्री पिटारा ख्वालल।  चूँकि मि हमेशा से ही अकाउंटिंग मा कमजोर छयो तो मि बजट का बारा मा बाक बुलण (भविष्यवाणी ) मा लाचार छौं।  बस एक बात की पक्की गारंटी च कि फिस्कल डेफिसिट मा बेहन्त इजाफा होलु। 
जनि वित्त मंत्री अपण  वित्तीय  श्रद्धांजलि याने बजट भाषण खतम कारल कि ब्रेकिंग न्यूज आलु कि स्टॉक एक्सचेंज मा आग लग गे। 
इना वित्त मंत्री भाषण खतम कारल कि सांसदों पर बौळ चढ़ जाल अर वो भागण लग जाल अर एक हैंक तैं अतिड्या (लंगड़ी ) दीण मिसे जाल अर हो हल्ला शुरू ह्वे जाल।  लोकसभा दुसर दिन तक मुल्तवी ह्वे जाली। 
असली लोकसभा तो लोकसभा आँगन मा टीवी कैमराओं समणि चौललि। 
मायवती प्रेस रिपोर्टरुं समिण सुधीर मिश्रा का लिख्युं भाषण पौढ़लि -हमारी पार्टी इस बजट की ना तो प्रशंसा करदी अर ना ही आलोचना।  हाँ पर चूँकि ये बजट मा परमोसन मा शिड्यूल्ड  कास्ट अर शिड्यूल्ड ट्राइब तैं रिजर्वेसन की बात नि ह्वे इलै हम लखनऊ विधान सभा नि चलण द्योला। 
ममता बनर्जी का बंदर टीवी कैमरा समिण उछल कूद कारल -चूँकि ये बजट मा व्यापार , निर्माण की बात हुईं च तो हम विरोध स्वरूप बंगाल मा कम्युनिस्ट अर भाजपाइयुं पिटाई करणो बंगाल जाणा छंवां अर हमर सांसद तपस पाल कम्युनिस्टों बेटी ब्वार्युं खोज माँ जालु। 
कम्युनिष्ट बि चिरड़ेक बयान द्याला बल चूँकि ये बजट मा उत्पादन बढ़ाणो बात करे गे तो हम ये बजट का विरोध मा तृणमूल कॉंग्रेस का जड़नाश हेतु बंगाल की सड़कों तैं लाल करणो बंगाल जाणा छंवां। 
मुलायम सिंग यादव ब्वालल - पैल त यु बजट मेरी समझ मा कतै नि आयि (मतलब बजट की समझ नी च ) ।  फिर ये बजट मा फ्री कुछ बि नी च तो विरोध मा हम उत्तर प्रदेश का 36 आईएएस  अर 63 पीसीएस अधिकार्युं तबादला करण वाळ छंवां। कुछ प्रत्वार्युंक तबादला बि करे जाल। 
बीजेडी का सांसद ब्वालल - बजट विश्लेषण का बाद (याने नवीन पटनायक तैं पुछणो बाद ) ही हम अपण प्रतिक्रिया द्योला।  किन्तु टीवी वाळ या न्यूज नि दिखाला। 
अन्ना डीएमके , डीमेकी वाळ बि बजट पर प्रतिक्रिया एकदम नि द्याला। 
एनडीए का सांसद तो चारण शैली मा बजट की प्रशंसा कारल। 
लालू यादव ब्वालल बल ये नॉन सेक्युलर बजट है हम सेक्युलर बजट लाने के लिए नितीश कुमार को न्योता देते हैं 
कॉंग्रेस नेता इना लोकसभा आँगन मा टीवी कैमराओं का समिण आला अर उना ब्रेकिंग न्यूज आलि कि कुछ कॉंग्रेस्यूंन वित्त मंत्री क निवास का गेट तोड़ी याल। 
कॉंग्रेस नेता बजट की इथगा काट कारल  कि बौळ मा बिसर जाल कि ये वर्तमान बजट मा 99 . 99999 टका नीतियां पिछ्ला साल का चिदंबरम बजट का  ही छन। 
चिदंबरम का सपाट बयान होल कि यु बजट 1991 , 1999 अर 2013 बजट की नकल च। 
राहुल गांधी को बयान होलु कि बजट  कल्पनाशील नी च । इखपर भाजपा का रवि शंकर प्रसाद बयान देला कि अब की बार बजट का आखर संस्कृत लिपि जन दिखेंदन अर बजट अक्षर बि भग्वया रंग का च तो हमारा बजट अवश्य ही कल्पनाशील बजट च। 
जख तलक जनता की प्रतिक्रिया कु सवाल च वा पुछणि रालि भारत निर्माण का बाद अच्छे दिन कब आएंगे। 



Copyright@  Bhishma Kukreti  9  /7 2014   
    

*लेख में  घटनाएँ , स्थान व नाम काल्पनिक हैं । 


Garhwali Humor in Garhwali Language on budget , Himalayan Satire in Garhwali Language on budget , Uttarakhandi Wit in Garhwali Language on budget , North Indian Spoof in Garhwali Language on budget , Regional Language Lampoon in Garhwali Language on budget , Ridicule in Garhwali Language on budget , Mockery in Garhwali Language on budget, Send-up in Garhwali Language on budget, Disdain in Garhwali Language on budget, Hilarity in Garhwali Language on budget, Cheerfulness in Garhwali Language on budget; Garhwali Humor in Garhwali Language from Pauri Garhwal on budget; Himalayan Satire on budget in Garhwali Language from Rudraprayag Garhwal; Uttarakhandi Wit on budget in Garhwali Language from Chamoli Garhwal; North Indian Spoof on budget in Garhwali Language from Tehri Garhwal; , Regional Language Lampoon on budget in Garhwali Language from Uttarkashi Garhwal; Ridicule in Garhwali Language from Bhabhar Garhwal on budget; Mockery  in Garhwali Language from Lansdowne Garhwal on budget; Hilarity on budget in Garhwali Language from Kotdwara Garhwal; Cheerfulness in Garhwali Language from Haridwar;

No comments:

Post a Comment

आपका बहुत बहुत धन्यवाद
Thanks for your comments