कैकै मंथरा संवाद (1940 से पैलाकि कविता )

रचना--  बलदेव प्रसाद नौटियाल (कड़ाकोट , गग्वाड़स्यूं , 1895 -1981 )

( इंटरनेट प्रस्तुति - भीष्म कुकरेती ) 

चुप क्या छै तु , बोल क्या ब्वलदी ?

रज्जा को ज्यु किछ त  नि होयो !

गुमसुम क्या छे तु , म्यरि मंथरा 

हैं ! रोण त नि छै लगीं तु छोरी ?

मंथरा हौर गुमसुम होय दण मण रोय 

चल्यतर लगि कन्न 

गंगजोण लगि उगसासि ल्हेण 

कनि   बौळेय स्या आग लगौण्या !

र्वै    र्वै  (र्  वै ) कि वीन आँखि लाल कैनि 

मुंड पकड़िक वा खड़ी होय 

उमाळ भरेय बोल नि सअकी 

आंख्यों बिटि फिर , ढांडो पोड़े 

बुका बुकि कैक सो धां वा रोय 

जनु वींको क्वी मोरी होय 

धुक धुकि लगौण्या संवाद बिंगौण्या 

इनि बि ह्वूंदन दूद की माखी तिरया।