बीड़ी

Garhwali Satire by Narendra Kathait

-

इन पक्कू नि बतलै सकदाँ कि ‘हुक्का अर् चीलम’ से पैली बीड़ी छै कि नी छै। पर हुक्का अर चिलामिन् बि बीड़्यू क्य बिगाड़ दे? आज बि हुक्का अर चीलाम्या दबदबा बीच बीड़्यू रुतबाकम नी ह्वे। बीड़ी, गरीब-अमीर हर कैकि, करबट मा बैठ जांदि। बीड़ी तैं कामचोर, बग्त कटणू हत्यार बणांैदन्। पर ठुकरयां अर लाचार लोग ब्वल्दन् कि बीड़्या सारा पर लम्बी रात बिकटे जांदि।

सुदामा प्रसाद पे्रमी जी, बीड़ी नौ कि एक कबिता मा लेख्दन ‘जुुगराज रयां तुम मेरी बीड़्यूं, तुमन सैरी रात कटैनी! एक का बाद हैंकि फंूकी, अपणा मन का भाव जगेनी’! पर बीड़्याभरोंसा पर अपड़ा मना भाव हर क्वी नि जगै सक्दु। अपड़ा मना भाव जगौणू तैं बीड़ी तैं समझुणू जरुरी च।

दुन्या मा, द्वी मनखी बि एक जना कख छन? हिन्दुवों देखा त् बडि़ जाति-छुटी जाति, मुसळमनू मा सिया-सुन्नी, सिखू मा मोना-केसधारी, इसायूं मा कैथोलिक अर प्रोटैस्टैंट। बीड़ी मा बिमसालु एक च, रंग-रूप बि एक, पर बीड़्या पैथर खाण-कमोण वळों कि अकड़ैस अलग-अलग छन। जन्कि, छोटा भाई-जेठा भाई, घोड़ा छाप बीड़ी, टेलीफून बीड़ी, पाँच सौ एक, पाँच सौ द्वीबीड़ी। छोटु भै अर बड़ा भै, नौ कि बीड़ी त् हमारि समझ मा ऐगि। किलैकि, छोटु भै अर बड़ा भै बीड़ी सुलगौंद, हमुन् कै द्यख्नि। कै बार इन बि देखी कि ‘जेठा भैन्’ ज्वा बीड़ी प्येकि फुंडचुटै, ‘छुट्टा भैन्’ वी बीड़्यू टुड्डा प्येकि, अपड़ी जिकुड़ी तीस बुझै। हमतैं क्य, कै तैं बि यिं बात पर बिस्वास नि होण कि गणेश जीन् कबि लुकाँ य ढकाँ बि बीड़ी प्ये होवु। पर एक गणेश बीड़ीवूंको नौ लेकि बि खूब धुवाँ उडोणी च।

खादी सूणी तैं, खाद्यू लम्बू कुरता-पैजामु, आँख्यू मा रिटण लग बैठ जांदु। पर खादी नौ की बीड़ी बि च। एक दिन हमुन् एक पनवडि़ पूछी- ‘दीदा! यिं बीड़्यू नौ, ‘खादी बीड़ी’ किलै रखे ग्येह्वलु’? वेन उल्टाँ पूछी- ‘खाद्यू मतलब तुम क्या बिंग्यां’? हमुन् जबाब दे-‘खादी यनिकि, सस्ती-मस्ती चीज क्या’। ताँ पर हमतैं सुण्ण प्वडि़- ‘बस्स! इलै हि, यिं बीड्यू नौ खादी च।जथगा सस्ती च, वाँं से जादा वाँ मा मस्ती च’।

क्वी ब्वल्दू ‘टेलीफून बीड़ी’ मा बात हि कुछ हौर च। क्वी ब्वल्दू तौं ‘घोड़ा छाप बीड़ी’ प्येकि मजा नि औंदु। एक आद हमुन् परदेस जाण वळांे कु इन ब्वल्दू बि सुणी ‘यार भुला इनासुणदि! इख या... ‘कामिनी बीड़ी’ नि मिल्दी। अगिल दौं जब घौर ऐली त् एक ‘बुरुस’ कामिनी बीड़्यू लै जै वा... टक्क लग्येकि।

(बक्कि फेर कबि)

Copyright@ Narendra Kathait 

दूधौ पराण

Satire by Narendra Kathait

दूधौ पराण त् वे दिन हि खट्टू ह्वे ग्ये छौ जै दिन ‘दै’ जमौणू रख्येे.’

दूधै हमेसा कुगत ह्वे। ‘दूध’ सांजी ‘दै ’ जमी, दै कि छाँछ छुळे त् ‘नौण’ निकळि। नौण फूकी ‘घ्यू’ बणी। चट्वा लोग्वा बीच घ्यू कु स्वाद फैली त् घ्यू कि कीमत बढ़ी । तैं बढ़ीं कीमतन् दूधौ स्वाद दब्ये दे। पर अज्यूं तलक बि, कै माई का लालन् इन निबोली, कि तै ‘घ्यू’ पर ‘दूधै’ कीमत बि दौं पर लगीं छ।

भैजी! दूधौ पराण त् वे दिनी खट्टू ह्वे ग्ये छौ जै दिन ‘दै’ जमाणू रख्येे। पर जमीं दै तैं बि मनखी कतोळी झणि क्य खुजाण चाणू छौ। दै पर्या उन्द खणेकि मन्खिन् रौड्यू बोली- ढूंढ ? तंैन उल्टां फरकी पूछी- क्य ढुंढ़ुण? पर बिना बतलयां मनखी रौड़ि तैंबार-बार गुर्त्याणू रै- ‘ढूंढ़! ढूंढ़!’ वा पुछणी राई- ‘क्य ढुढु़ण?’ बिचारि पर्या उन्द मनख्या हथू पर नच्दि रैगी। पर हंैंकै कांधिं मा बन्दूक रखी मनखी तैं क्य मिलुण छौ। आखिर दौं मन्खिन् थकी हारी सुसकरा भरि आवाज निकाळी- ‘छाँछ’ छुळेगी।

पर्या उन्द निरभै खट्टा पाण्या बीच नौ रखणू क्वी चीज निकळी त् मन्खिन नौ रखी ‘नौण’। छाँछ छुळदि दौं मनखी अगर ताकतै जगा दिमाग बि लगान्दु, त् ह्वे सक्दू छौ, नौ रतन न् सै त् द्वी-चार कौड़ी जरुर निकळ्दि। पर सब्यून् बोली नौण बरोबर क्वीचीज नी।

कुछ टैम तलक नौणौ बोलबाला रै। पर नौणै चिफलैस जादा दिन नि चली। जब मनखी तैं नौण सि बिगळछाण ह्वे त् वेन नौण भवसागर मा तपौण सुरु कर दे। हमुन् क्य सब्यून् देखी तपौन्द दौं नौण पर चिफलैसा तिड़का उठणा-दबणा रैनी पर आखिरदौंनौण पिघळि हि छ। पर नौणै चिफलैस प्येकि ज्वा चीज निकळी वा दिखण लैक छै। इनू बहुरुप्या मन्खिन् अज्यूं तलक नि देखी छौ। मौसम देखी तैन सकल बदळ्न सुरू कर दे। गरम देखी पिघळ जावु अर ठण्डा देखी जम जावू। जन्कि गंगा दगड़ागंगादास अर् जमुना दगड़ा जमुनादास। मनखी यीं चीजो जन-कन नौ नि रखण चाणू छौ। खोळा-खोळौं ‘कमोळी’ पर नचैकि मन्खिन् पुछुण सुरु करी- भयूं! बता धौं क्य नौ रखला? जैन बि तारिफ सूणी वेनी बोली- माण ग्यां ब्यट्टा! येन प्ये ब्वेकु दूध। नौपड़ी ‘घ्यू’।

अब चर्रि तिरपां घ्यू कि चराचरी छै। जरा-जरा करी सब्यूं पर घ्यू कि संगतौ असर प्वड़ण बैठी। जु पैली एक गफ्फा खाणू छौ वू र्वट्टि चबौण बैठी। जु र्वट्टि खाणू छौ वु कुण्डी चट कन बैठी। कुठार- कुन्नों की बरकत हर्चिगी। जु घुण्या अन्न पौन-पंक्ष्यूं कुछुट्यूं रौन्दु छौ, वे अन्न मनखी उकरी लौण बैठी। मन्खिन् घ्यूकि भगलोणिम् ‘गळा-गळा तक अन्न ठूंसी अन्नै असन्द गाड़ दे’। पर प्वटगि भ्वरेणा बाद बि मनखी ‘धीत’ नि भ्वरे।

जै मनखी पैली दूध प्येकि छाळि बाच छै वु गरगुरू रौण बैठी। कामा थुपड़ों का ऐंच कुम्भकरण सियां दिखेण लग गेनी। राबण अपणा जूँगो पर घ्यू कि मालिस कर्दू दिख्येे। मनखी घ्यू सूँघैकि अपड़ा पित्रू सान्त कन बैठी। मन्खिन् ‘द्यू’ सि लेकी ‘धुपणा’तक घ्यू घुसै दे।

अब सब्बि कागजू पर घ्यू बैठ्यंू दिख्येन्दु। योजनो मा घ्यू टपकुदू। दै की जलड़यूं उंद मट्ठा डाळी घ्यू ‘नेता’ बण गी। किताब्यूं मा घ्यून् आखर लिखण सुरु कर यालिन। आज जख देखा घ्यू कि चराचरी छ। घ्यू डाॅंगधर, घ्यू इंजीनैर, घ्यू प्रधान, घ्यूसौकार, घ्यू ठिकादार, घ्यू गुरु, घ्यू चेला।

‘लछमी’ घ्यू का कब्जा मा छ अर् ‘दूध’ बिधवा पिन्सन पर गुजारु चलाणी छ। पर हे लोळा करमकोढ़ी घ्यू! दूध नि होन्द त् तू कख बिटि होन्दि।

कोख्यू दुःख दर्द अज्यूं तलक बि कैन नि पछाणि।

Copyright@ Narendra Kathait 

-- 

 

Thanking You with regards

B.C.Kukreti