ये पहाड़ मा मुश्किल जिंदगी पहाड़ जनि

पहाड़ 
जनि सुणेण मा
तनि दिखेण मा
भोगणा मा  
दुन्य की गैळी 
कर्दिन हैरी 
यख बिटि
फुटीं  
छोया गदेरी
पण अफु 
रैगैनी 
निरपट सूखा 
बीरान 
यु पहाड़ 
ये पहाड़ मा 
मुश्किल जिंदगी 
पहाड़ जनि.

ऊबड़-खाबड़ धरती
उकाळ-उंदार
पैदल बाटों मा 
खुटों मा 
बिनांदा कांडा
पिडांदा
गारा-ढुंगा      
सीढ़ी जना 
छवटा-छवटा  
डुंडा-बिंगड़ा
रूखा-सूखा पुंगडा मा 
घर्या बल्द अर 
हल्य़ा ब्वाडा 
दगड़ मा डळफ़ोडा   
घुसणा रंदीन
अपणा सुक्याँ हड्गा
बगत कु बगत 
बरखण वल़ा बादळ  
कबी कबी 
छुमछे जन्दिन पाणि 
कखिम कखिम 
या रै जन्दिन 
तरसणा 
चोळी जना
अर कबी 
अति बरखा 
कैरि जांद 
सब कुछ चौपट 
घर कूड़ी  
बोगै जांद
ये पहाड़ मा 
मुश्किल जिंदगी 
पहाड़ जनि 

        डॉ नरेन्द्र गौनियाल...सर्वाधिकार सुरक्षित ..narendragauniyal@gmail.com