चबोड़ -चखन्यौ
मि घड्याणु छौ , सुचणु छौ बल जु पढंदेर बच्चो कुण बुले जाल बल मुहावरा, आणो हिसाब से नेतो पर कुछ ल्याखो त आजकला बच्चा इन ल्याख्ल
अंगूर खट्टा छन- जन कि हडक सिंग जी न बोली मंत्री पद मेरी जूती से.
अन्डूर
(अण्डा ) स्याको क्वी अर चूजा क रसी खावो क्वी - अलग उत्तराखंड की आग
लगाई कै हौरून अर कौंग्रेसी -भाजापा वळ मजा करणा छन.
अंत बुरे का बुरा- कहावत बिलकुल गलत च. राजनीति मा कुछ बि
बुरु कारो बस कोर्ट मा केस ली जाओ फिर दस पीड़ी तक मजा करणा राओ . सि मुलयम
सिंग जी , लालू प्रसाद यादव जी को क्या हूणु च. हाँ कबि कबि सुखराम जी
सरीखा नौसिखिया पकडे जान्दन जाळ मा ...
अंत भला सो सब भला- हाँ आखिर हड़क सिंग जी तै मंत्री पद मीलि गे की ना ?
काणो क्या मंगद ? बस द्वी आँख ! - नेता क्या मंगद एक अदद मंत्रीपद अर मंत्री क्या मंगुद --प्रधानमंत्री पद !
काणो क्या जाण बुरांसौ फूलो रंग ! -- भारतीय कम्युनिष्टों तै क्या पता केन्द्रीय मंत्रीपद को क्या मजा होन्दन !
काणो गांद अर बैरा बजान्द ----- जब लालू प्रसाद जी टू जी प्रसिद्ध ए.राजा अर कॉमन वेल्थ गेम प्रसिद्ध कलमाड़ी क बड़ाई करदन
काणो पिसद अर कुकुर खै जांद-- उत्तरखंड क्रान्ति दल क कुहाल !
काणो
तै काणो बाटो दिखांद ! जब बीर भद्र सिंग, यदुरप्पा , अमर सिंग , जगन रेडी ,
कलमाड़ी , सुखराम भारत बिटेन भ्रष्टाचार ख़तम करणै आपस मा छ्वीं लगावन
सूंगरूं दगड मांगळ -- धूमाकोट सपूत महान
वैज्ञानिक राम प्रसाद जी जब नेट माध्यम मा बुल्दन बल उत्तराखंड सरकार तै
ग्रामीण उत्तराखंड मा उद्योग खुलण चएंद
एक से द्वी भला- तिहाड़ जेल मा जब हैंको राजनेता भ्रष्टाचार , अनाचार क वजै से जेल आन्द त भित्रो नेता बुलद बल -एक से द्वी भला
अकेला चना भाड़ नही फोड़ सकता - महाराष्ट्र
का तिनी भूत पूर्व मुख्य मंत्री आदर्श घोटाला बाबत सी.आई.डी क समणि गवाही
मा इनी त बुलणा छन -इखुल्या इखुली मि इथगा बड़ो घोटाला नि कौरी सकुद थौ
अकल बडी कि भैंस ?- लालू जी बुल्दन बल भैंस बड़ी अर नीतेश जी बुल्दन बल अकल.. तबी त लोग भैन्सौ घास बि खै गेन
अदले क बदला /जैसे को तैसा- तामिलनाडू मा जब बि सरकार बदल्यांद वर्तमान मुख्यमंत्री भूत मुख्य मंत्री तै जेल भिजणो इंतजाम करद
अपुण अपुण इ होंद परायो परायो इ होंद - कोंग्रेस , शिव
सेना, डी.एम्.के , समाजवादी पार्टी , अकाली दल या hauri दल ये सिद्धांत तै
अपण धरम माणदन
गूणी अपुण पूँछ नि दिखदु अर बांदरौ बोद बल तै को पूछ लम्बी च - जब कोंग्रेस वाळ यदुरप्पा पर भ्रष्टाचार का आरोप लगान्दन .
बुलद बेटी कुण छौं सुणान्दु ब्वारी तै छौं - नीतेश कुमार जी
जब बुल्दन बल ' प्रधान मंत्री एक सेकुलर मनिख हूण चएंद' त सौब समजी जान्दन
बींगी , सौब जान्दन बल नीतेश जी नरेंद्र मोदी की बात करणा छन.
जन बुतिल्या तां पैल्या- कुज्याण उत्तराखंड
का भूत पूर्व मुख्य मंत्री खंडूड़ी जी, ऊंक दगड्या हर्याँ भूत पूर्व
मंत्री ए आण पर विशवास -भरवस इ नि करदन !
भैंसों गुस्सा मकडा पर - जब कै मंत्रालय मा भंडाफोड़ हूंद त पैल प्रशासनिक अधिकारी तै सस्पेंड करे जांद
खावन प्यावन औरुक अर मार खावन गौरुक -
प्रधान मंत्री खुणि सेनापति की चिट्ठी की खबर लीक कै हौरुं न कार अर वै
बगत शक्क सेनापति वी.के. सिंग जी पर ह्वाई
औंदी लक्ष्मी तै क्वी नि लत्यांद - भूत पूर्व टेलीकॉम मंत्री- प्रमोद महाजन अर ए. राजा क काम से त यिनि लगद
आवश्यकता आविष्कार की जननी है - नेतौ बड्यू (ड =ढ़ )चुनावी खर्च से त इनी लगद
ईद का चाँद होंना - चुनाव जीतणो बाद नीता लोग ईद का चाँद ना औंसी जून (चांद) ह्व़े जान्दन
जु बिंडी अटकदु खनु फटकदु - भग्यान हेमवती नंदन बहुगुणा क
जिन्दगी क आखिराक दिन अर ल़ेफ. ज. टी.पी.एस.रावत क फिरड़ फिरड़ से त इन
लगाद बल या पखाणा /कहावत सै च
एक ठौ मजा दीन्दो - सि अपण नारायण दत्त तिवाड़ी जी तै इ देखि ल्यावदी इथगा बेज्जती बाद बि कोंग्रेस हाई कमांड मा सुणवै च
सयांद बि नी च अर रयांद बि नी च -- अच्काल कोलेसन गवर्मेंट का पोलिटिकल पार्टनर
गुड़ दीणो अर ईंट मारणो - १९७७ मा बणी जनता पार्टी मा क्या ह्व़े छौ ?
बेटा क्या देखणा बेटा क यार देखणा -- यू.पी.ए.(२००९-२०१२) क हाल त तृणमूल कोंग्रेस क घुड़कि अर डी.एम् के क ताल से पछणे जांद
थुक्यूं चटण --- शरद पंवार, संगमा जीन कोंग्रेस इलै छ्वाड बल
सोनिया गांधी उन्ना देसी (विदेसी) च पन फिर वींकी दगड सरकार मा शामिल छन.
मारद
बाखरो , पकांद कुकड़ो खांदी दा लिँगड़ो क थुपड़ो - अच्काला नेतौं क योई
हाल छन . दिखांद (आश्वासन) कुछ हौर छन अर दींद कुछ हौर छन
तातो दूध ना पियेंद ना घुटेंद - कोंग्रेस अर ममता बनर्जी क रिश्ता
कुजगा को दुःख जिठाणो वैद - भारतीय जनता पार्टी वळु नरेंद्र मोदी तै प्रधान मंत्री बणाणै छ्वीं
जैकी करी बडी आस वैन द्याई झंग्वरो ग्रास - भौत साल पैल जब सोनिया गांधी
प्रधान मंत्री बणण इ वाळ छे कि मुलायम सिंग जी न समर्थन दीणो ना बोली देई
दै का पहरा बिराळु -- उत्तर प्रदेश मा अखिलेश यादव मंत्रीमंडल मा राजा भया जब जेल मन्त्री बणये गेन त ।
भौत बिराळु न मूस नि मारे जांद -- अच्काल भाजापा मा प्रधान मंत्री बणना कथगा नेता छन पण चुनाव हरणा इ छन.
निरपाणि को माछो - मंत्री पद या पद बगैर नेता
आठ पटियाळ नौ चूला - १९७७ का जनता दल मा क्या हाल छ्या ? अच्काल भाजापा मा क्या हाल छन ?
आधा गौं चैतवाळ आधा गौं बग्वाळ - उत्तराखंड मा क्षेत्रीय राजनैतिक दलूं हाल द्याखो
बुड्या बल्द अफु बि नि लगान्द हैंक तै बि लगाण दीन्दो -- अच्काल लाल कृष्ण अडवानी जीक क ई हाल छन.
तेल तुरक्योंणा ल़ू ण बुरक्योंणा -- जादातर मुख्यमंत्री केन्द्रीय इमदाद कुण इनी बुल्दन.
अपणा जयां कि नी कका कि रयाँ कि छौ -- जब एक नेता हैंको नेता पर भगार लगान्दु पण अपण टुटब्याग नि दिखदु
कम्बळो भल्लु -- सराकर जब बुल्दी बल गढ़वाळ मा पाणी कमी पैथर कै विदेशी ताकतों हाथ च
बांज बियाई अर गुबडि ह्वाई --नेतौं आश्वासन
ना ब्वेन स्वील हूण ना भाई बांठे भत्ति खयाण --उत्तराखंड का ग्रामीण इलाको मा उद्यम
