उत्तराखंडी ई-पत्रिका की गतिविधियाँ ई-मेल पर

Enter your email address:

Delivered by FeedBurner

उत्तराखंडी ई-पत्रिका

उत्तराखंडी ई-पत्रिका

Tuesday, March 3, 2009

हौळ-तांगू - काब्य माळा

हौळ-तांगू
काब्य माळा
श्री भिष्म कुकरेती जी तैं समर्पित

एक खबर

एक खबर
चौदा बिभाग
अब पंचैत का अंडर आला।
पर प्रधान छन फिकरमन्द
अब सि क्य खाला
कैकै थैं द्याला।
--------------------------
इन्त्यान

संसद मा
जु लेण चाणा छां
हैंको इन्त्यान
वूंकै तोता उड़ गेनी।
यक्ष प्रश्न रै गेनी
रुप्योंमा अळज्यां
अर युधि भेसमा
दुर्योधन पकड़े गेनी।
--------------------------
उद्घार

जंगलमा जब हिटुणू नि ए
त ठोकर त लगणि छै
पर बड़ा लोग्वी,बड़ी छ्वीं
ठोकर तैं, अहिल्यो उद्घार बतलै।
--------------------------
अकल

न जाणि
कब अकल आलि कुत्तम
बाघै समणा बगबौळ
हिंसाठिंसी अपड़म्।
--------------------------
बस स्टौप

द्वी सरिया
चार खम्भौं तौळ
खड़ा छन बस स्टौप।
पर धै लगैकि ब्वना छन
झणि कु दबेलू
म्यरा तौळ।
--------------------------
नेता

खेतीपाति होवु
चा हौळतांगू
पर बल्द निन जैका।
जन अजक्याळ
बिधायक छन
पर मंत्री निन
त नेता कै लैका?
--------------------------
बेकार

जबारि मिन बोली
तू पौ़लि,पौढ़लि
स्यू लुकणू रै।
जबारि मिन बोली
कुछ कौरलि,कौरलि
स्यू घुमणू रै।
अब नौनौकि फौज फटाक
मैकू ब्वनू
तिन कुछ नि कै।
--------------------------
नरेन्द्र कठैत
आकाशवाणी,पौड़ी ग़वाल,
उत्तराखण्ड,पिन246001
टिरिन्टिरिन्-01368-221016
मो0 9412934480
e-mail: narendrakathait9@gmail.com
(किसी भी कविता के उद्धरण, प्रकाशन के लिए लेखक की अनुमति आवश्यक है)